Job 15 - Krio Fɔs Oli Baybul

Di Sɛkɛn Tɛm We Dɛn Tɔk ( 15:1–21:34 ) Ɛlifaz

¹ Nain Ɛlifaz we na Timanayt ansa am se;

² Pɔsin we gɛt sɛns go ansa tɔk we nɔ mek sɛns? I nɔ go opin in mɔt de tɔk fɔ natin.

³ I fɔ agyu fɔ tɔk we nɔ mek sɛns, ɔ tɔk tɔk we nɔ go min natin?

⁴ Yu de fɔgɛt bɔt di fred we yu fɔ fred PAPA GƆD, ɛn de pwɛl ɔl di pre we pipul de pre to PAPA GƆD.

⁵ Na di bad tin dɛn we de insay yu de kɔmɔt na yu mɔt, ɛn yu de tek sɛns tɔk dɛn.

⁶ Nɔto mi kɔndɛm yu o, na yu yon mɔt kɔndɛm yu; di wɔd we de kɔmɔt na yu mɔt sho se yu gilti.

⁷ Na yu na di fɔs pɔsin we PAPA GƆD put na dis wɔl? Adinɔ yu bin dɔn de ya bifo dɛn il dɛn.

⁸ Yu dɔn yɛri PAPA GƆD in wɔd? Adinɔ yu min se yu gɛt sɛns pas ɔlman.

⁹ Wetin de we yu no we wi nɔ no? Wetin de we yu ɔndastand we nɔ klia to wi?

¹⁰ Wi gɛt pipul dɛn we gɛt sɛns ɛn dɛn wan dɛn we dɔn ol, wit wi; dɛn olpas yu papa.

¹¹ Di koks we PAPA GƆD de koks yu nɔ du fɔ yu? Adinɔ di fayn we, we wi de tɔk to yu, nɔ du fɔ yu?

¹² Wetindu yu de mek yu at lay gi yu, ɛn wetindu yu de mek yu fes so,

¹³ we mek yu de vɛks pan PAPA GƆD te wɔd lɛkɛ dɛnwandɛnde, de kɔmɔt na yu mɔt?

¹⁴ Udat na mɔtalman we yu go se klin na PAPA GƆD yay, ɔ udat we uman bɔn kam na dis wɔl, we yu go se nɔ de du bad?

¹⁵ PAPA GƆD nɔ biliv nɔn pan di wan dɛn we de wok fɔ am, di wan dɛnsɛf we de na di ɛvin dɛn, nɔ klin nain yay;

¹⁶ bifo a se di wan dɛn we dɛn no fɔ wikɛdnɛs ɛn kɔrɔpshɔn, we de du bad lɛk we pɔsin de drink wata.

¹⁷ “A go sho yu, lisin mi, ɛn a go tɛl yu ɔl wetin a no bɔt layf,

¹⁸ (wetin dɛn pipul we gɛt bɔku sɛns bin de se we dɛn fɔstɛmpapa dɛn nɔ ayd pan dɛn,

¹⁹ We na dɛn nɔmɔ dɛn gi di land ɛn nɔn trenja nɔ de wit dɛn).

²⁰ Wikɛd pipul dɛn de rol wit pen ol de, ɔl dɛn layf, te di tɛm rich we pɔsin we nɔ de fred fɔ du bad, fɔ day.

²¹ I de yɛri tin dɛn we de mek i fred bad bad wan; we i de ɛnjɔy insɛf, nain tifman dɛn go go atak am.

²² I nɔ biliv se in go ebul kɔmɔt pan da kayn layf de igen, ɛn de fred se dɛn go kil am.

²³ I de waka ɔp ɛn dɔŋ de fɛn it, ɛn de aks se lɛ dɛn gi am. I no se in layf nɔ lɔŋ igen;

²⁴ pwɛl at ɛn brok at de mek i fred; dɛn de mɔna am lɛk wan pawaful kiŋ we de rɛdi fɔ go fɛt.

²⁵ Bikɔs i nɔ de wit PAPA GƆD, ɛn nɔ yɛri di Ɔlmayti in wɔd,

²⁶ i sidɔm de mek prawd ɛn stɔbɔn agens PAPA GƆD, ɛn ol big shild nain an,

²⁷ bikɔs in fes dɔn frɛsh ɛn i dɔn pul flɛsh nain sayd dɛn,

²⁸ ɛn i dɔn de na siti we nɔbɔdi nɔ de, insay os dɛn we nɔ fit fɔ pɔsin fɔ tap, we i dɔn mak se dɛn go nyakanyaka;

²⁹ i nɔ go gɛt fɔ lɔŋ, in jɛntri nɔ go las ɛn in jɛntri nɔ go go ɔlsay na di land;

³⁰ i nɔ go ebul kɔmɔt na daknɛs ɛn ɔl wetin i abop pan nɔ go bɛtɛ, ɛn ɔl wetin i gɛda, go kɔmɔt nain an go fufafu.

³¹ Lɛ i nɔ put in at pan tin we nɔ go bɛnifit am; i go de lay gi insɛf; bikɔs dat nɔ go bɛnifit am.

³² PAPA GƆD go pe am we di tɛm rich; i go so bɔku dat ɔlsay nain layf go gɛt.

³³ Dɛn go tan lɛk branch we ɔl in frut dɛn de fɔdɔm, ɛn lɛk ɔliv tik we ɔl in flawa dɔn fɔdɔm.

³⁴ Bikɔs, usay pipul dɛn we nɔ no PAPA GƆD gɛda, natin bɛtɛ nɔ kin kɔmɔt insay de, ɛn na faya go bɔn di pipul dɛn we de tek brayb, dɛn os.

³⁵ Na dɛn de tink bɔt bad na dɛn at, ɛn kin du bad bad tin; na dakadeke trik nɔmɔ de na dɛn at.