Jona 3 - Krio Fɔs Oli Baybul

Jona Du Wetin PAPA GƆD Se

¹ Afta dat PAPA GƆD tɔk to Jona ɛn sɛn am di sɛkɛn tɛm.

² I se mek i grap go na Ninivɛ, da sem big siti we i bin sɛn am ɛn go tɛl di pipul dɛn wetin in se.

³ Dis tɛm naw, Jona grap go Ninivɛ, jɛs lɛkɛ aw PAPA GƆD se. Ninivɛ na bin big big siti ɛn na tri de yu de tek waka frɔm wan pat go na do ɔda pat.

⁴ Afta Jona dɔn waka fɔ wanol de, i tɔk nain at se na fɔti de mɔ Ninivɛ gɛt bifo PAPA GƆD go dɔnawe wit dɛn.

⁵ We i prich, di pipul dɛn na Ninivɛ biliv PAPA GƆD in wɔd; dɔn ɔlman, frɔm big to smɔl, wɛr munin klos fɔ sho aw dɛn sɔri ɛn dɛn ɔl gri se dɛn fɔ fast.

⁶ Wɛn di kiŋ na Ninivɛ insɛf yɛri, i grap nain tron, pul in klos ɛn wɛr di sem munin klos ɛn kɔba insɛf wit ashis.

⁷ I nɔ dɔn de, i anawns se, mɔtalman ɛn animal, dat na dɛn wan we dɛn de mɛn na os ɛn dɛn wan we tap na bush, nɔ fɔ it natin; dɛn nɔ fɔ drink wata ɛn nɔbɔdi nɔ fɔ fid dɛn,

⁸ bɔt dɛn ɔl fɔ wɛr munin klos ɛn dɛn fɔ beg PAPA GƆD gud, ɛn di mɔtalman dɛn fɔ lɛf fɔ du bad ɛn lɛf fɔ fɛt ɛn wund ɛn chuk pɔsin.

⁹ Di kiŋ se sɔntɛm dat go mek PAPA GƆD in at kol ɛn i nɔ vɛks da bad bad vɛks we i bin vɛks igen, dɔn i go sɔri fɔ dɛn ɛn nɔ dɔnawe wit dɛn.

¹⁰ Wɛn PAPA GƆD si ɔl wetin dɛn du; aw dɛn lɛf fɔ du bad, i sɔri fɔ we i bin tɔk se i go dɔnawe wit dɛn ɛn i nɔ du dɛn natin.