Jona 4 - Krio Fɔs Oli Baybul

Jona In Vɛks Wan Ɛn PAPA GƆD In Sɔri-At Wan

¹ We dis bi, Jona vɛks bad bad wan.

² I tɛl PAPA GƆD se i bin no se na dat PAPA GƆD go du so na dat bin mek in rɔnawe fɔ go Tashish. I se in no se PAPA GƆD gɛt sɔri-at bad, i nɔ de vɛks so, ɛn in lɔv nɔ de ɛva chenj ɛn so i nɔ lɛk fɔ du bad.

³ I pre se mek PAPA GƆD tek in layf sins i go bɛtɛ fɔ am fɔ day pas fɔ gɛt layf.

⁴ PAPA GƆD insɛf aks am wetin mek i fɔ vɛks.

⁵ So Jona kɔmɔt na di siti, go na di istɛn pat, usay i go mek bafa fɔ insɛf. I sidɔm insay, de wet fɔ si wetin go apin to Ninivɛ.

⁶ So PAPA GƆD mek wan plant gro oba de so dat Jona go ɛnjɔy fɔ sidɔm ɔnda di shed. Dat mek Jona gladi bikɔs di plant gi am shed.

⁷ Bay di tɛm we do klin di nɛks de, PAPA GƆD mek wan tumbu it di plant, so i wida ɛn day.

⁸ Wɛn san kɔmɔt, PAPA GƆD mek wam wam briz we kɔmɔt na di ist, blo. Dɔn di san so wam dat i bin de bɔn Jonain ed we mek i fent, dɔn i pre fɔ day; i se i bɛtɛ if i day pas we i gɛt layf.

⁹ Dat mek PAPA GƆD aks Jona wetin mek i fɔ vɛks pan di plant. Jona se i gɛt rayt fɔ vɛks ɛn i so vɛks dat i want fɔ day.

¹⁰ PAPA GƆD se, “If yu de sɔri fɔ plant we yu nɔ no aw i gro bikɔs i bɔs na nɛt ɛn day na nɛt,

¹¹ wetin mek mi nɔ fɔ sɔri fɔ di pipul dɛn na Ninivɛ, da big big siti de we gɛt pas wan ɔndrɛd ɛn twɛnti tawzin pipul de we nɔ no dɛn lɛfan frɔm dɛn raytan ɛn dɛn gɛt bɔku animal dɛn de?”