Job 7 - Krio Fɔs Oli Baybul

¹ Wans mɔtalman de na wɔl, in layf tan lɛk we dɛn de fos pɔsin fɔ wok na ami, i gɛt fɔ de wok lɛk lebra.

² Lɛk we slev de luk fɔ shed, ɛn lɛk wokman we de abop fɔ in pe,

³ na so a dɔn de mɔnt afta mɔnt nɔ de du natin bɛtɛ, semweso, na so a de sɔfa ɛvri nɛt.

⁴ We a go slip na nɛt, a de wɔnda ustɛm a go grap. Bɔt di nɛt kin lɔŋ, ɛn na tɔn tɔn a de tɔn tɔn te do klin.

⁵ I tan lɛk mi bɔdi ɔl rɔtin; na soso sofut kɔba mi bɔdi lɛk klos; i kin mek lɛk i de dray bɔt tɔf de kɔmɔt de.

⁶ Ɛvride de pas kwik pas aw pɔsin we de mek kɔntriklos kin de paspas trɛd kwik kwik, ɛn bay di tɛm we di de de dɔn, yu nɔ bɛtɛ igen

⁷ Nɔ fɔgɛt se mi layf tan lɛk briz; i tan lɛk na dɔn mi yon ɛnjɔymɛnt dɔn so.

⁸ Yu de si mi naw, bɔt yu nɔ go gɛt fɔ si mi igen; yu go de luk mi so, a go dɔn day.

⁹ Lɛk aw klawd de lɔs, na so we mɔtalman day, i nɔ de kam bak;

¹⁰ i nɔ go go nain os, ɛn in pipul de fɔgɛt bɔt am.

¹¹ A nɔ ebul sɛt mi mɔt; a mɔs tɔk aw a de fil; a mɔs tɔk wetin de at mi.

¹² Mi nɔto watasay ɔ watasay dɛbul, we fɔ de wach wetin a de du ɔltɛm.

¹³ Wɛn a kin go lidɔm, a kin min se a go blo,

¹⁴ bɔt yu kin mek a drim bad drim ɛn sho mi tin dɛn we de mek a fred,

¹⁵ bifo dat, mek pɔsin kwis mi trot, mek a day; i bɛtɛ pas fɔ lɛf wit bonbon.

¹⁶ A et mi layf: a dɔn taya wit dis layf. Jɛs lɛf mi saful bikɔs a go day jisnɔ.

¹⁷ Wetin na mɔtalman we yu fɔ tek in biznɛs siriɔs so ɔ de gi am di kayn atɛnshɔn we yu de gi am,

¹⁸ we mek yu de wach wetin i de du na mɔnin, ɛn tɛst am ɔl tɛm.

¹⁹ Pul yay smɔl kɔmɔt pan mi, mek a gɛt bloblo.

²⁰ If a sin, i nɔ gɛt natin fɔ du wit yu. Yu dɔn mek mi tagɛt. I tan lɛk se mi na ebi lod fɔ yu.

²¹ Yu fɔ mek lɛk se a nɔ sin ɛn fɔgiv mi sin. A go day jisnɔ; yu go de fɛn mi, bɔt da tɛm de, a go de insay mi grev.