Job 4 - Krio Fɔs Oli Baybul

Di Fɔs Tɔk We Dɛn Tɔk 4:1–14:22 Ɛlifaz

¹ Ɛlifaz we na Timanayt ansa:

² A op se yu nɔ go vɛks if a tɔk tu-tri tin. A nɔ go ebul fɔ de a nɔ tɔk natin.

³ Na tru se yu dɔn de tɛl pipul wetin fɔ du, Yu na pɔsin we gɛt ajo.

⁴ Di wɔd dɛn we yu de tɔk de mek udat wan giv ɔp, olɔp insɛf.

⁵ Naw we trɔbul mit yu, yu nɔ ebul bia; we na yu i mit, yu wan giv ɔp.

⁶ PAPA GƆD we yu de wɔship ɛn de biɛn tigi tigi wan, ɛn aw yu lib lɛk gud pɔsin ɔl di tɛm, du fɔ mek yu abop.

⁷ Tink gud, PAPA GƆD go mek udat de waka tret wit am sɔfa? Ɔ yu dɔn no pɔsin we gud dɔn trɔbul mek i rɔndɔŋ?

⁸ As a dɔn si, na udat bad we de fɔ mek trɔbul, trɔbul de mit

⁹ We PAPA GƆD blo nɔmɔ, dɛn de day, ɛn we i vɛks, i de dɔnawe wit dɛn kwik.

¹⁰ Dɛn kin tɔf lɛk we layɔn de mek nɔys bɔt PAPA GƆD de brok brok di yɔŋ wan dɛn tit.

¹¹ Di big layɔn de day bikɔs i nɔ gɛt ɔda animal fɔ kil it, di yɔŋ wan dɛn skata ɔlɔbɔt.

¹² “Wan wɔd pas na mi yes, i pas na mi yes kwayɛt wan.

¹³ We a kin tink bɔt di drim we a kin drim na nɛt we mɔtalman kin slip dip,

¹⁴ a fred ɛn kol kech mi tret, we mek a trimbul.

¹⁵ A fil briz de blo na mi fes mi ia tinap na mi bɔdi.

¹⁶ Sɔntin tinap ɛn nɔ de muf, bɔt a nɔ ebul si wetin. Sɔntin tinap frɔnt mi so ɛn di ples mek yeŋ, wantɛm a yɛri vɔys.

¹⁷ I nɔ pɔsibul fɔ ɔdinari mɔtalman fɔ klin na PAPA GƆD in yay? Ɔ lɛ in layf nɔ gɛt bɔt na PAPA GƆD in yay?

¹⁸ In wokman dɛnsɛf i nɔ trɔs, ɛn i kin si fɔlt pan in enjɛl dɛn;

¹⁹ bifo a se ɔdinari mɔtalman we na dɔti i tek mek am, we na dɔti i pul am, we PAPA GƆD kin kil lɛkɛ flay.

²⁰ I kin ɔrayt na mɔnin, bɔt bay ivintɛm, i dɔn day; bifo yu mekɔp, i dɔn day.

²¹ Na ɔda pɔsin go gɛt dɛn jɛntri we dɛn day ɛn wɛn dɛn day sɛf, dɛn stil nɔba ɔndastand wetin PAPA GƆD de du.