Job 12 - Krio Fɔs Oli Baybul

Job

¹ Job ansa se:

² Na tru se na una sabi tɔk fɔ pipul, na una sabi ɔltin; wɛn una day, sɛns go day go wit una.

³ Misɛf gɛt sɛns lɛk una; a de tink lɛk aw una de tink. Ɔlman no ɔl wetin una dɔn tɔk.

⁴ Mi padi dɛn ɔl dɔn tek mi mek rederaun; mi we bin de pre to PAPA GƆD ɛn i de ansa, mi we na bin gud man, na mi ɔlman de laf naw so.

⁵ Na we una nɔ gɛt wetin de mɔna una mek una de laf mi; una jɛs de mek tin wɔs fɔ mi.

⁶ Tifman we de fɔ atak ɔda pipul de na dɛn os wit kolat, ɛn nɔbɔdi nɔ de ambɔg pɔsin we PAPA GƆD de vɛks pan ɔltɛm, dɛn kin fil se dɛn trɛnk nain na dɛn gɔd.

⁷ Aks di bist dɛn fɔ tich yu bɔt PAPA GƆD; aks dɛn bɔd sɛf we de flay, ɛn dɛnsɛf go tɛl yu;

⁸ if yu tɔk to di plant dɛn we de gro na grɔn sɛf, dɛn go tich yu; ɛn di fish dɛn na wata sɛf go tɔk bɔt PAPA GƆD to yu.

⁹ Us wan pan dɛn nɔ no se, na PAPA GƆD du ɔl dat?

¹⁰ Nain de kɔntrol layf ɛn di blo we mɔtalman de blo.

¹¹ Aw pɔsin de tes it fɔ no if i gud ɔ bad, na so i de lisin fɔs fɔ no wetin na tru.

¹² Ol pipul gɛt sɛns ɛn ɛkspiriɛns dɔn mek dɛn ɔndastand bɔku tin.

¹³ PAPA GƆD no ɔltin ɛn i gɛt pawa, i no wetin i de du ɛn ɔndastand ɔltin.

¹⁴ If i pwɛl sɔntin, nɔbɔdi nɔ ebul mek am bak; ɛn we i lɔk ɛni do, nɔbɔdi nɔ go ebul opin am.

¹⁵ If i se ren nɔ de kam, ɔltin go dray; if i want di ples fɔ flɔd igen, i go pwɛl di land.

¹⁶ PAPA GƆD pawaful ɛn i de dɔnawe wit in ɛnimi; i de kɔntrol di wan we de rog ɛn di wan we dɛn de rog.

¹⁷ I de lɛ bigman waka ɛmti fut, ɛn mek dɛn biev lɛk fulman.

¹⁸ I de mek kiŋ dɛn pul di tin dɛn we de sho se dɛn gɛt pawa, ɛn wɛr krubɔmbɔ na dɛn wes lɛk jelman.

¹⁹ I de pul di man dɛn we de mek sakrifays fɔ pipul sin na dɛn pozishɔn, i de pul pawa na di wan dɛn we gɛt pawa dɛn an.

²⁰ I de mek di wan dɛn we kin tɔk tru nɔ ebul fɔ tɔk, ɛn mek ol pipul nɔ no wetin rayt frɔm rɔŋ.

²¹ I de provok udat na aristo, ɛn mek trɛnkman dɛn trɛnk dɔn.

²² I de mek tin dɛn we pipul nɔ no se de bi, kam na layt.

²³ I de mek neshɔn gro, ɛn i de dɔnawe wit dɛn: i de mek di neshɔn dɛn big ɛn mek dɛn skata bak.

²⁴ I de mek di wan dɛn we de rul tɔn fulman, ɛn mek dɛn de wirɔn ɔlɔbɔt.

²⁵ Dɛn jɛs de pas pas lɛk udat blɛn we nɔ de si; ɛn dɛn de staga lɛk drɔnkɔman.