Joɛl 3 - Krio Fɔs Oli Baybul

PAPA GƆD go jɔj di neshɔn dɛn

¹ PAPA GƆD se we da tɛm de rich we i go gi Juda ɛn Jerusɛlɛm dɛn prɔpati dɛn bak,

² in go gɛda di neshɔn dɛn ɛn kɛr dɛn go na di Vali ɔf Jɔjmɛnt. I se na de i go jɔj dɛn fɔ wetin dɛn du to di Izrɛlayt dɛn, we nain pipul. I se dɛn skata in pipul ɔlɔbɔt ɛn sheb in land, dɔn dɛn

³ trowe days fɔ luk grɔn fɔ in pipul. I gi dɛn wan bɔbɔ fɔ gɛt wan rare gyal dɔn dɛn sɛl di gyal pikin dɛn fɔ wayn ɛn a drink am.

⁴ I aks wetin Taya, Saydɔn ɛn dɛn ɔda siti dɛn na Filistia gɛt fɔ du wit am. I se if na pe dɛn wan pe bak insɛf go pe dɛn bak kwik wan fɔ ɔl wetin dɛn dɔn du ɛn i nɔ go westɛm sɛf!

⁵ I se dɛn go tek in silva ɛn gold go na dɛn pegan gɔd dɛn os.

⁶ I se dɛn dɔn sɛl di pipul na Juda ɛn Jerusɛlɛm gi di Grik dɛn ɛn pul dɛn kɔmɔt usay dɛn tap.

⁷ Bɔt in go mek dɛn kɔmɔt na di say we dɛn sɛl dɛn ɛn i go pe di neshɔn dɛn fɔ wetin dɛn du.

⁸ I se insɛf go sɛl dɛn bɔy ɛn gyal pikin dɛn gi di pipul na Juda ɛn dɛnsɛf go sɛl dɛn gi di Sabian dɛn we de fawe. I se nain PAPA GƆD dɔn tɔk am.

⁹ Fɔ tɛl di neshɔn dɛn: fɔ rɛdi fɔ fɛt wa, fɔ kɔl ɔl di sojaman dɛn. Lɛ ɔl udat ebul fɛt kam ɛn go fɛt di fɛt.

¹⁰ Nak nak di tin dɛn we dɛn de yuz fɔ plant mek i tɔn sɔd ɛn di tin we dɛn kin tek bab tik fɔ mek am lɛ i tɔn spia; ivin di wan dɛn we nɔ gɛt trɛnk fɔ biliv se dɛn gɛt trɛnk.

¹¹ Ɔl di neshɔn dɛn we de rawnd, una mekes kam, una gɛda unasɛf de. PAPA GƆD duya mek yu pipul fɛt gud.

¹² Lɛ di neshɔn dɛnsɛf rɛdi ɛn go dɔŋ di Vali ɔf Jɔjmɛnt; bikɔs na de PAPA GƆD gɛt fɔ sidɔm jɔj ɔl di neshɔn ɔlɔbɔt.

¹³ Put di nɛf we fɔ tek avɛst de bikɔs di tin dɛn fɔ avɛst dɔn rɛp. Fɔ go usay dɛn de mek wayn bikɔs di ples dɔn ful. Di kyas dɛn fɔ di wayn ful te dɛn rɔnoba, bikɔs di bad we de pan dɔn pasmak.

¹⁴ Bɔku bɔku pipul, bɔku bɔku pipul, na di vali we dɛn kin gri pan sɔntin! PAPA GƆD de kam na di Vali we dɛn kin gri pan sɔntin.

¹⁵ Di san ɛn di mun ɔl go dak ɛn di sta dɛn nɔ go gri fɔ shayn.

PAPA GƆD go blɛs in pipul

¹⁶ PAPA GƆD mek nɔys lɛkɛ layɔn na Mawnt Zayɔn. In vɔys lɛk tɛnda na Jerusɛlɛm; ɛn ɛvin ɛn ath go trimbul. Bɔt PAPA GƆD go bi di sikyɔriti fɔ in pipul, di kɔtintri fɔ di Izrɛlayt dɛn.

¹⁷ I se da tɛm de dɛn go no se in na PAPA GƆD we na dɛn GƆD, di wan we de na di oli il na Zayɔn. Jerusɛlɛm go bi in oli siti ɛn trenja dɛn nɔ go jɛs de tek de mek natin.

¹⁸ Da de de, di mawnten dɛnsɛf go gɛt wayn bɔku ɛn di il dɛn go gɛt bɔku milk, ɔl di watasay dɛn na Juda go gɛt bɔku wata; ɛn wata sɛf go bɔs insay PAPA GƆD in os fɔ wata di Shitim Vali.

¹⁹ Ijipt go tan lɛk ples we dɛn lɛf to insɛf ɛn Idɔm go tan lɛk ɛmti land we pɔsin nɔ go ebul tap, bikɔs ɔf di fɛt fɛt we dɛn dɔn du to di pipul na Juda, we dɛn dɔn kil fɔ natin.

²⁰ Bɔt pipul go tap na Juda sote go, ɛn Jerusɛlɛm sɛf fɔ ɔl di jɛnareshɔn.

²¹ I se in nɔ go lɛ dɛn blɔd wes fɔ natin, in go mɔs pɔnish udat gilti, bikɔs in na PAPA GƆD we de na Mawnt Zayɔn.