Job 9 - Krio Fɔs Oli Baybul

Job

¹ Job ansa se:

² Na tru yu de tɔk: Pɔsin nɔ go ebul tɛl PAPA GƆD se in an klin.

³ If pɔsin se i wan agyu wit PAPA GƆD, PAPA GƆD go aks am wan tawzin kwɛshɔn we nɔbɔdi nɔ go ebul ansa.

⁴ PAPA GƆD sabi ɔltin ɛn i pawaful. Nɔbɔdi nɔ ebul chalenj am.

⁵ Nain de mek mawnten dɛn shek ɛn nɔbɔdi nɔ no wɛn dat de bi, wɛn i de sho se in vɛks;

⁶ we mek di wɔl kin shek kɔmɔt nain ples ɛn mek di pila dɛn we i tinap pan, trimbul;

⁷ we de gi ɔda mek san nɔ shayn, ɛn di sta dɛnsɛf nɔ shayn;

⁸ we nain wangren mek di klawd tan aw i tan, we de tap di swɛlin dɛn na si;

⁹ udat mek di Bia ɛn di Oriɔn sta dɛn, di sta dɛn we de na di skay;

¹⁰ we de du tin we mɔtalman nɔ de ɔndastand, di bɔku wɔndaful tin dɛn we pɔsin nɔ go ebul kɔnt.

¹¹ Fɔ tru, i kin pas nia mi, bɔt a nɔ de si am; i kin de kɛriɔn in biznɛs, bɔt a nɔba no se i de de.

¹² I de tek wetin i want ɛn nɔbɔdi nɔ ebul tap am; Nɔbɔdi nɔ go aks am wetin i de du sɛf;

¹³ We PAPA GƆD vɛks, i vɛks; di wan dɛn we de ɛp watasay dɛbul, de butu to am.

¹⁴ Mi go ebul agyu PAPA GƆD? Mɔt sɛf nain a nɔ gɛt.

¹⁵ Pan ɔl we a nɔ du natin, a nɔ gɛt mɔt fɔ tɔk to am; pas a beg am fɔ sɔri fɔ mi.

¹⁶ If a kin kɔl am, ɛn i ansa mi, a nɔ go biliv se i go lisin to mi sɛf.

¹⁷ I de bit mi nɔmɔ ɛn mek a sɔfa fɔ natin;

¹⁸ i nɔ de gi mi bloblo, na sɔfa nɔmɔ a de sɔfa.

¹⁹ If na kɔmpitishɔn fɔ udat gɛt trɛnk, nɔbɔdi nɔ pas am! If na fɔ tɔk na kot, udat go sɛn kɔl am?

²⁰ Pan ɔl we a nɔ du natin, mi bɔku tɔk go mek a lɔs mi kes; pan ɔl we a nɔ du natin, i go tek wetin a tɔk fɔ fɛn fɔlt pan mi.

²¹ Mi na gud man, bɔt a nɔ bisin igen; na gens a dɔn gens sɛf wit layf.

²² A nɔ bisin bɔt natin igen, udat gud ɛn udat bad, ɔl de day.

²³ Wɛn tin lɛkɛ wa, ɔ flɔd mek gud pɔsin day, di watasay dɛbul de gladi we inosɛnt pipul de sɔfa.

²⁴ PAPA GƆD de mek bad pipul du wetin dɛn wan du na wɔl; i de mek di jɔj dɛn mek se dɛn nɔ de si. If nɔto PAPA GƆD na udat?

²⁵ Tɛm de flay bɔt natin bɛtɛ nɔ de apin to mi.

²⁶ Di de dɛn kin flay lɛk aw bot kin pas kwik kwik na wata; ɔ lɛk aw ak kin flay kam dɔŋ we i si fɔl pikin.

²⁷ If a tɛl PAPA GƆD se a nɔ de se natin igen, a go smayl ɛn mek lɛk natin nɔ bi,

²⁸ a de fred se ɔda tin dɛn go bi to mi, bikɔs i go se a dɔn du sɔntin bad.

²⁹ Yu we na PAPA GƆD go stil se a du rɔŋ; wetindu a fɔ de fos se a de agyu.

³⁰ If a was na ɛni wata, ɔ was mi an wit karozin,

³¹ yu go stil ib mi insay dip ol, ɛn mi yon klos sɛf nɔ go wan si mi.

³² If PAPA GƆD na bin mɔtalman lɛk mi fɔ agyu wit, wi bin fɔ go kot mek dɛn jɔj wi kes.

³³ Nɔbɔdi nɔ go de fɔ jɔj bitwin wi tu, we fit fɔ tɔk dis kes.

³⁴ A de beg PAPA GƆD fɔ lɛf fɔ pɔnish mi, ɛn lɛf fɔ mek a fred so.

³⁵ Datɛnde, a nɔ go fred we a de tɔk, bikɔs nɔto so a tan.