Job 36 - Krio Fɔs Oli Baybul

¹ Ilaɛlu stil kɔntinyu de tɔk. I se:

² “Una bia wit mi lilibit mɔ mek a ɛksplen to una, bikɔs a gɛt sɔntin we a wan tɛl una fɔseka PAPA GƆD.

³ A go sho una aw a sabi plɛnti plɛnti tin, ɛn pruv to una se PAPA GƆD we mek mi, nɔ bɛn bɛn.

⁴ Una biliv mi se mi nɔto man we de lay: mi we una si so, a gɛt bɔku bɔku sɛns.

⁵ “Ɔlwe PAPA GƆD gɛt pawa so, i nɔ de luk nɔbɔdi lɛs; i gɛt pawa ɛn i no ɔltin.

⁶ I nɔ de mek bad pipul dɛn gɛt lɔŋ layf, bɔt i de mek shɔ se di po pipul dɛn gɛt dɛn rayt.

⁷ I bisin bɔt di wan dɛn we biliv am, i de trit dɛn lɛk se dɛn na kiŋ we sidɔm na tron, i de mek dɛn rɛspɛkt dɛn sote go.

⁸ If pipul dɛn we de jel de sɔfa fɔ wetin dɛn du,

⁹ i de sho dɛn wetin dɛn du, ɛn di we we dɛn kɔmit sin bikɔs dɛn prawd.

¹⁰ I de mek dɛn yɛri in wɔd usay i tɛl dɛn traŋa wan se, dɛn fɔ lɛf fɔ du bad.

¹¹ If dɛn yɛri wɔd ɛn tɔn to am, dɛn kin ɛnjɔy dɛn balans layf we lɛf, ɛn dɛn layf go swit te dɛn day.

¹² Bɔt if dɛn traŋayes, dɛn go day na wa, ɛn dɛn go day lɛk fulman.

¹³ “Na pɔsin we nɔ no PAPA GƆD lɛk fɔ de vɛks ɔltɛm; i lɛk i pɔnish dɛn, dɛn nɔ de ripɛnt.

¹⁴ Dɛn kin day yɔŋ, ɛn na shemful we dɛn kin day.

¹⁵ PAPA GƆD de mek pipul sɔfa so dɛn go lan sɛns, ɛn mek dɛn gɛt trɔbul so dat dɛn go lisin to am.

¹⁶ Igen, i de pul yu kɔmɔt pan trɔbul, ɛn kɛr yu go usay nɔbɔdi nɔ go ambɔg yu, usay yu go gɛt ɔl wetin yu want.

¹⁷ “Bɔt yu de gɛt di pɔnishmɛnt we wikɛd pipul dɛn kin gɛt, ɛn yu nɔ go ebul avɔyd di pɔnishmɛnt.

¹⁸ Tek tɛm lɛ mɔni nɔ mek yu fil se yu bɛtɛ pas ɔlman, ɛn nɔ mek braybri mek yu kɔrɔpt.

¹⁹ Yu mɔni go ebul pul yu kɔmɔt pan trɔbul? Yu trɛnk go ebul ɛp yu?

²⁰ Nɔ pre fɔ nɛt fɔ kam, na di tɛm we dɛn kin nyakanyaka pipul.

²¹ Tek tɛm mek yu maynd nɔ tɔn to ivul biznɛs, bikɔs, i luk lɛk na dat yu de pan we mek yu de sɔfa.

²² PAPA GƆD gɛt pawa ɛn nɔbɔdi nɔ de we sabi tich pɔsin lɛsin lɛk am.

²³ Udat dɔn ɛva tɛl PAPA GƆD wetin i fɔ du ɔ tɛl am se, ‘wetin yu du nɔ rayt’?

²⁴ “Yu fɔ mɛmba fɔ prez am fɔ wetin i de du, we pipul dɛn kin siŋ de prez am fɔ.

²⁵ Ɔlman dɔn si ɔl di tin dɛn we PAPA GƆD dɔn mek, bɔt na we dɛn de fa nɔmɔ, dɛn si am.

²⁶ A de tɛl yu, PAPA GƆD na gret PAPA GƆD, bɔt wi nɔ gri biliv am; nɔbɔdi nɔ go ebul no awlɔŋ i dɔn de.

²⁷ PAPA GƆD de drɔ smɔl smɔl wata kɔmɔt na grɔn go ɔp ɛn tɔn am to ren,

²⁸ we di klawd de sɛn kam dɔŋ pan mɔtalman, bɔku bɔku wan.

²⁹ Ɛnibɔdi ebul ɛksplen aw di klawd de skata, ɛn aw tɛnda de krak usay PAPA GƆD de?

³⁰ I de mek laytin de flash ɔl rawnd am, ɛn di si so ful, dat yu nɔ go ebul si ɔnda.

³¹ Na we ren de kam mek pipul gɛt tin fɔ it, i de gi dɛn plɛnti plɛnti it.

³² PAPA GƆD de ol di laytin insay in tu an ɛn di laytin de flash usay in tɛl am fɔ flash.

³³ Di tɛnda in nɔys de mek yu no se PAPA GƆD de, PAPA GƆD we na PAPA GƆD we nɔ lɛk sin.