Job 5 - Krio Fɔs Oli Baybul

¹ Ala nɔ! Ɛnibɔdi de we go ansa yu? Us enjɛl de we go ansa yu?

² Vɛksteshɔn de kil fulman, ɛn jɛlɔsi de kil pɔsin we nɔ gɛt bɛtɛ sɛns.

³ A dɔn si we fulman jɛntri, i nɔ tu te, a bigin tɔk bad bɔt in os.

⁴ In pikin dɛn de pan trɔbul ɔltɛm. If dɛn go kot, dɛn de lɔs dɛn kes; dɛn nɔba gɛt pɔsin fɔ tɔk fɔ dɛn.

⁵ Dɛn wan we aŋri kin it wetin fulman plant ɔlwe dɛn de midul chukchuk, ɛn di wan we gridi go tek in jɛntri.

⁶ Pen ɛn sɔfrin nɔ de gro na dɔti, ɛn trɔbul nɔ de bɔs na grɔn;

⁷ jɛs lɛk aw spak we kɔmɔt na faya de go ɔp, na so mɔtalman bɔn fɔ gɛt trɔbul.

⁸ “Fɔ mi yon say, na PAPA GƆD a go de luk ɔp to, na PAPA GƆD a go kɔmplen to;

⁹ we kin du big tin dɛn we pɔsin nɔ ɔndastand, wɔndaful tin dɛn we pɔsin nɔ ebul kɔnt;

¹⁰ nain de mek ren fɔdɔm na wɔl ɛn de wata dɛn bush;

¹¹ nain de mek udat ɔmbul gɛt pozishɔn, ɛn mek udat gɛt bɛrin, in at kol.

¹² I de mek bad pipul plan nɔ wok so dat dɛn nɔ go gɛt wetin dɛn plan.

¹³ I de mek di wan dɛn we dig ol fɔ ɔda pɔsin, fɔdɔm insay di ol; ɛn wetin dɛn plan nɔ ol wata.

¹⁴ We ples brayt, dɛn stil de waka na dak, santɛm, dɛn go jam dɛnsɛf lɛk na nɛt.

¹⁵ I de pul pikin dɛn we dɛn papa dɔn day na wulf mɔt, i nɔ de mek dɛn buli poman.

¹⁶ Dat de mek di poman gɛt op ɛn lɔk bad pipul dɛn mɔt.

¹⁷ Na tru se i go fayn fɔ di man we PAPA GƆD de kɔrɛkt, so pɔsin nɔ fɔ vɛks pan PAPA GƆD Ɔlmayti if i de kɔrɛkt am.

¹⁸ We PAPA GƆD wund yu, i go mɛn di wund; we i mek yu sik, i go mek yu wɛl.

¹⁹ I go pul yu pan siks trɔbul, ivin pan di wan we mek sɛvin, i go pul yu de bak.

²⁰ If aŋri de na siti, i nɔ go mek yu day wit aŋri, ɛn i nɔ go mek dɛn kil yu we wa de.

²¹ I nɔ go mek pipul tek dɛn mɔt kil yu, ɛn nɔ go mek yu fred we trɔbul de na siti.

²² Trɔbul ɛn aŋri nɔ go min natin to yu, ɛn yu nɔ go de fred wayl animal.

²³ Ston ston nɔ go ambɔg yu plant, ɛn wayl animal sɛf nɔ go ambɔg yu.

²⁴ Yu go slip wit kol at, ɛn yu go kɔnt di animal dɛn we yu de mɛn, bɔt nɔn nɔ go lɔs.

²⁵ Yu jɛnareshɔn go bɔku, ɛn dɛn go tan lɛk gras we de gro ɔlsay.

²⁶ Na we yu dɔn ol gud, yu go day, lɛkɛ aw na we plant dɔn ful, dɛn de pik am.

²⁷ Lisin o, ɔl wetin wi fɛnɔt, na tru. Yusɛf tray fɔ lan dɛn. I go gud fɔ yu.