Joɛl 1 - Krio Fɔs Oli Baybul

¹ PAPA GƆD tɔk to Joɛl we na Pɛthuɛl in bɔypikin:

Di pipul kray fɔ dɛn plant dɛn ɔl we dɔn pwɛl

² I se dɛn olpa fɔ yɛri dis ɛn ɔl udat tap na Juda sɛf fɔ lisin! I aks if dɛn kayn tin de dɔn bi dɛn tɛm ɔ di tɛm we dɛn fɔstɛm-papa bin de.

³ I se dɛn fɔ tɛl dɛn pikin dɛn; ɛn dɛnsɛf fɔ tɛl dɛn yon pikin dɛn, we go tɛl dɛn yon pikin na dɛnsɛf yon jɛnareshɔn.

⁴ I se wetin di lokɔs dɛn we de kɔt kɔt tin dɛn lɛf, nain di lokɔs dɛn we de waka togɛda bɔku bɔku wan, dɛnsɛf dɔn it. Wetin di lokɔs dɛm we de waka togɛda bɔku bɔku wan lɛf, nain di lokɔs dɛn we de jomp jomp dɔn it, dɔn wetin di lokɔs dɛn we de jomp jomp lɛf, nain di lokɔs dɛn we de pwɛl pwɛl tiŋs, dɛn dɔn it.

⁵ I beg ɔl drɔnkɔman fɔ wek ɛn kray; i se ɔl di wan dɛn we kin drink rɔm fɔ kray bita bita wan bikɔs dɛn dɔn lɔs di swit swit wayn we dɛn kin drink, i se dɛn mɔt nɔ go gɛt fɔ tes am igen

⁶ I kɔl di lokɔs dɛn, neshɔn. I se na wanol neshɔn dɔn atak in land so; dɛn pawaful ɛn nɔbɔdi nɔ ebul kɔnt dɛn; dɛn gɛt tit dɛn we traŋa lɛk layɔn yon, ɛn dɛn shap lɛk uman layɔn yon

⁷ I se di neshɔn dɔn nyamanyama in vayn tik dɛn ɛn dɔn mek di fig tik dɛn nɔ gud fɔ natin; di neshɔn dɔn so nekɛd di tik dɛn dat dɛn dɔn fɔdɔm; na so dɛn wayt.

⁸ I se dɛn fɔ kray ɛn wɛr munin fɔ sho se dɛn sɔri lɛk vajin we in man jɛs day yɔŋ wan.

⁹ Dɛn nɔ go ebul mek ɔfrin to PAPA GƆD nain os igen wit di gren dɛn ɛn drink. Di man dɛn we de mek sakrifays fɔ pipul sin we de wok fɔ PAPA GƆD fɔ sɔri ɛn kray.

¹⁰ I se di fil dɛn nɔ gud fɔ natin igen; bikɔs ɔl di gren dɛn we dɛn plant dɔn pwɛl, di wayn nɔ bɛtɛ igen, ɛn di ɔyl sɛf dɔn dɔn.

¹¹ I se dɛn fama dɛn fɔ kɔnfyus ɛn sɔprayz, di wan dɛn we kin mek wayn fɔ kray we dɛn si wetin dɔn apin to di wit ɛn bali; bikɔs dɛn nɔ ebul pul natin igen, ɔltin dɔn pwɛl.

¹² Di greps tik dɔn wida, di fig tik nɔ bɛtɛ igen Di pomigranet tik, pam tik ɛn apul tik ɛn di ɔda tik dɛn na di fil, ɔl dɔn wida; ɛn di pipul dɛn ɔl nɔ gladi igen Mɔtalman pikin dɛn ɔl nɔ ebul gladi igen

¹³ I se di man dɛn we de mek sakrifays fɔ pipul sin fɔ sɔri ɛn wɛr saklɔth fɔ sho se dɛn sɔri, dɛn fɔ kray as pipul we de sav na di ɔlta. I se dɛn fɔ go insay PAPA GƆD in os wɛr saklɔth fɔ slip. Dɛn we de wok fɔ PAPA GƆD! Bikɔs pipul nɔ ebul mek di gren ɛn drink ɔfrin igen na dɛn PAPA GƆD in os.

¹⁴ I se dɛn fɔ mek dɛn fast, dɛn ɔl gɛda wan ples, Fɔ gɛda ɔl di bigman dɛn ɛn ɔlman we tap na di land, dɛn fɔ mit na PAPA GƆD we na dɛn GƆD in os; ɛn kray to PAPA GƆD.

¹⁵ Da de de na de! Bikɔs di tɛm we PAPA GƆD go kam nɔ fa igen i go kam lɛk tin we de nyakanyaka we kɔmɔt to di Ɔlmayti

¹⁶ I aks if dɛnsɛf nɔ si aw it dɛn pwɛl aw dɛn jɔy ɛn wetin kin mek dɛn gladi nɔ de na PAPA GƆD in os igen

¹⁷ We di sid dɛn de ɔnda di dray grɔn, dɛn de wida, di ples we dɛn kip di tin dɛn we dɛn avɛst, ɔl ɛmti; di sid dɛn os ɔl dɔn pwɛl bikɔs sid dɛn nɔ de fɔ kip de.

¹⁸ I se di bist dɛn ɔl de ala wit pen. Di kaw dɛn nɔ no wetin fɔ du bikɔs dɛn nɔ gɛt ples fɔ go it igen; ɛn ivin di ship ɛn got dɛn ɔl nɔ no wetin fɔ du.

¹⁹ PAPA GƆD, na to yu a de kray o! Faya dɔn pwɛl ɔl usay di animal dɛn fɔ it we de na di ɛmti land we pɔsin nɔ go ebul tap, ɛn di faya dɔn bɔn ɔl di tik dɛn na di fil.

²⁰ Dɛn wayl animal ɔl de kray to yu bikɔs di watasay dɛn ɔl dɔn dray, ɛn faya dɔn pwɛl ɔl usay di animal dɛn fɔ go it we de na di ɛmti land we pɔsin nɔ go ebul tap.