Jɔshwa 1 - Krio Fɔs Oli Baybul

PAPA GƆD Tɛl Jɔshwa Traŋa wan Fɔ Kapchɔ Kenan

¹ We Mozis we bin de wok fɔ PAPA GƆD day, PAPA GƆD tɛl Nɔn in pikin, Jɔshwa, we na bin Mozis in aprɛntis se,

² Mozis we na bin in yon wokman dɔn day. So mek in ɛn di Izrɛlayt dɛn rɛdi mek in de bifo dɛn fɔ go krɔs oba Riva Jɔdan ɛn go na di land we in de gi di Izrɛlayt dɛn.

³ PAPA GƆD se, jɛs lɛk aw in bin dɔn prɔmis Mozis, ɔlsay we dɛn go gɛt fɔ waka, na ples dɛn we in bin dɔn se i de gi dɛn.

⁴ PAPA GƆD tɛl am se in go gi dɛn ɔl di land we bigin from di ɛmti ples we pɔsin nɔ go ebul tap ɛn di il kɔntri dɛn we nem Libanɔn te rich di Riva Yufretis, ɛn ɔl di Itayt dɛn land te rich di Gret Si usay san de go dɔŋ, go bi dɛn land.

⁵ PAPA GƆD tɛl Jɔshwa se, wans in de, tete Jɔshwa go day, nɔn ɔda neshɔn nɔ go ebul bit Izrɛl. I se as in nɔ bin kɔmɔt biɛn Mozis, na so in nɔ go ɛva kɔmɔt biɛn dɛn.

⁶ PAPA GƆD tɛl Jɔshwa se i fɔ tinap lɛkɛ man, bikɔs nain go gɛt fɔ de bifo di pipul dɛn fɔ go kapchɔ di land we in PAPA GƆD bin dɔn swɛ to dɛn fɔstɛm-papa dɛn se, in go gi dɛn.

⁷ PAPA GƆD se na fɔ lɛ Jɔshwa tinap lɛkɛ man nɔmɔ ɛn lɛ i obe ɔl di lɔ dɛn we in bin dɔn gi Mozis, ɛn nɔ bɛn bɛn natin, ɛnisay dɛn go, bɛtɛ go fala dɛn.

⁸ PAPA GƆD se lɛ Jɔshwa mek shɔ se dɛn de rid di Lɔ Buk ɛnitɛm we dɛn pre to am ɛn wɔship am. I se dɛn fɔ de rid an de ɛn nɛt, so dat dɛn go no ɔl wetin de de fɔ ebul du ɔl wetin di lɔ se, so bɛtɛ go fala dɛn pan ɔl wetin dɛn put an pan.

⁹ PAPA GƆD tɛl Jɔshwa se wans nain PAPA GƆD dɔn tɛl am se mek i tinap lɛkɛ man, i nɔ fɔ fred natin ɛn i nɔ fɔ gɛt ɛni dawt nain maynd, bikɔs PAPA GƆD we nain PAPA GƆD go de wit am ɛnisay we i de go.

¹⁰ So Jɔshwa tɛl ɔl di difrɛn fambul dɛn bigman dɛn

¹¹ fɔ tɛl di Izrɛlayt dɛn se, insay tri de, dɛn fɔ krɔs Riva Jɔdan fɔ go kapchɔ di land we PAPA GƆD we na dɛn PAPA GƆD de gi dɛn fɔ dɛnsɛf, so dɛn fɔ pak it we go du fɔ ɔl datɛnde.

¹² Jɔshwa tɛl di Rubɛnayt dɛn, di Gadayt dɛn ɛn af pan di Manasɛ fambul dɛn se,

¹³ da tɔk we Mozis we na bin PAPA GƆD in wokman, bin tɔk, we i bin se PAPA GƆD we na dɛn PAPA GƆD se in go gi dɛn ples we dɛn go de we nɔbɔdi nɔ go ambɔg dɛn, na di land dawande.

¹⁴ I tɛl dɛn se dɛn wɛf ɛn dɛn pikin dɛn ɛn dɛn animal dɛn go lɛf na da land de we Mozis bin dɔn gi dɛn, bɔt di trɔŋ man dɛn go tek dɛn wɛpɔn dɛn ɛn krɔs Riva Jɔdan go oba say fɔ go ɛp di ɔda fambul dɛn

¹⁵ te te PAPA GƆD mek dɛn ɛp di ɔda fambul dɛn kapchɔ di land we PAPA GƆD we na dɛn PAPA GƆD de gi dɛn fɔ dɛnsɛf. I se, datɛnde, dɛn kin go bak go tap na dɛn yon land we de na di say we dɛn tinap na Riva Jɔdan usay san kin kɔmɔt, di land we Mozis we na PAPA GƆD in wokman bin dɔn tɛl dɛn se na dɛn yon.

¹⁶ Nain di pipul dɛn ansa se dɛn go du ɔl wetin i bin tɛl dɛn fɔ de du ɛn ɛnisay i sɛn dɛn, dɛn rɛdi fɔ go.

¹⁷ Dɛn tɛl am igen se, dɛn go obe am jɔs lɛk aw dɛn bin de obe Mozis ɛn dɛn pre se lɛ PAPA GƆD we na dɛn PAPA GƆD de wit am ɔltɛm lɛk aw I bin de wit Mozis.

¹⁸ Dɛn tɔk igen se, ɛnibɔdi we nɔ go wan du wetin Jɔshwa se, dɛn fɔ kil am. Di pipul dɛn tɛl am se lɛ i tinap lɛk man pan ɔltin.