Jɔn 8 - Krio Fɔs Oli Baybul

Di Mareduman we dɛn Kech pan Fri Layf

¹ Afta dat, ɔlman go nain os, bɔt Jizɔs go na Mawnt Ɔliv.

² Di ɔda de, wɛn do jɛs klin, Jizɔs go bak na Gɔd in Os. Ɔl di pipul dɛn go gɛda rawnd am, nain i sidɔm ɛn bigin lan dɛn.

³ Di Ju Lɔ ticha ɛn di Faresi dɛn briŋ wan mare du man we dɛn bin kech wit man we nɔto in maredman; dɛn mek di uman tinap bifo ɔlman.

⁴ Dɛn go to Jizɔs. Dɛn se, “Ticha, dɛn kech dis mare du man wit man we nɔto in maredman.

⁵ Wi Ju Lɔ we Gɔd bin gi Mozis tɛl wi se wi fɔ ston uman lɛkɛ dis sote i day. Wetin yu se, sa?”

⁶ Dɛn tɔk dat fɔ yɛri wetin Jizɔs go se, so dat dɛn kin se i nɔ de du rayt. Bɔt Jizɔs bɛn dɔŋ ɛn bigin rayt na grɔn wit in fiŋa.

⁷ Di Ju Lɔ ticha dɛn bin stil de aks Jizɔs kwɛshɔn, nain Jizɔs tinap ɛn se, “If ɛni wan pan una de we nɔ sin yet, mek da pɔsin de sɛn di fɔs ston pan dis uman.”

⁸ Nain Jizɔs bɛn dɔŋ ɛn bigin rayt na grɔn bak.

⁹ Wɛn dɛn yɛri wetin Jizɔs tɔk, dɛn ɔl kɔmɔt de wan bay wan; na di big wan dɛn fɔs kɔmɔt de, bifo di smɔl wan dɛn. Na Jizɔs nɔmɔ bin lɛf ɛn di uman bin stil tinap de.

¹⁰ Jizɔs tinap ɛn aks di uman se, “We di pipul dɛn? Nɔbɔdi nɔ de fɔ kɔndɛm yu?”

¹¹ Di uman ansa se, “Nɔbɔdi nɔ de, sa!” Jizɔs tɛl am se, “Misɛf nɔ go kɔndɛm yu. Go, bɔt nɔ sin igen.”]

Jizɔs Na di Layt na di Wɔl

¹² Jizɔs bigin tɔk to di Faresi dɛn bak, i se, “Mi na di Layt na di wɔl, ɛnibɔdi we de fala mi go gɛt di layt we de gi layf ɛn i nɔ go waka na dak.”

¹³ Di Faresi dɛn se, “Yu jɛs de tɔk bɔt yusɛf, nɔbɔdi nɔ de fɔ bak wetin yu de tɔk, so wetin yu de tɔk nɔ min natin.”

¹⁴ Jizɔs ansa dɛn se, “Nɔbɔdi nɔ de fɔ bak mi we a de tɔk bɔt misɛf, bɔt na tru a de tɔk bikɔs a no usay a kɔmɔt ɛn usay a de go. Una nɔ no usay a kɔmɔt ɛn una nɔ no usay a de go.

¹⁵ Una de jɔj lɛkɛ aw mɔtalman de jɔj in kɔmpin mɔtalman, mi nɔ de jɔj ɛnibɔdi.

¹⁶ Bɔt if a fɔ jɔj pipul, a go jɔj dɛn tret, nɔto mi wangren go jɔj dɛn, mi Papa we sɛn mi, insɛf de wit mi.

¹⁷ Wan say pan una Ju Lɔ se, wɛn tu witnɛs tɔk di sem tin, dat min se na tru dɛn de tɔk.

¹⁸ A de tɔk bɔt misɛf ɛn mi Papa we sɛn mi de tɔk di sem tin bɔt mi.”

