Job 8 - Krio Fɔs Oli Baybul

Bildad

¹ Bildad we na Shuayt ansa se:

² I du so pan bɔku tɔk naw, ɛn di tɔk we yu de tɔk tan lɛk we pɔsin de pul briz nain bɛlɛ.

³ PAPA GƆD nɔ miks pan bɛnbɛn ɛn in we na PAPA GƆD Ɔlmayti, nɔ de rɔb Pita fɔ pe Pɔl.

⁴ If yu pikin dɛn dɔn du wetin PAPA GƆD nɔ want, na dɛn fɛn dɛn day fɔ dɛnsɛf.

⁵ If yu de aks PAPA GƆD fɔ ɛp yu ɛn pre mek PAPA GƆD Ɔlmayti sɔri fɔ yu,

⁶ wans yu de waka tret wit PAPA GƆD ɛn yu an klin, dɛn i go mɔs tinap fɔ yu ɛn gi yu ɔl wetin yu lɔs bak.

⁷ Wetin yu bin gɛt fɔs go smɔl, pas wetin yu go gɛt bambay.

⁸ A beg, aks dɛn fɔstɛm pipul, ɛn tink gud bɔt wetin yu fɔstɛm-papa dɛn bin fɛnɔt;

⁹ wi nɔ de liv lɔŋ, so wi nɔ no natin, bikɔs wi layf tan lɛk we shado kin lɔs.

¹⁰ Dɛn go tɛl yu bɔt di sɛns ɛn sabi we dɛn gɛt, ɛn na wetin dɛn dɔn lan, dɛn go tɔk bɔt.

¹¹ Na usay swamp de, swamp rɛs de gro; ɛn watasay gras nɔ kin gro usay wata nɔ de.

¹² If wata nɔ de, dɛn go day, ɛn dɛn wan we nɔ du fɔ kɔt, na dɛn fɔs go day.

¹³ Na dat kin apin to pɔsin we nɔ bisin bɔt PAPA GƆD; wetin di man we nɔ no PAPA GƆD abop pan, nɔ kin bɛtɛ.

¹⁴ Wetin i abop pan, nɔ kin las; i tan lɛk we man abop pan spayda wɛb we kin brok ɛni tɛm.

¹⁵ Na lɛk spayda wɛb; i liŋ pan am, i pwɛl, i ol am bɔt i nɔ bɛtɛ.

¹⁶ Dɛn tan lɛk plant we dɛn de wata bifo san kɔmɔt, ɛn so dɛn rut de gro ɔlsay.

¹⁷ In rut dɛn de rap pan di ston dɛn; ɛn na de i tap

¹⁸ If pɔsin rut am, nɔbɔdi nɔ go no se i bin de gro de.

¹⁹ Na so pɔsin we bad nɔ de ɛnjɔy fɔ lɔŋ; ɔda bad pɔsin go tek in ples.

²⁰ PAPA GƆD nɔ de lɛf gud pɔsin to insɛf, ɛn i nɔ de ɛp bad pɔsin.

²¹ I go mek yu laf bak, ɛn ala wit gladi.

²² Di wan dɛn we nɔ lɛk yu go shem ɛn PAPA GƆD go nyamanyama di os dɛn we bad pipul tap.