Job 6 - Krio Fɔs Oli Baybul

Job

¹ Dɛn Job ansa se:

² If pɔsin bin ebul we mi trɔbul, if i put ɔl mi wahala na skel!

³ I bin fɔ ebi pas ɔl di sansan na bich; na dat mek a de mek shɔtat.

⁴ PAPA GƆD in aro dɔn chuk mi; di pɔyzin dɔn sok insay mi bɔdi; PAPA GƆD dɔn rɛdi fɔ sho mi pɛpɛ.

⁵ Wayl dɔŋki de kray we i gɛt gras fɔ it, ɔ man kaw de kray we i de it?

⁶ We it nɔ gɛt tes, pɔsin nɔ go ebul it am if i nɔ put sɔl, ɛn na so di wayt pat pan eg sɛf nɔ gɛt tes.

⁷ Mi mɔt nɔ de tes dɛn kayn it de na dɛn kayn it de a et.

⁸ A wish a kin aks PAPA GƆD fɔ sɔntin, ɛn i du wetin a want;

⁹ dat na fɔ mek i go jɛs kwis mi mek a day, na fɔ mek i jɛs tek in an ɛn kɔt mi layf!

¹⁰ Mi at go kol; A go prez am ɔl we pen de na mi bɔdi; bikɔs a nɔ dinay PAPA GƆD we oli, in wɔd, wande.

¹¹ A nɔ gɛt trɛnk fɔ liv igen A nɔ ebul bia sɛf igen

¹² Noto ston dɛn tek mek mi, ɛn mi nɔto ayɛn.

¹³ Fɔ tru tru, a nɔ ebul ɛp misɛf, ɛn pɔsin nɔ de fɔ ɛp mi.

¹⁴ Pɔsin we nɔ ɛp in padi na pɔsin we nɔ gɛt fred ɛn rɛspɛkt fɔ PAPA GƆD.

¹⁵ Mi padi dɛn de mek lɛk aw sɔm watasay kin mek, I kin gɛt wata wande, di ɔda de i dray,

¹⁶ Di watasay dɛn kin dak ɛn kin kol.

¹⁷ We san wam, di wata kin dray; di ɔt ɔt san kin dray di wata.

¹⁸ Dɛn wan we de travul wit kamɛl bay grup, kin gɛt fɔ go ɔda say fɔ fɛn wata fɔ drink; dɛn kin go na di ɛmti ples we pɔsin nɔ go ebul tap, ɛn day de.

¹⁹ Sɔm pan dɛn kɔmɔt Tima de luk fɔ wata, ɔda wan dɛn we kɔmɔt Shiba, de abop se dɛn go gɛt.

²⁰ Dɛn pwɛl at bikɔs dɛn bin shɔ se dɛn go gɛt; we dɛn rich de, dɛn kɔnfyus.

²¹ Una dɔn tan lɛk di watasay dɛn to mi, we una si di mɔnɛ we mit mi, una fred.

²² A bin tɛl una se gi mi prɛzɛnt? Ɛn a nɔ se una fɔ brayb pɔsin fɔ mi.

²³ A nɔ ivin aks una fɔ pul mi na mi ɛnimi an; ɔ fɔ pe mɔni mek di wan dɛn we de ambɔg mi, fri mi.

²⁴ A go sɛt mi mɔt ɛn lisin we una de tich mi; una mek a ɔndastand usay a go rɔŋ.

²⁵ Tɛl frɛn tru nɔ pwɛl frɛn! Bɔt us gud yu tɔk du?

²⁶ Yu tink se yu ebul kɔrɛkt mi we yu fil se a de tɔk wetin a de tɔk fɔ jɛs pul briz na mi bɛlɛ?

²⁷ Yu go ivin gyambul fɔ gɛt pikin we nɔ gɛt mama ɛn papa, ɛn yɔwo fɔ sɛl yu padi.

²⁸ Bɔt duya, una luk mi na mi yay; a nɔ go lay to una.

²⁹ A beg, una tink gud ɛn lɛf fɔ jɔj mi. Gri se a nɔ du rɔŋ.

³⁰ Lay de na mi mɔt? A nɔ no rayt frɔm rɔŋ?