Job 16 - Krio Fɔs Oli Baybul

Job

¹ Job ansa se:

² “A dɔn yɛri dɛn kayn tɔk de plɛnti plɛnti; una nɔn nɔ sabi koks pɔsin.

³ Dis mɔnɔmɔnɔ tɔk nɔ go dɔn naw? Wetin de push una fɔ tɔk dɛn kayn we ya?

⁴ Misɛf sabi tɔk so lɛk una, if na una bin de di we we a de so; misɛf ebul fɛn fɔlt pan una, ɛn shek mi ed se a de sɔri fɔ una.

⁵ A ebul tɔk to una mek una fil fayn, ɛn wetin a go tɛl una, go mek una fil se una nɔ de sɔfa igen

⁶ I lɛk a tɔk te, tɔk nɔ go mek di sɔfa we a de sɔfa dɔn, ɛn if a se a de bia, dat sɛf nɔ go ɛp mi.

⁷ Fɔ tru, PAPA GƆD dɔn mek a fil yuslɛs: I dɔn kil mi wanol famili.

⁸ Ɛn i dɔn mek a dɔn twis twis, we de sho se mi na sina; I mek a ridyus to bon bon, dat sɛf de sho na mi fes.

⁹ I chɛr chɛr mi lɛk aw dɛn wayl animal kin chɛr chɛr bif we dɛn kin kech, i et mi; i de luk mi lɛk i et mi; i de luk mi at at wan.

¹⁰ Pipul dɛn dɔn opin mɔt wit wɔnda we dɛn si mi, ɛn slap mi jɔ fɔ provok mi, ɛn gɛda rawnd mi fɔ atak mi.

¹¹ PAPA GƆD gi mi to dɛn bad pipul dɛn, ɛn shub mi gi dɛn wikɛd pipul dɛn.

¹² A bin de fayn fayn wan, nain PAPA GƆD kam nyakanyaka mi; I ol mi bay mi nɛk ɛn wap mi mek a skata; I tek mi mek tagɛt fɔ shut,

¹³ In man dɛn we de shut bo ɛn aro de rawnd mi, I chɛr mi kidni dɛn opin, ɛn nɔ sɔri fɔ mi; ɔl mi bita bita kɔmɔt insay mi bɛlɛ go na grɔn.

¹⁴ I wund wund mi bɔdi; I atak mi lɛk sojaman we dɔn vɛks pan in ɛnimi.

¹⁵ Na munin klos go bi mi sɛkɛn bɔdi, a dɔn giv ɔp ɛn nɔ ebul du natin igen

¹⁶ A dɔn kray te mi fes dɔn rɛd, mi yay kɔba ɛn a nɔ de si bɛtɛ;

¹⁷ ɔl we a nɔ du natin we go pwɛl mi prea.

¹⁸ Lɛ ɔl wetin a de sɔfa so nɔ ayd, ɛn mek a nɔ taya fɔ de kɔmplen.

¹⁹ We a de tɔk so, mi witnɛs de na Ɛvin, ɛn di wan we de tɔk fɔ mi de ɔp de.

²⁰ Mi padi dɛn de laf mi ɛn na so a de kray to PAPA GƆD,

²¹ lɛ i gi mɔtalman in rayt fɔ de wit PAPA GƆD jɛs lɛk aw neba de to neba.

²² Bikɔs i nɔ go te igen, a go go bak usay a kɔmɔt.