Job 13 - Krio Fɔs Oli Baybul

¹ Bo, a dɔn si ɔl wetin de bi so bifo, ɛn a dɔn yɛri ɛn ɔndastand ɔl wetin una dɔn se.

² A no ɔl wetin una no. Una nɔ pas mi o.

³ Bɔt a go tɔk to di Ɔlmayti, A wan agyu mi kes wit PAPA GƆD

⁴ As fɔ una, una jɛs de kɔba tin we una nɔ ɔndastand wit bɔku bɔku lay; una na lɛk dɔkta we de gi mɛrɛsin we nɔ de mɛn.

⁵ If una sɛt una mɔt, pipul dɛn go fil se una na pipul dɛn we gɛt bɔku sɛns.

⁶ Una lisin mi agyumɛnt ɛn wetin mi de aks se fɔ bi.

⁷ Wetindu una de lay fɔ PAPA GƆD ɛn wetindu una de lay gi mi?

⁸ Una de tray fɔ tɔk fɔ PAPA GƆD? Una go ebul tɔk fɔ PAPA GƆD?

⁹ Una fil se una go fri if PAPA GƆD chɛk una layf, ɔ una fil se una go lay gi am lɛk we una kin lay gi mɔtalman?

¹⁰ I lɛk una ayd una badat PAPA GƆD go mɔs pɔnish una fɔ wetin una dɔn du.

¹¹ Una go fred am bikɔs i gret ɛn pawaful.

¹² Una parebul dɛn jɛs tan lɛk asis, ɛn una agyumɛnt wik lɛk kle.

¹³ Una sɛt mɔt mek a tɔk; ɛnitin we gɛt fɔ bi to mi, mek i bi.

¹⁴ A rɛdi fɔ ɛnitin, ivin if a gɛt fɔ risk mi layf.

¹⁵ A nɔ bisin bɔt natin igen na dis wɔl, bikɔs a no se PAPA GƆD gɛt fɔ kil mi, bɔt a go tɛl am wetin de na mi at.

¹⁶ Na we a gɛt maynd fɔ tɔk to am mek i go sev mi, bikɔs bad pipul nɔ go gɛt maynd fɔ tinap bifo am.

¹⁷ Una lisin gud wetin a de se, ɛn lɛ i de na una ed.

¹⁸ A dɔn rɛdi fɔ tɔk fɔ misɛf ɛn a no se a go klia mi nem.

¹⁹ Udat go go tinap agens mi pan dis kes, na yu PAPA GƆD? If na yu, a go jɛs fɔgɛt bɔt ɔltin ɛn day saful.

²⁰ A wan lɛ yu du tu tin fɔ mi, If yu du dɛn fɔ mi, a go rɛdi fɔ go tinap bifo yu fɔ yɛri wetin yu gɛt agens mi.

²¹ Wan, yu fɔ lɛf fɔ pɔnish mi, ɛn tu, nɔ mek a fred yu bikɔs yu fiaful.

²² So yu fɔs tɔk to mi ɛn a go ansa ɔ mek mi fɔs tɔk lɛ yu ansa.

²³ Wetin ɛn wetin na di bad tin dɛn we a dɔn du ɛn a wan no if mi sin dɛn bɔku; lɛ a no mi sin dɛn we a dɔn kɔmit ɛn di bad tin dɛn we a dɔn du.

²⁴ Wetindu yu de push mi kɔmɔt nia yu, ɛn wetindu yu de trit mi lɛk se mi ɛn yu na ɛnimi?

²⁵ Yu de tray fɔ mek a fred yu, mi we tan jɛs lɛk lif bifo yu? If yu atak mi, i go jɛs tan lɛk we yu atak brumtik.

²⁶ Di bad tin dɛn we yu tɔk se a du, mɔna mi; yu ivin tɔk bɔt di bad tin dɛn we a bin du we mi na bin yɔŋbɔy.

²⁷ Yu chen mi fut ɛn de wach ɔl usay a de go, ɛn ivin de wach wetin a de du ɛn aw a de du an.

²⁸ Na dat mek mɔtalman de wes lɛk tin we rɔtin, lɛk kot we mɔth kin dɔn it.