Job 24 - Krio Fɔs Oli Baybul

¹ Wetindu PAPA GƆD nɔ go pik tɛm fɔ jɔj wikɛd pipul, ɛn wetin mek i nɔ go mek di wan dɛn we de sav am, si we i de jɔj dɛn?

² Pipul dɛn de shub bekin na land; dɛn de tif dɛn kɔmpin ship ɛn mɛn dɛn.

³ Dɛn de tif pikin we in papa dɔn day, in dɔŋki; ɛn de tek uman we in man dɔn day in kaw, fɔ lɛn am mɔni.

⁴ Dɛn push poman kɔmɔt na rod; ɔl di poman dɛn na di wɔl de ayd.

⁵ Lɛk dɛn bush dɔŋki dɛn na di ɛmti ples we pɔsin nɔ go ebul tap, di poman de go fɛn dɛn an-to-mɔt, dɛn de luk fɔ tin fɔ it na di dray ples, tin we dɛn pikin dɛn go it.

⁶ Adship mek dɛn de fɛn tin fɔ it na pipul fam ɛn de pik di af af tin dɛn we kin lɛf we wikɛd pipul dɛn dɔn avɛst.

⁷ Dɛn de slip nekɛd bikɔs dɛn nɔ gɛt klos.

⁸ Kol mawnten ren de bit dɛn, ɛn dɛn kin grip bi big ston fɔ wam dɛn bɔdi bikɔs dɛn nɔ gɛ os.

⁹ (Di wan dɛn de we de siz pikin na bɔbi we dɛn papa dɔn day, ɛn de ol pikin fɔ lɛnt dɛn pipul dɛn mɔni.)

¹⁰ Dɛn de wɔndrin ɔp ɛn dɔŋ nekɛd skin; dɛn de tot pipul dɛn rɛs wit aŋri bɛlɛ;

¹¹ dɛn de nia di wikɛd pipul dɛn ɔliv tik dɛn de kwis ɔyl kɔmɔ pan di frut; dɛn de kwis wayn kɔmɔt pan greps, bɔt tɔsti de kil dɛn.

¹² Insay di siti, pipul dɛn we wund ɛn de day, de pini, di wan we wund de kray mek dɛn ɛp am, bɔt PAPA GƆD nɔ de braskitul dɛn.

¹³ Pipul dɛn de we et di layt, we nɔ no wetin i tinap fɔ ɛn nɔ de waka nain rod.

¹⁴ Di mɔdra de grap na nɛt so dat i go go kil po pipul we nɔ gɛt natin; dɛn na lɛk tifman na nɛt.

¹⁵ Di pɔsin we de lɛf in man ɔ wɛf go to ɔda pɔsin, kin wet fɔ nɛt, ɛn kin se nɔbɔdi nɔ de si am; i kin kɔba in fes mek dɛn nɔ no se na im.

¹⁶ Na nɛt, dɛn de bɔs pipul os go insay; santɛm, dɛn kin ayd na os; dɛn nɔ no aw santɛm tan.

¹⁷ Na nɛt na dɛn yon santɛm; bikɔs dɛn ɛn nɛt na padi. Dɛn nɔ de fred natin.

¹⁸ Yu se we sɔntin apin, i izi lɛ wikɛd pipul sɔfa; PAPA GƆD dɔn swɛ dɛn land; treda dɛn nɔ de go bay na dɛn fam.

¹⁹ Lɛk we ɔt ples kin swɛla ren wata, na so di ples we pipul kin wet fɔ jɔjmɛnt kin swɛla dɛn sina dɛn.

²⁰ Dɛn mama dɛnsɛf we bɔn dɛn, dɔn fɔgɛt bɔt dɛn; dɛn nɔ de mɛmba dɛn nem dɛnsɛf; so wikɛdnɛs kin nyamanyama lɛk we tik brok.

²¹ Dɛn kin tek tin dɛn na uman we nɔ de bɔn, in an, ɛn nɔ de du gud to uman we i man dɔn day.

²² Pan ɔl dat, PAPA GƆD de gi pipul dɛn we gɛt pawa, lɔŋ layf; ɛn kin tinap fɔ dɛn we dɛn at pwɛl na layf.

²³ I de kɔba dɛn ɛn sɔpɔt dɛn, ɛn de si ɔl wetin dɛn de du.

²⁴ Dɛn kin shek tel fɔ shɔt tɛm nɔmɔ, dɔn dɛn day; dɛn kin day go lɛk gras, lɛk rɛs ed we dɛn kɔt put dɔŋ.

²⁵ If nɔto tru a tɔk, lɛ sɔmbɔdi tɛl mi se na lay a lay; lɛ i pruv se na nɔnsɛns tɔk a tɔk.