Job 41 - Krio Fɔs Oli Baybul

¹ Yu ebul kech Lɛviatan wit fish uk, ɔ tay in mɔt wit rop?

² Yu ebul put rop insay in nos, ɔ bɔs in jɔ wit uk?

³ I go beg yu lɛ yu nɔ kil am? I go bɛl yu wit fayn fayn tɔk?

⁴ I go mek wanwɔd wit yu se in go wok fɔ yu sote go?

⁵ Yu go ple wit am di we we yu go ple wit bɔd ɔ yu go tay rop nain nɛk de waka so dat yu wokuman dɛn go ple wit am?

⁶ Treda dɛn go ebul tɔk prayz fɔ am? Dɛn go ebul sheb am?

⁷ Yu go ebul chuk chuk am wit da shap tin we dɛn de tek kech fish, ɔ in ed wit spia fɔ kech fish?

⁸ Tɔch am wit yu an; mɛmba di tin we i go pas yu; yu nɔ go du am igen!

⁹ A se, mɔtalman at pwɛl; we i si Lɛviatan, i fɔdɔm na grɔn wantɛm.

¹⁰ Nɔbɔdi nɔ de we wayl te i go se in de go chalenj am. Wɛl, udat naw go se in de chalenj mi.

¹¹ Udat dɔn gi mi sɔntin we go se a fɔ pe am bak? Ɔl wetin de na dis wɔl, na mi gɛt am.

¹² “A mɔs tɛl una bɔt in fut dɛn, ɔ in trɛnk, ɔ in bɔdi.

¹³ Udat go ebul pul in kanda? Udat go ebul bɔs in trɔŋ trɔŋ kanda?

¹⁴ Udat gɛt trɛnk fɔ mek i opin in mɔt? In tit dɛnsɛf go mek yu fred.

¹⁵ In bak kɔba wit skel dɛn we de na tret layn; dɛn de so nia, yu go min se na wanol tin.

¹⁶ Dɛn de so nia dɛn kɔmpin dat briz sɛf nɔ ebul pas bitwin dɛn

¹⁷ Dɛn ɔl jɔyn; dɛn so lidɔm lidɔm pantap dɛn kɔmpin, pɔsin nɔ go ebul pul dɛn.

¹⁸ We i sniz, faya de kɔmɔt, ɛn in yay rɛd lɛk we san de kɔmɔt.

¹⁹ Faya de kɔmɔt nain mɔt; na so spak dɛn de kɔmɔt.

²⁰ Smok de kɔmɔt nain nosol dɛn, lɛk na gras de bɔn ɔnda pɔt na faya.

²¹ Di blo we i de blo nɔmɔ, kin mek kol kech, ɛn faya de kɔmɔ nain mɔt.

²² In nɛk so gɛt pawa dat we yu si am, yu mɔs fred.

²³ Di bif pat nain bɔdi gɛda gɛda i traŋa lɛk ayɛn.

²⁴ In at traŋa lɛk ston, lɛk di bɔtɔm grenin ston.

²⁵ We i tinap, di gɔd dɛnsɛf kin fred; we i go dɔŋ, dɛn kin fred te dɛn rɔnawe.

²⁶ I lɛk sɔd mit am, na fɔ natin, i lɛk na spia, javlin ɔ da shap tin lɛk nel we dɛn kin kɔl dat, ɔl na fɔ natin.

²⁷ Ayɛn na lɛk brumtik to am ɛn bras na lɛk rɔtin tik.

²⁸ I nɔ de fred aro; we dɛn sɛn ston pan am wit sliŋ, i kin tan lɛk brumtik.

²⁹ Dɛn tik we dɛn kin mek fɔ bit pɔsin tan lɛk brumtik to am, i kin laf we dɛn kin sɛn spia pan am.

³⁰ We i drɛg na pɔtɔpɔtɔ grɔn, di grɔn kin tan lɛk we katapila tit krep am.

³¹ I de mek di si de bwɛl lɛk pɔt na faya; i kin bwɛl lɛk we mɛrɛsin de na faya.

³² I kin mek di swɛlin dɛn shayn shayn biɛn am na di si; pɔsin go tink se na sop wata de na di si.

³³ Natin nɔ de na dis wɔl we tan lɛk am, na krichɔ we nɔ de fred natin.

³⁴ I tek am se natin nɔ de we pas am; in na di kiŋ fɔ ɔl di wayl animal dɛn.