Job 18 - Krio Fɔs Oli Baybul

Bildad

¹ Bildad we na Shuayt ansa Job se:

² Ustɛm yu go lɛf fɔ tɔk tɔk? We yu lɛf fɔ tɔk tɔk, datɛnde wi go tɔk.

³ Wetindu yu de trit wi lɛk wi ful lɛk kaw? Wetindu yu de si wi lɛk fulman dɛn?

⁴ Na we yu vɛks te yu ambɔg yusɛf pipul dɛn fɔ kɔmɔt lɛf di wɔl fɔ seka yu, adinɔ PAPA GƆD fɔ brok ɔl dɛn il fɔ mek yu at kol?

⁵ I lɛk wetin yu tink, wikɛd pipul dɛn kyandul kin ɔt, ɛn dɛn layt nɔ go shayn.

⁶ I go tan lɛk os we layt nɔ de, ɛn di lamp we yu de tek rid ɔl go ɔt.

⁷ I go lɔs kɔnfidɛns na layf ɛn nain yon plan dɛn kin kɔz in dawnfɔl.

⁸ Nain yon fut i go tek waka go insay trap, ɛn di trap go ol am tayt.

⁹ Di trap go ol in bak fut ɛn di trap go ol am tayt.

¹⁰ Dɛn go tay slipul nɔt wit rop put na grɔn fɔ am, dɛn go put trap na rod fɔ am.

¹¹ Ɔltɛm bad bad tin dɛn de skyad am, dɛn de rɔnata am ɛnisay i go.

¹² Aŋri dɔn dɔn ɔl in trɛnk, ɛn wahala rɛdi fɔ mit am ɛni tɛm.

¹³ Na sik go pwɛl in bɔdi, ɛn na bad bad infɛkshɔn go it ɔl in an ɛn fut.

¹⁴ Day go pul am kɔmɔt nain os we i bin biliv, ɛn kɛr am go na grev.

¹⁵ Ɛnibɔdi kin tap nain os; dɛn sprinkul sɔlfa nain os fɔ pul di infɛkshɔn kɔmɔt de.

¹⁶ I go tan lɛk tik we in rut ɔl dray ɔnda am, ɛn in branch dɛn ɔl wida wida.

¹⁷ Nɔbɔdi nɔ go mɛmba am igen na dis wɔl, ɛn in nem sɛf dɛn nɔ go kɔl na trit.

¹⁸ Dɛn gɛda am kɔmɔt na layt ɛn ib am na dak ɛn drɛb am kɔmɔt na dis wɔl.

¹⁹ I nɔ bɔn nɔn pikin ɛn nɔ gɛt nɔn in blɔd we i day lɛf, ɛn i nɔ day lɛf nɔbɔdi usay i bin de.

²⁰ Di pipul dɛn na di wɛst fred, ɛn di pipul dɛn na di ist trimbul we dɛn yɛri bɔt am.

²¹ Fɔ tru, na so i kin bi wit pipul dɛn we nɔ biliv PAPA GƆD, na so pipul dɛn we nɔ no PAPA GƆD kin ɛnd.