Joɛl 2 - Krio Fɔs Oli Baybul

Lokɔs dɛn bɔs: Dis na wɔnin bɔt di de we PAPA GƆD go kam

¹ Blo di trɔmpɛt na Zayɔn; mek nɔys fɔ kɔl atɛnshɔn pantap PAPA GƆD in oli mawnten! Lɛ ɔl di pipul we tap na di land trimbul bikɔs di de we PAPA GƆD de kam de nia,

² na de we ɔltin go dak ɛn luk sɔri, i mek di ples dak bad bad wan Lɛk aw di ples go blak na di mawnten na so di pipul go bɔku ɛn pawaful; i go at fɔ si dɛn kayn, we nɔ bin ɛva bi bifo ɛn i nɔ go ɛva bi igen na ɔl di jɛnareshɔn.

³ Faya de bifo dɛn ɛn biɛn dɛnsɛf, faya de bɔn. Di land bifo dɛn tan lɛk aw da fam na Idɛn tan, bɔt afta dat di ples tan lɛk ɛmti land we pɔsin nɔ go ebul tap, ɛn natin nɔ de pas dɛn de.

⁴ Dɛn fiba lɛk ɔs dɛn, ɛn dɛn de rɔn lɛk we ɔs de rayd go wa.

⁵ Lɛk aw di chariɔt dɛnsɛf kin mek, na so dɛn de jomp pantap di mawnten, lɛk we faya de bɔn wit ayɛnkol ɛn de pwɛl ɔltin; lɛk aw pawaful ami kin rɛdi fɔ go fɛt.

⁶ Bifo dɛn, ɔl di pipul bin de pan pen, dɛn ɔl fes bin wayt so.

⁷ Lɛk aw sojaman dɛn kin mek, na so dɛn de mek, lɛkɛ sojaman dɛn we de fɛt nɔmɔ, na so dɛn kin klem ay wɔl. Dɛn ɔl de mach go usay dɛn wan go, natin nɔ de mek dɛn chenj dɛn rod.

⁸ Dɛn nɔ de mistek baŋ dɛn kɔmpin, nɔn pan dɛn nɔ de mis in rod; dɛn de go usay dɛn wan go ɛn nɔn wɛpɔn nɔ ebul tap dɛn.

⁹ Dɛn bɔs insay di siti, klem ɔp di wɔl dɛn; dɛn klem go insay di os dɛn, pas na winda lɛkɛ tifman.

¹⁰ Wɛn dɛn bɔs, di ath trimbul, ɛvin sɛf trimbul. Di san ɛn mun ɔl dak ɛn di sta dɛn nɔ gri shayn igen

¹¹ PAPA GƆD yuz in vɔys fɔ tɔk bifo in ami, di pipul nain ami so bɔku; di pɔsin we de gi dɛn ɔda so pawaful. Di de we PAPA GƆD go kam na big de we pɔsin fɔ fred; nɔbɔdi nɔ go ebul fɔ bia am.

I se dɛn fɔ beg padin

¹² PAPA GƆD se, naw naw, dɛn fɔ go bak to am wit ɔl dɛn at, dɛn fɔ fast ɛn kray, ɛn sho se dɛn sɔri;

¹³ ɛn nɔto dɛn klos nɔmɔ dɛn fɔ chɛr fɔ sho se dɛn sɔri, na dɛn at dɛn, dɛn fɔ ɛmti bifo am. In naw se lɛ dɛn go bak to PAPA GƆD we na GƆD bikɔs nain gɛt gud at ɛn sɔri - at bad, i nɔ de vɛks kwik ɛn in lɔv fɔ dɛn nɔ de chenj, ɛn i rɛdi fɔ fɔgiv dɛn ɔltɛm.

¹⁴ I se nɔbɔdi nɔ no if i go sɔri fɔ dɛn, ɛn blɛs dɛn, if dɛn go gi PAPA GƆD we na GƆD, dɛn gren ɛn drink ɔfrin.

¹⁵ Blo di trɔmpɛt na Zayɔn; mek lɛ ɔlman fast; I se fɔ lɛ dɛn ɔl gɛda wan ples fɔ pre,

¹⁶ fɔ mek ɔlman we gɛda oli; fɔ kɔl ɔl di big pipul togɛda gɛda dɛn pikin dɛn ɛn ivin dɛn wan we de sɔk bɔbi. Ɔkɔ ɛn yawo sɛf fɔ kɔmɔt na do.

