Jɔn 9 - Krio Fɔs Oli Baybul

Jizɔs Mɛn Wan Blɛnyay Man

¹ Wɛn Jizɔs bin de waka go, i si wan blɛnyay man, we bɔn blɛn.

² Di lanin bɔy dɛn aks Jizɔs se, “Ticha, udat sin we mek dis man ya bɔn blɛn? Na di man insɛf ɔ nain mami ɛn dadi dɛn?”

³ Jizɔs se, “Di blɛn we dis man ya blɛn nɔ gɛt natin fɔ du wit in yon sin dɛn, ɔ in mami ɛn dadi yon. I blɛn so dat pipul kin si di wɔndaful wok we Gɔd go du.

⁴ Na de tɛm wi fɔ du di wok we di wan we sɛn mi gi wi fɔ du, nɛt de kam we nɔbɔdi nɔ go ebul wok.

⁵ Wans a de na di wɔl, mi na di layt na di wɔl.”

⁶ Afta Jizɔs dɔn tɔk dat, i pit na grɔn, dɔn i mek pɔtɔpɔtɔ wit di pit. I rɔb di pɔtɔpɔtɔ pan di man in yay.

⁷ I luk di man ɛn se, “Go was yu fes na da wata we nem Siloam.” (“Siloam” min “Di wan we dɛn sɛn.”) So di man go was in fes de, na de i bigin si, so i go bak nain os.

⁸ In neba dɛn ɛn dɛn pipul we kin de si am wɛn i de beg, se, “Nɔto da man dis we kin sidɔm de beg?”

⁹ Sɔm pipul se, “Na di man dis we bin de beg,” bɔt sɔm se, “Nɔto in, na fiba i fiba am.” Di man insɛf se, “Na mi bin de beg.”

¹⁰ Di pipul dɛn se, “Aw yu manej bigin si?”

¹¹ Di man se, “Na wan man we dɛn kɔl Jizɔs mek pɔtɔpɔtɔ we i rɔb na mi yay, dɔn i tɛl mi fɔ go was mi fes na da wata we dɛn kɔl Siloam. So a go, ɛn as a was mi fes so, a ebul fɔ si.”

¹² Dɛn aks am usay Jizɔs de. Di man se, “A nɔ no usay i de.”

Di Faresi dɛn Dig Fɔ No bɔt di Man we Bin Blɛn

¹³ Pipul kɛr di man we bin blɛn go to di Faresi dɛn.

¹⁴ Na bin di de fɔ pre ɛn blo Jizɔs mek di pɔtɔpɔtɔ ɛn mɛn di blɛnyay man.

¹⁵ Di Faresi dɛn aks di man bak aw i manej si. Di man se, “I rɔb pɔtɔpɔtɔ na mi yay, a was mi fes, nain a bigin si.”

¹⁶ Sɔm pan di Faresi dɛn se, “Di pɔsin we du dis nɔ kɔmɔt to Gɔd, bikɔs i nɔ de du wetin di lɔ tɔk bɔt di de we fɔ pre ɛn blo.” Bɔt sɔm ɔda wan dɛn se, “Aw pɔsin we de pan sin go manej du wɔndaful wok lɛkɛ dɛn wan ya?” Dɛn nɔ bin gɛt wanwɔd.

¹⁷ Sɔm pan di Faresi dɛn aks di man bak se, “Yu se di man mɛn yu ɛn mek yu ebul si naw. Wetin yu gɛt fɔ se bɔt am?” Di man we bin blɛn se, “Di man na prɔfɛt.”

¹⁸ Di Ju bigman dɛn nɔ bin gri fɔ biliv se di man bin blɛn bifo i bigin si, pas we dɛn sɛn kɔl in mama ɛn papa,

¹⁹ ɛn aks dɛn se, “Na una pikin dis? Una se i bɔn blɛn? Wɛl, aw i manej si?”

²⁰ Di man in mama ɛn papa dɛn ansa se, “Wi no se na wi pikin dis, ɛn wi no se na blɛn wan i bɔn.

