Jona 1 - Krio Fɔs Oli Baybul

Jona Nɔ Gri Fɔ Du Wetin PAPA GƆD Se

¹ PAPA GƆD tɔk to Jona we na Amitay in bɔypikin wande se,

² “Grap go na da big siti we nem Ninivɛ, ɛn wɔn dɛn se a dɔn yɛri ɔltin bɔt di bad we dɛn de du.”

³ Bifo dat Jona grap ɛn rɔnawe go na Tashish lɛk fɔ se in go go usay PAPA GƆD nɔ de. I go na Jopa usay i mit wan ship we bin de rɛdi fɔ go Tashish. I bay tikit ɛn jomp insay di ship fɔ go Tashish usay i min to se PAPA GƆD nɔ go de.

⁴ So PAPA GƆD insɛf mek big big tinada blo ɛn i bin tan lɛk di ship wan skata.

⁵ Ɔl di siman dɛn bin de fred bad bad wan, dɛn ɔl at de na dɛn mɔt ɛn ɔlman bigin ala mek in yon gɔd ɛp dɛn. Dɛn trowe ɔl wetin de na di ship insay di wata mek di bot go layt. Ɔl da tɛm de Jonain bin lidɔm insay insay di ship de slip dip wan.

⁶ Di kapten go mit am de ɛn aks am wetin i de du, if na slip i de slip. Di kapten tɛl am se mek insɛf grap ɛn pre to in yon gɔd fɔ ɛp dɛn ɛn sɔntɛm i go sɔri fɔ dɛn ɛn mek dɛn nɔ day.

⁷ Ɔl di siman dɛn gri se fɔ luk grɔn mek dɛn go no udat mek dɛn de gɛt da kayn trɔbul de. We dɛn du am, i sho se na Jona mek wetin de bi, de bi.

⁸ Dɛn aks am udat i bi, wetin i de du, usay i kɔmɔt ɛn wetin mek dis de bi to dɛn.

⁹ I tɛl dɛn se in na Ibru ɛn dat na PAPA GƆD we na di GƆD we mek ɛvin ɛn ath i de wɔship.

¹⁰ I tɛl dɛn se in de rɔnawe pan PAPA GƆD ɛn dat mek di siman dɛn fred ɛn se na bad tin i dɔn du so. Dɛn aks am wetindu i de rɔnawe pan PAPA GƆD.

¹¹ Ɔl da tɛm de di tinada jɛs de blo. So di siman dɛn aks Jona wetin dɛn fɔ du to am so dat di tinada go tap fɔ blo.

¹² Jona se dɛn fɔ trowe am na di wata so dat di wata nɔ go rɔf igen. I se in no se di tinada de blo bikɔs ɔf wetin i du ɛn dat nain dɔn put dɛn pan trɔbul so.

¹³ Di siman dɛn nɔ bin wan du dat, so dɛn tray fɔ kɛr di ship go na dray land. Bɔt usay! I nɔ tek. Bifo dat di tinada jɛs de wɔs.

¹⁴ Nain dɛn pre to PAPA GƆD se lɛ i fɔgiv dɛn ɛn nɔ pɔnish dɛn fɔseka Jonain layf, bikɔs nain PAPA GƆD mek ɔl dat de bi.

¹⁵ As dɛn ib am na di wata so, di tinada lɛf fɔ blo ɛn di wata nɔ rɔf igen

¹⁶ We di siman dɛn si wetin bi, dɛn fred PAPA GƆD, mek sakrifays ɛn prɔmis fɔ sav am.

¹⁷ PAPA GƆD mek wan big big fish swɛla Jona ɛn i lɛf insay di fish in bɛlɛ fɔ tri de.