Job 21 - Krio Fɔs Oli Baybul

Job

¹ Job ansa se;

² Una tek tɛm lisin wetin a de se, ɛn na dɛn kayn we ya una fɔ koks mi.

³ Una peshɛnt wet lɛ a tɔk dɔn, datɛnde, una kin kɔntinyu de provok mi.

⁴ Na mɔtalman a de kɔmplen bɔt? A gɛt rayt fɔ vɛks?

⁵ Tink bɔt di we we PAPA GƆD trit mi, datɛnde, una go jɛs sɛt una mɔt.

⁶ We a kin mɛmba, mi at kin pwɛl, a kin bigin trimbul.

⁷ Wetindu wikɛd pipul dɛn kin te na wɔl? Gɛt lɔŋ layf ɛn pawa.

⁸ Dɛn kin liv lɔŋ fɔ si dɛn pikin dɛn tɔn bigman ɛn uman, dɛn kin si dɛn grampikin dɛn ɔl.

⁹ Dɛn nɔ gɛt natin fɔ fred we dɛn de na dɛn os dɛn, ɛn PAPA GƆD nɔ de pɔnish dɛn.

¹⁰ We di man kaw dɛn trɛd di kaw dɛm, dɛn de bɔn; dɛn nɔ de miskari.

¹¹ Dɛn pikin dɛn ɔl kin de togɛda, ɛn dɛn kin ɛnjɔy dɛnsɛf.

¹² Dɛn kin bit bata ɛn ple ap we dɛn de siŋ ɛn kin gladi mɔ we dɛn kin yɛri trɔmpɛt.

¹³ Dɛn kin gɛt ɔltin we dɛn want te dɛn day, ɛn kin day wit kolat go usay dɛn dayman de wet jɔjmɛnt.

¹⁴ Dɛn kin tɛl PAPA GƆD se lɛ i lɛf dɛn aw dɛn de so, dɛn nɔ wan no bɔt am.

¹⁵ Udat na PAPA GƆD we wi fɔ sav am? Wetin wi go prɔfit if wi pre to am.

¹⁶ Dɛn biliv se ɔlman in bɛtɛ wande nain an. Mi nɔ biliv da kayn tin de we wikɛd pipul dɛn biliv.

¹⁷ Ɔmɔs tɛm yu dɔn yɛri se wikɛd pɔsin jɛs day so? Ɔ wahala mit dɛn? Ɔ PAPA GƆD vɛks pɔnish wikɛd pɔsin?

¹⁸ Dɛn tan lɛk brumtik na briz, ɛn lɛk chaf chaf we big briz kin blo kɛr go.

¹⁹ Una se PAPA GƆD go pɔnish dɛn pikin dɛn fɔ wetin dɛn du. Lɛ i pɔnish dɛnsɛf lɛ dɛn no se nain pɔnish dɛn.

²⁰ Lɛ dɛnsɛf sɔfa dɛn pɔnishmɛnt ɛn lɛ dɛn tes wetin kin bi we PAPA GƆD vɛks.

²¹ Wans pɔsin dɔn day, i nɔ no natin bɔt in famili igen; dɛn it o, dɛn nɔ it o, i nɔ go no.

²² Ɛnibɔdi go ebul tich PAPA GƆD, in we de jɔj dɛn big ɛn pawaful pipul dɛn?

²³ Sɔm pipul dɛn de day wit wɛl bɔdi bikɔs dɛn bin gɛt kol at,

²⁴ dɛn bɔdi kin fat so, di bif we de insay in bon kin gɛt ɔyl.

²⁵ Ɔda wan dɛn kin day wit brok at; dɛn nɔ ɛva ɛnjɔy na layf.

²⁶ Na dɔti dɛn ɔl kin go ɛn na di sem tumbu kin it dɛn.

²⁷ A no wetin una de tink, ɛn a no di plan we una gɛt fɔ du mi bad.

²⁸ Bikɔs una de aks se usay dɛn pipul we gɛt pawa de? Dɛn wikɛd pipul dɛn.

²⁹ Una nɔ dɔn aks pipul dɛn we de travul bay rod ɛn una nɔ biliv wetin dɛn tɛl una,

³⁰ se, natin nɔ kin du wikɛd pɔsin we trɔbul kin fɔdɔm ɛn PAPA GƆD kin kɔba dɛn we i vɛks pɔnish pipul dɛn?

³¹ Udat gɛt maynd fɔ tɛl am bɔt wetin i du ɛn udat gɛt maynd fɔ tɔn am gi am bak.

³² We dɛn bɛr wikɛd pɔsin nain grev, pipul dɛn kin de gyad am.

³³ Di dɔti we dɛn tek kɔba am kin swit to am; ɔlman gɛt fɔ day lɛk am, ɛn di wan dɛn we dɔn day bifo am, plɛnti te yu nɔ go ebul kɔnt.

³⁴ Aw naw una de kam koks mi wit ɛmti nɔnsɛns tɔk? Nɔn we nɔ de we una go ansa mi pas una lay.