¹⁷ I se midul usay dɛn kin kip kot ɛn usay di ɔlta de, di man dɛn we de mek sakrifays fɔ pipul sin, fɔ kray ɛn beg PAPA GƆD fɔ sɔri fɔ di pipul. Dɛn fɔ tɛl am lɛ i nɔ mek in yon pipul shem we go mek di ɔda neshɔn dɛn gɛt wɔd fɔ tɔk. I se i nɔ fɔ mek di ɔda neshɔn dɛn aks dɛn usay dɛn GƆD de.

PAPA GƆD mek tin bigin gro bak na di land

¹⁸ Dɛn PAPA GƆD fil bad bɔt wetin de bi na di land, so i sɔri fɔ in pipul.

¹⁹ PAPA GƆD ansa dɛn ɛn tɛl dɛn se in de gi dɛn sid, wayn, ɛn ɔyl, ɛn dat go mek dɛn satisfay mɔ; i se in nɔ go mek dɛn ɔda neshɔn luk dɛn ɛn sɔktit igen

²⁰ I se in go mek di lokɔs dɛn we bin bɔs kɔmɔt na di Nɔth go fa frɔm dɛn. I se in go mek dɛn go usay dray ɛn we nɔ gɛt natin fɔ pwɛl, di wan dɛn we de bifo go go na di Dɛd Si, dɔn di wan dɛn we de biɛn go go na di Mɛditarenian Si, di smɛl we dɛn go smɛl go de go ɔlsay. Fɔ tru, PAPA GƆD de du big wok.

²¹ I se di land nɔ fɔ fred; i fɔ gladi ɛn mek fil gud, bikɔs PAPA GƆD dɔn du big wok!

²² I se dɛn wayl animal na bush nɔ fɔ fred, bikɔs di ples we dɛn kin it na di land we pɔsin nɔ go ebul tap, grin; di tik de bia frut, di fig tik ɛn di vayn tik de pul wetin dɛn fɔ pul.

²³ I se di pipul na Zayɔn fɔ gladi dɛn fɔ fil gud fɔseka PAPA GƆD, we na dɛn GƆD bikɔs i dɔn sɛn ren kwik fɔ mek dɛn no se i min wetin i se. I sɛn di ren bɔku bɔku wan kam dɔŋ di wan we kam kwik o ɛn di wan we kam leta lɛk aw dɛn fɔ kam.

²⁴ Di ples we dɛn kin mas mas rɛs we dɛn kɔt am, go gɛt bɔku sid, di ples we dɛn kin put wayn ɛn ɔyl go ful te i rɔnoba.

²⁵ I se in go mek ɔl wetin di lokɔs dɛn bin dɔn it, dat na, di lokɔs dɛn we bin bɔs lɛkɛ big ami, we i bin sɛn pan dɛn, bi wetin dɛn bin bi bak.

²⁶ I se dɛn go it te dɛn se i du, ɛn prez PAPA GƆD we na dɛn GƆD in nem, we dɔn de du wɔndaful tin fɔ dɛn. Ɛn in pipul nɔ go ɛva shem igen

²⁷ I se dɛn go no se i de wit di pipul na Izrɛl, ɛn dat in PAPA GƆD, na dɛn GƆD ɛn dɛn nɔ gɛt nɔn ɔda wan. Ɛn i nɔ go mek in pipul shem igen

Di tɛm we PAPA GƆD go kam

²⁸ I se di tɛm go rich we in go put in Spirit pan ɔlman; dɛn bɔy ɛn gyal pikin dɛn go de tɔk PAPA GƆD Wɔd, dɛn olpa dɛn go de drim gbay ɛn dɛn yɔŋ man dɛn go de si vishɔn.

²⁹ In Spirit go ivin go pan dɛn wokman ɛn savant - gyal dɛn.

³⁰ I se in go wɔn dɛn na ɛvin ɛn ath bɔt wetin go bi wit blɔd, faya ɛn smok.

³¹ San nɔ go shayn, di ples go dak ɛn di mun go rɛd lɛk blɔd. I se ɔl dis go bi di de we PAPA GƆD go kam, dat na di big de we wi fɔ fred.

³² Dat tɛm de, i go bi se, ɔl udat kɔl PAPA GƆD in nem fɔ sev am, go sev. PAPA GƆD dɔn se, sɔm pipul go de na Jerusɛlɛm we di waala nɔ go mit. Bɔt sɔm pan dɛn go de we na PAPA GƆD chuz fɔ sev dɛn.