²¹ Bɔt wi nɔ no aw i manej fɔ si naw, ɛn wi nɔ no udat mɛn in yay. Una aks am, na bigman, so mek i tɔk fɔ insɛf!”

²² Di man in mama ɛn papa dɛn tɔk dat bikɔs dɛn bin de fred di Ju bigman dɛn. Di Ju bigman dɛn bin dɔn se, ɛnibɔdi we se in biliv se Jizɔs na di Mɛsaya, dɛn fɔ drɛb am kɔmɔt na di Ju mitin os.

²³ Na dat mek di man in mama ɛn papa se, “Na bigman, una aks am!”

²⁴ Di Ju bigman dɛn kɔl di man we bin blɛn kam bak, ɛn tɛl am se, “Swɛ bifo Gɔd se na tru yu de kam tɔk! Wi no se da man we mɛn yu, na man we gɛt sin nain layf.”

²⁵ Di man se, “A nɔ no if i gɛt sin ɔ if i nɔ gɛt sin nain layf. Na wan tin a no, a bin blɛn, bɔt naw a de si.”

²⁶ Dɛn aks am igen se, “Wetin di man we mɛn yu du fɔ yu fɔ mɛn yu yay we bin blɛn?”

²⁷ Di man se, “A min a bin dɔn tɛl una, bɔt una nɔ gri lisin. Wetin du una want mek a tɛl una igen? Tinkya unasɛf want bi in lanin bɔy dɛn?”

²⁸ Wɛn di Faresi dɛn yɛri dat, dɛn ala. Dɛn se, “Na yu na da man de in lanin bɔy; wi na Mozis in lanin bɔy dɛn.

²⁹ Wi no se Gɔd tɔk to Mozis, bɔt wi nɔ no di tɔŋ sɛf we da man de kɔmɔt.”

³⁰ Di man se, “A wɔnda-o! Una nɔ no di tɔŋ we dis man ya kɔmɔt, bɔt i dɔn mɛn mi yay.

³¹ Wi no se Gɔd nɔ de ansa wɛn pɔsin we gɛt sin nain layf pre to am. Gɔd de ansa ɔl dɛn pipul we rɛspɛkt am ɛn we de du ɔl wetin i tɛl dɛn fɔ du.

³² Frɔm we Gɔd mek di wɔl, nɔbɔdi nɔ yɛri wande se, dɛn dɔn mɛn pɔsin we bɔn blɛn.

³³ If nɔto Gɔd dis man ya kɔmɔt to, i nɔ bin fɔ ebul du natin.”

³⁴ Di Ju bigman dɛn ansa se, “Yu we bɔn insay sin, na yu de tray fɔ lan wi?” Dɛn drɛb di man kɔmɔt na di Ju mitin os.

Dɛn Pin Se dɛn Nɔ Blɛn

³⁵ Wɛn Jizɔs yɛri wetin bi, i go luk fɔ di man ɛn aks am se, “Yu biliv pan Mɔtalman Pikin?”

³⁶ Di man ansa se, “Masta, tɛl mi udat na dis Mɔtalman Pikin ya, so dat a kin biliv pan am!”

³⁷ Jizɔs se, “Yu dɔn si am, nain de tɔk to yu so naw.”

³⁸ Di man se, “Masta, a biliv yu!” I nil dɔŋ bifo Jizɔs.

³⁹ Jizɔs se, “A kam na dis wɔl fɔ jɔj, so dat dɛn blɛnyay pipul go si ɛn dɛn wan we de si go blɛn.”

⁴⁰ Wɛn sɔm pan di Faresi dɛn we bin lib de yɛri we Jizɔs de tɔk dɛn wɔd ya, dɛn se, “Yuwant tɛl wi se wisɛf blɛn?”

⁴¹ Jizɔs se, “If una bin blɛn, Gɔd nɔ bin go kɔndɛm una fɔ una sin, bɔt we una se una nɔ blɛn, dat min se sin stil de na una layf.”