Job 3 - Krio Fɔs Oli Baybul

Job Le Kɔmplen To PAPA GƆD

¹ Afta Job in padi dɛn dɔn sidɔm wit am fɔ sɛvin de ɛn sɛvin nɛt ɛn nɔ se natin, Job disayd fɔ tɔk ɛn i kɔs di de we i bin bɔn.

² I se:

³ a wish a nɔ bin bɔn, ɛn di nɛt we se, bɔypikin dɔn kam na yu bɛlɛ.

⁴ Lɛ da de de dak lɛk nɛt! Lɛ PAPA GƆD nɔ mɛmba da de de igen, ɛn lɛ i nɔ mek layt shayn da de de.

⁵ Lɛ da de de tɔn to daknɛt. Lɛ klawd kɔba am; lɛ di dak we i dak mek pipul fred am.

⁶ Lɛ tik tik daknɛs kɔba am! Lɛ i nɔ gladi se in na wan pan di de dɛn na di ia, lɛ dɛn nɔ kɔnt am sɛf pan di de dɛn na di mɔnt.

⁷ Lɛ ɔda pɔsin nɔ bɔn da sem de de; lɛ dɛn nɔ gi ɛnibɔdi jɔy da de de.

⁸ Lɛ udat wan swɛ da de de, swɛ am, dɛn wan dɛn we ebul mek Lɛviatan grap fɔ kɔz avɔk.

⁹ Lɛ di sta dɛn we kin shayn na mɔnin lɔs; lɛ di abop we i de abop se do de klin, bi fɔ natin,

¹⁰ bikɔs na di nɛt mi mama tek mi bɛlɛ ɛn bɔn mi fɔ si trɔbul.

¹¹ Wetin mek a nɔ day as dɛn bɔn mi?

¹² A wish nɔbɔdi nɔ bin tot mi nain fut ɔ gi mi bɔbi fɔ sɔk.

¹³ Da tɛm de aw a kam, na so a bin fɔ go bak; a bin fɔ day kwayɛt wan ɛn gɛt bloblo,

¹⁴ wit kiŋ dɛn ɛn ɔda bigman dɛn we bin de na wɔl, we bin dɔn bil big big os fɔ dɛnsɛf,

¹⁵ ɔ a bin fɔ de wit dɛn bigman dɛn we bin gɛt gold, ɛn ful os wit silva.

¹⁶ Ɔ wetindu a nɔ bin day na mi mama in bɛlɛ lɛk bebi we nɔ si di wɔl wande?

¹⁷ Na di grev, badman nɔ de du bad igen, ɛn udat taya de blo fɔ wok.

¹⁸ Na de ivin dɛn jelman go gɛt pis; dɛn wɔda nɔ go de ala pan dɛn igen fɔ wok.

¹⁹ Na de yu go fɛn di wan we femɔs ɛn di wan we nɔbɔdi nɔ no, di slev nɔ go gɛt pɔsin fɔ bi bɔs oba am igen

²⁰ Wetin mek PAPA GƆD fɔ lɛ pipul liv ɛn sɔfa ɛn ivin dɛn layf nɔ swit,

²¹ we de pre fɔ day bɔt day nɔ de kam, na so dɛn kin de fɛn di day lɛk tri kɔpɔ silva;

²² na so dɛn kin gladi we dɛn fɛn day ɛn kin smayl na dɛn kɔfin

²³ Wetin mek man de bɔn kam na wɔl we i nɔ no wetin de bi to am, we na PAPA GƆD de du wetin in wan du?

²⁴ Na pini dɔn tɔn mi it ɛn di kray we a de kray kin ful ɔmɔs bokit wata.

²⁵ Di tin we a de fred, nain dɔn bi to mi so, ɛn na di tin we a de fred pas di day we go kil mi, dɔn bi so to mi.

²⁶ Mi at ebi ɛn a nɔ ebul bia; a nɔ gɛt kolat ɛn na soso waala de mit mi.”