Job 32 - Krio Fɔs Oli Baybul

Wetin Ilaɛlu Se 32:1–37:24

¹ Di tri man dɛn bin lɛf fɔ ansa Job bikɔs Job bin si insɛf se, i de waka tret wit PAPA GƆD.

² Nain Ilaɛlu, we na Barachɛl, da Buzayt we kɔmɔt na di Ram famili in pikin, vɛks. I vɛks pan Job bikɔs Job tɔk se in rayt, we min se PAPA GƆD rɔŋ;

³ i vɛks pan Job in tri padi dɛn bikɔs, ɔlwe dɛn se Job rɔŋ, dɛn nɔ ebul tɔk wetindu.

⁴ Ilaɛlu bin wet te ɔlman dɔn tɔk dɔn to Job bifo in tɔk, bikɔs, in bin smɔl pas dɛn ɔl.

⁵ So we i si se dɛn nɔ ebul tɔk wetin Job du, i vɛks.

⁶ Nain Ilaɛlu, we na da Buzayt we nem Barachɛl, in pikin ansa se: “una ɔl big pas mi, ɛn una dɔn ol; dat mek a bin de fred fɔ tɔk, fɔ tɛl una wetin mi tink.

⁷ A se, ‘lɛ una we big tɔk fɔs, ɛn una we dɔn ol, gi wi sɛns.

⁸ Bɔt na di spirit we de insay mɔtalman, dat na di Ɔlmayti in spirit, nain de mek i no tin prɔpa wan.

⁹ Nɔto te pɔsin ol i go gɛt sɛns, ɛn nɔto ol pipul dɛn nɔmɔ no wetin rayt.

¹⁰ So a de aks una fɔ lisin mi; mek misɛf tɛl una wetin a tink.’

¹¹ “A bin de wet mek una tɔk dɔn, a bin de lisin ɔl di sɛns we una bin de pul, we una bin de tink wetin fɔ se.

¹² Ɔl mi at bin de to una, ɛn a si se nɔn pan una nɔ ebul pruv se Job rɔŋ, ɔ ivin ansa am we i put in kes.

¹³ Una tek tɛm lɛ nɔn pan una nɔ fil se i gɛt sɛns; nɔto mɔtalman go ansa am o, na PAPA GƆD insɛf.

¹⁴ We Job bin de tɔk, i nɔ bin de tɔk to mi, ɛn mi nɔ bin fɔ ansa am di we we una ansa am.

¹⁵ “Dɛn nɔ de fil fayn ɛn dɛn nɔ no wetin fɔ se igen; dɛn nɔ ebul se wan wɔd.

¹⁶ So mi fɔ sidɔm de wet bikɔs dɛn nɔ gɛt wetin fɔ tɔk igen, bikɔs dɛn jɛs tinap de ɛn nɔ de se natin igen?

¹⁷ Misɛf go tɔk; a go se wetin a tink.

¹⁸ A gɛt plɛnti tin fɔ tɔk ɛn a nɔ ebul bia; pas a tɔk.

¹⁹ Una lisin, a dɔn rɛdi fɔ tɔk. Mi na lɛk wayn bag we nɔ ebul bia igen, bɔt dɔn rɛdi fɔ bɔs.

²⁰ A fɔ tɔk so mi at go kol; A fɔ opin mi mɔt ansa.

²¹ A nɔ go de fɔ nɔbɔdi, ɛn a nɔ go mek ipokrit to nɔbɔdi.

²² Mi nɔ sabi mek ipokrit to nɔbɔdi, bikɔs if a du dat, PAPA GƆD go kil mi.