Job 39 - Krio Fɔs Oli Baybul

¹ “Yu no ustɛm got kin bɔn? Yu dɔn ɛva si we dia de bɔn?

² Yu no ɔmɔs mɔnt dɛn kin gɛt bɛlɛ fɔ, ɛn yu no di tɛm we dɛn fɔ bɔn,

³ ustɛm dɛn kin butu dɔŋ, bɔn dɛn pikin, ɛn dɛn pen dɔn?

⁴ Dɛn pikin dɛn trɔŋ ɛn fri fɔ du wetin dɛn want, dɛn go de fɔ dɛnsɛf ɛn nɔ go to dɛn mama we bɔn dɛn igen

⁵ “Udat mek dɛn bush dɔŋki dɛn fri? Udat gi dɛn fridɔm,

⁶ dɛn we a gi di ɛmti ples we pɔsin nɔ go ebul tap, ɛn di say we sɔl de plɛnti wan, fɔ tap?

⁷ I nɔ de yɛri di nɔys we de na dɛn siti dɛn, ɛn i nɔ de yɛri nɔbɔdi de ala pan am fɔ wok.

⁸ I si di wanol mawnten as ples fɔ am fɔ it, ɛn de it ɔltin we na grin lif.

⁹ Bush kaw go gri fɔ wok fɔ yu? I go de ol nɛt usay yu kin gi yu animal dɛn it?

¹⁰ Yu go ebul tek rop tay wan to da ayɛn we yu de tek dig fam ɛn mek i wok fɔ yu?

¹¹ Yu go se bikɔs i gɛt tumɔs trɛnk, yu lɛf yu ebi wok dɛn gi am?

¹² Yu biliv se i go kam bak wit yu rɛs we yu dɔn kɔt na di ples we dɛn kin mas mas rɛs?

¹³ “Da big bɔd we nem ɔstrich kin nak in fɛda dɛn wit gladi, bɔt i nɔ go ebul flay lɛk da bɔd we dɛn kin kɔl, kaw enjɛl.

¹⁴ Bikɔs i de lɛf in eg ɔnda grɔn lɛ di grɔn wam dɛn fɔ am;

¹⁵ I de fɔgɛt se fut kin brok dɛn, ɛn dɛn wayl animal dɛn kin mas dɛn.

¹⁶ I kin trit in pikin dɛn bad, lɛk se nɔto in bɔn dɛn; ɛn i nɔ bisin wetin apin bikɔs i nɔ bisin if ɔl in lebɔ go fɔ natin;

¹⁷ bikɔs PAPA GƆD nɔ gi am sɛns, i nɔ gi am we fɔ tink fɔ du bɛtɛ.

¹⁸ We ɔstrich grap fɔ rɔn, i kin laf pɔsin ɛn di ɔs we di pɔsin de rayd.

¹⁹ “Na yu gi ɔs trɛnk ɛn pawa? Na yu gi am da lɔŋ ia nain nɛk we sho se i gɛt trɛnk?

²⁰ Na yu mek i de jomp lɛk lokɔs? We i de blo nain nos sɛf kin mek pipul fred.

²¹ I de dig di grɔn wit in fut dɛn fɔ sho se i gɛt trɛnk; dɔn i rɔn wit spid go mit in ɛnimi dɛn na batul fil.

²² I nɔ de tink bɔt fred ɛn natin nɔ de pwɛl in at, so i nɔ de rɔnawe kɔmɔt na batul fil.

²³ Na pan am di lɛda bag fɔ wɛpɔn kin de mek nɔys, na pan am di spia ɛn di javlin kin de de glita.

²⁴ I kin de mago mago fɔ rɔn wit ful spid; as i yɛri di trɔmpɛt so, i kin jomp ɛn rɔn wit ful spid.

²⁵ Wɛn dɛn kin blo di trɔmpɛt, i kin se, “Nain dat!” I de mɛmba we dɛn kin go fɛt. I de mɛmba we di kɔmanda dɛn kin ala de kɔmand di sojaman dɛn.

²⁶ “Na yu sɛns mek ak de flay, de opin in fɛda dɛn we i de flay go na di sawt?

²⁷ Na yu kin tɛl di igul fɔ go ɔp di mawnten go bil in os?

²⁸ Na dɛn big big ston dɛn i tap, usay dɛn shap shap ay ston dɛn kin kɔba am.

²⁹ Na de i kin de de luk fɔ tin fɔ it; i kin dɔn si am fawe.

³⁰ In pikin dɛn de drink blɔd, ɛn na usay day tin de, i kin lɛk fɔ de.