Job 2 - Krio Fɔs Oli Baybul

Setan Tɛst Job Bak

¹ Wan ɔda de, PAPA GƆD in pikin dɛn go sho dɛnsɛf to am. Setan insɛf bin de de.

² PAPA GƆD aks Setan usay i kɔmɔt. I tɛl PAPA GƆD se in bin jɛs de waka ɔp ɛn dɔŋ de paspas na wɔl.

³ PAPA GƆD aks am if i dɔn tink bɔt Job we nain wokman. PAPA GƆD tɛl Setan se, nɔbɔdi nɔ de na wɔl lɛk Job, bikɔs na gud man ɛn i de waka tret wit in PAPA GƆD. I fred ɛn rɛspɛkt in PAPA GƆD ɛn in layf nɔ gɛt wan bɔt. PAPA GƆD se pan ɔl we Setan mek in gri mek i atak Job fɔ natin, Job stil de waka tret wit in PAPA GƆD.

⁴ Setan se pɔsin kin du ɛnitin fɔ mek i nɔ day.

⁵ I se if PAPA GƆD go jɛs tret in an ɛn mek i sik, i mɔs kɔs am nain fes.

⁶ PAPA GƆD tɛl an se, i kin du wetin i want bɔt i nɔ fɔ kil Job.

⁷ So Setan kɔmɔt bifo PAPA GƆD ɛn go ib sik pan Job; sofut kɔba in wanol bɔdi frɔm ed to fut.

⁸ Job tek broko kle pɔt fɔ de krep in bɔdi ɛn i sidɔm na ashis.

⁹ In wɛf aks am se, wit ɔl wetin dɔn bi, i stil de mek se in de waka tret wit PAPA GƆD. I se if Job nɔ go kɔs PAPA GƆD wantɛm ɛn day.

¹⁰ Job tɛl am se i de tɔk lɛk udat nɔ no PAPA GƆD. I se if dɛn fɔ gladi we PAPA GƆD du gud fɔ dɛn bɔt kɔmplen we bad tin bi to dɛn.

Job In Padi Dɛn Go Fɛn Am

¹¹ Ɛlifaz we na Timanayt, Bildad we na Shuayt ɛn Zofa we na Neamathayt we na Job in tri padi, yɛri wetin bi ɛn kɔmɔt na dɛn difrɛn siti dɛn fɔ kam fɛn am. Dɛn mek bagin fɔ mit de di sem tɛm fɔ go kɔrej am.

¹² We dɛn si am wɛn dɛn bin de fa, dɛn nɔ bin no se na im; bɔt wɛn dɛn luk am gud we dɛn rich nia am, dɛnsɛf bigin ala de kray; dɛnsɛf chɛr dɛn klos ɛn ib dɔti na dɛn ed.

¹³ Dɔn, dɛn sidɔm na grɔn wit am fɔ sɛvin de ɛn sɛvin nɛt, bɔt nɔ se natin to am bikɔs dɛn si aw i bin de sɔfa.