Job 42 - Krio Fɔs Oli Baybul

¹ Nain Job ansa PAPA GƆD se:

² A no se natin nɔ de we yu nɔ ebul du, ɛn nɔbɔdi nɔ go ebul tap ɛnitin we yu wan du.

³ Yu aks mi se us rayt a gɛt fɔ aks yu we yu du sɔntin wit yu yon sɛns. Na dat bin mek a tɔk bɔt tin dɛn we a nɔ no natin bɔt, tin dɛn we a nɔ no bɔt wande.

⁴ Yu se mek a lisin we yu de tɔk ɛn ansa yu kwɛshɔn dɛn.

⁵ A bin no yu nɔmɔ bay wetin a yɛri pipul dɛn de se, bɔt naw a dɔn si yu wit mi yon yay.

⁶ Dat mek a dɔn shem, so a de rɔb dɔst ɛn asis beg yu, lɛ yu sɔri fɔ mi.

Di Tɔk Fɔ Dɔn Di Buk

⁷ We PAPA GƆD ɛn Job dɔn tɔk dɔn, PAPA GƆD tɛl Ɛlifaz we na Timanayt se, in dɔn vɛks pan in ɛn dɛn tu padi dɛn. I se nɔto di rayt tin dɛn se bɔt in PAPA GƆD. I se na Job we nain wokman, se di rayt tin.

⁸ PAPA GƆD se dɛn fɔ kɛr sɛvin man kaw ɛn sɛvin man ship go to Job we nain wokman, ɛn go ɔfa sakrifays we dɛn de bɔn na faya, fɔ pul dɛn ed. I se Job go pre fɔ dɛn ɛn in go ansa di pre we Job go pre, lɛ in nɔ pɔnish dɛn fɔ di fulish tin we dɛn du; i se dat na we dɛn nɔ se di rayt tin bɔt am, bɔt Job in bin se di rayt tin.

⁹ So Ɛlifaz we na Timanayt ɛn Bildad we na Shuayt, ɛn Zofa we na Naamatayt, go du wetin PAPA GƆD tɛl dɛn fɔ du. PAPA GƆD bin ansa Job in prea.

¹⁰ PAPA GƆD gi Job bak ɔl wetin i bɔn dɔn lɔs, wɛn i bin dɔn pre fɔ in padi dɛn dɔn; i gi am tu tɛm wetin i bin gɛt fɔstɛm.

¹¹ Nain in brɔda ɛn sista dɛn, ɛn ɔl di wan dɛn we bin no am fɔstɛm, go it ɛn drink nain os; dɛn sho am se dɛn sɔri fɔ am fɔ ɔl di bad tin dɛn we PAPA GƆD bin mek mit am. Ɔlman gi am wan wan kɔpɔ ɛn wan wan gold riŋ.

¹² PAPA GƆD blɛs Job we i bin olpas we i bin yɔŋ; i bin gɛt fɔtin tawzin ship, siks tawzin kamɛl, tu tawzin kaw ɛn wan tawzin dɔŋki.

¹³ I bin gɛt sɛvin bɔypikin ɛn tri gyal pikin.

¹⁴ In fɔs pikin bin nem Jimayma, di sɛkɛn wan bin nem Kizaya, ɛn di tɔd wan bin nem Kerɛn Apuch.

¹⁵ Insay di wanol kɔntri, nɔn uman nɔ bin de we fayn lɛk Job in gyal pikin dɛn. Dɛn papa bin gi dɛnsɛf prɔpati we i bin de gi dɛn brɔda dɛn.

¹⁶ Afta ɔl dat dɔn bi, Job bin de fɔ wan ɔndrɛd ɛn fɔti ia mɔ, ɛn i si in bɔypikin dɛn, in bɔypikin dɛn bɔypikin dɛn, te rich di nɔmba fo jɛnareshɔn.

¹⁷ Job bin dɔn ol bad bad wan bifo i day.