Job 19 - Krio Fɔs Oli Baybul

Job

¹ Job ansa am se:

² Aw lɔŋ una go tɔmɛnt mi ɛn nyakanyaka mi wit wetin una de se?

³ Una jɛs sidɔm de kɔs kɔs mi frɔm aw lɔŋ; una nɔ de shem fɔ jɛs de kɔs mi?

⁴ Ivin if na tru se a du sɔntin bad, na misɛf a du.

⁵ If de lɛk tide, una de mek big pan mi, ɛn de agyu wit mi se na mi kɔz mi disgres,

⁶ no se na PAPA GƆD mek ɔl dis de apin; i dɔn kech mi nain trap.

⁷ Ɔl we a de ala se dɛn de kil mi, nɔbɔdi nɔ ansa mi; a ala te, bɔt nɔbɔdi nɔ fɛt fɔ mi.

⁸ I dɔn blɔk mi so dat a nɔ go ebul du natin, i dɔn mek ɔlsay blɔk pan mi.

⁹ I dɔn mek a dɔn lɔs ɔl di jɛntri we a bin gɛt; ɔl mi rɛspɛkt dɔn dɔn.

¹⁰ I dɔn mi kpatakpata; ɔltin we a abop pan dɔn rut kɔmɔt lɛk we dɛn kin rut tik.

¹¹ I dɔn mek wamat pan mi ɛn na mi i tek mek ɛnimi.

¹² I sɛn in sojaman dɛn fɔ kam atak mi; dɛn dig gɔta fɔ ebul pas kam mit mi, ɛn le ambush rawnd mi os.

¹³ I dɔn mek mi brɔda dɛn ɔl dɔn shub fa frɔm mi, ɛn mi padi dɛn nɔ want mi biznɛs igen

¹⁴ Di wan dɛn we mi ɛn dɛn kɔmɔt di sem fambul, dɔn kɔmɔt biɛn mi;

¹⁵ di trenja dɛn we de na mi os dɔn fɔgɛt bɔt mi; mi wokuman dɛn na mi os de trit mi lɛk trenja; dɛn si mi lɛk pɔsin we dɛn nɔ no wande

¹⁶ Mi yon wokman nɔ gri ansa mi we a kɔl am; pas a opin mɔt beg am.

¹⁷ Mi wɛf nɔ ebul bia mi stɛnch mi yon bɛlɛ bɔn brɔda dɛn nɔ ebul bia mi.

¹⁸ Ivin dɛn lili pikin dɛn de laf mi; ɛnisay a go, dɛn de drɛb mi.

¹⁹ Mi tayt padi dɛn nɔ want natin fɔ du wit mi, di wan dɛn we a bin lɛk dɔn tɔn pan mi.

²⁰ Mi bon dɛn dɔn fasin na mi kanda ɛn mi flɛsh, ɛn lilibit mɔ, a bin fɔ day.

²¹ Una sɔri fɔ mi, mi padi dɛn, una sɔri fɔ mi, bikɔs na PAPA GƆD in an dɔn wap mi dɔŋ.

²² Wetindu una de biev lɛk PAPA GƆD fɔ de fasin mi? I nɔ du we una provok mi?

²³ A wish pɔsin bin de rayt ɔl wetin a de tɔk so! A wish dɛn bin de rayt am na buk!

²⁴ A wish dɛn bin tek chisul de rayt am na ston we go de sote go.

²⁵ Bikɔs a no se di wan we go pe fɔ mi, de; i nɔ day, a no se di de go kam we i go tinap fɔ mi na dis wɔl;

²⁶ ɛn we mi kanda go dɔn pwɛl, a go si PAPA GƆD insay dis bɔdi,

²⁷ we go tinap fɔ mi ɛn na im semwan a go si, nɔto ɔda wan. A dɔn fred!

²⁸ If yu se aw wi go ebul du am bad! Ɛn nainsɛf kɔz in prɔblɛm!

²⁹ Una rɛdi fɔ di sɔd, bikɔs sin de mek PAPA GƆD vɛks ɛn pɔnish pɔsin, so dat yu go no se, pɔnishmɛnt de fɔ sin.