Job 28 - Krio Fɔs Oli Baybul

Dɛn Tɔk Gud Bɔt Bɔku Sɛns

¹ “Fɔ tru, ples de fɔ dig fɔ fɛn silva, ɛn ples de we dɛn kin klin gold.

² Ayɛn de kɔmɔt ɔnda grɔn, ɛn dɛn kin mɛlt kɔpa kɔmɔt pan di ayɛn dɔti.

³ Mɔtalman sach di dak dak ples, ɛn luk bɔtɔm bɔtɔm di grɔn fɔ ayɛn dɔti na di dak dak ples bɔtɔm bɔtɔm di grɔn.

⁴ Dɛn mek ɔndamayn dɛn fafawe usay pipul dɛn nɔ tap; pipul dɛn we de travul na da rod de sɛf nɔ no se dɛn de ɔnda de, na rop dɛn kin tek go dɔŋ na da fa fa ples de.

⁵ Fɔ di grɔn yon, tin dɛn fɔ it de gro de; bɔt ɔnda de in tan lɛk we faya mek ɔltin tɔn ɔpsay dɔŋ.

⁶ Na di ston dɛn yu go fɛn dayamɔn, ɛn gold insay di dɔti.

⁷ “Nɔn bɔd we de it tin we gɛt layf nɔ no de de, ɛn nɔn falkɔn in yay nɔ si de yet.

⁸ Di prawd animal dɛn nɔ waka pantap de yet; layɔn sɛf nɔ waka pas de yet.

⁹ Mɔtalman de brok traŋa traŋa ston fɔ fɛn ayɛn dɔti, ɛn de dig go insay bɔtɔm dɛn il.

¹⁰ Dɛn de dig rod insay big big ston dɛn, ɛn kin fɛn dɛn gold ɛn dayamɔn.

¹¹ Dɛn mek traŋa traŋa dam we nɔ de bɔs, ɛn mek ɔlman si ɔl wetin dɛn nɔ si wande.

¹² “Usay pɔsin go ebul fɛn bɔku bɔku sɛns? Ɛn usay pɔsin go fɛn bɛtɛ lanin?

¹³ Mɔtalman nɔ no di rod fɔ go de, ɛn i nɔ de na dis wɔl.

¹⁴ Bɔtɔm bɔtɔm di si se, ‘i nɔ de insay mi,’ di si se, ‘i nɔ de to mi.’

¹⁵ Gold nɔ du fɔ pe fɔ am, ɛn nɔn amawnt ɔf silva nɔ du fɔ kɔmpia wit am.

¹⁶ Gold nɔ du fɔ tek kɔmpia wit am, dayamɔn sɛf nɔ du.

¹⁷ Gold ɛn glas nɔ nia am, ɛn di ay ay karat gold chen sɛf nɔ du fɔ gi fɔ gɛt am.

¹⁸ Nɔn mɛzhɔmɛnt nɔ de we dɛn go mɛzhɔ miniral ɔnda wata we go rich am; bikɔs di prayz fɔ bɔku sɛns pas dayamɔn.

¹⁹ Yu nɔ go kɔmpia am wit di Topaz we de na Itiopia, ɛn di valyu fɔ piɔ gold sɛf nɔ rich am.

²⁰ “Wɛl, usay bɔku bɔku sɛns kɔmɔt? Ɛn usay bɔku bɔku lanin de?

²¹ Na tin we ayd pan ɔltin we gɛt layf, ɛn i ayd pan dɛn bɔd we de flay na di klawd.

²² Ɔndawɔl ɛn day se, ‘Wi dɔn yɛri yus bɔt am.’

²³ “PAPA GƆD no di rod fɔ go de, ɛn i no usay i de.

²⁴ Bikɔs i de si usay di ath tap, ɛn i de si ɔltin we de na dis wɔl.

²⁵ We i gi di briz in trɛnk ɛn gi ɔl watasay ɔmɔs wata i fɔ gɛt;

²⁶ we i tɔk se ren fɔ fɔdɔm ɛn mek rod fɔ tɛnda ɛn laytin,

²⁷ nain i si ɔltin ɛn se ɔltin fayn; we i dɔn luk ɔltin dɔn, i si se i gud fɔ gɛt bɔku bɔku sɛns.

²⁸ Nain i tɛl mɔtalman se, una no tide se, fɔ fred PAPA GƆD nain na bɔku bɔku sɛns, ɛn fɔ kɔmɔt biɛn setan biznɛs, na bɔku bɔku lanin.”