¹⁹ Dɛn se, “Usay yu papa de?” Jizɔs ansa se, “Una nɔ no mi ɛn una nɔ no mi Papa. If una bin no mi, una bin go no mi Papa we sɛn mi.”

²⁰ Jizɔs tɔk dɛn wɔd ya wɛn i bin de lan pipul na Gɔd in Os, insay di rum we di ɔfrin bɔks bin de. Nɔbɔdi nɔ ol am bikɔs di tɛm we fɔ ol am nɔ bin rich yet.

Una nɔ Go Go na di Ples we A De Go

²¹ Jizɔs bin stil de tɔk to di pipul dɛn. I se, “A go go, una go luk fɔ mi, bɔt una go day wit ɔl una sin. Una nɔ go go na di ples we a de go.”

²² So di Ju bigman dɛn se, “Dis man se wi nɔ go go na di ples we i de go; tinkya i go kil insɛf?”

²³ Jizɔs se, “Na dis wɔl ya una blant, bɔt mi kɔmɔt ɔp na ɛvin. Na dis wɔl una kɔmɔt, bɔt nɔto dis wɔl mi kɔmɔt.

²⁴ Na dat mek a tɛl una se, una go day wit ɔl una sin. Ɛn una go day wit una sin, if una nɔ biliv se ‘Mi na di pɔsin we a bi.’”

²⁵ Dɛn aks Jizɔs se, “Udat na yu?” Jizɔs ansa dɛn se, “Mi na di pɔsin we a bin dɔn tɛl una se a bi, frɔm tɛm.

²⁶ A gɛt plɛnti tin fɔ tɔk bɔt una, ɛn plɛnti tin fɔ kɔndɛm una fɔ. Bɔt di wan we sɛn mi, tru, ɛn a go jɛs tɛl dɛn pipul na wɔl wetin i tɛl mi.”

²⁷ Dɛn nɔ bin ɔndastand se Jizɔs bin de tɛl dɛn bɔt in Papa we de na ɛvin.

²⁸ So Jizɔs se, “Wɛn una lif Mɔtalman Pikin ɔp, una go no se, ‘Mi na di pɔsin we a bi;’ da tɛm de, una go no se a nɔ de du ɛnitin bay misɛf, na wetin mi Papa tɛl mi fɔ tɔk nɔmɔ a de tɔk.

²⁹ Ɛn di wan we sɛn mi de wit mi, i nɔ lɛf mi to misɛf bikɔs ɔltɛm a de du dɛn tin we i lɛk.”

³⁰ Plɛnti pipul we yɛri Jizɔs de tɔk dɛn wɔd ya biliv pan am.

Dɛn Fribɔn ɛn Dɛn Slev

³¹ So Jizɔs tɛl di wan dɛn we biliv pan am se, “If una de du ɔl wetin a tɛl una fɔ du, una na mi lanin bɔy dɛn fɔ tru;

³² una go no wetin tru bɔt Gɔd, ɛn dat go mek una fri.”

³³ Dɛn ansa Jizɔs se, “Wi na Ebraam in grampikin pikin dɛm, ɛn wande wi nɔ bi slev; so, wetin yu min we yu se, ‘Una go fri?’”

³⁴ Jizɔs se, “A de tɛl una fɔ tru se, ɛnibɔdi we sin, na slev to sin.

³⁵ Slev nɔ go de to in masta ɔltɛm, bɔt bɔy pikin go de nain papa os ɔltɛm.

³⁶ If Gɔd in Pikin mek una fri, dɛn una go fri fɔ tru.

³⁷ A no se una na Ebraam in grampikin pikin dɛm, pan ɔl dat una de tray fɔ kil mi, bikɔs una nɔ want du wetin a lan una.

³⁸ A de tɛl una bɔt dɛn tin we Gɔd we na mi Papa dɔn sho mi, bɔt una de du wetin una yon papa dɔn tɛl una fɔ du.”

³⁹ Dɛn ansa Jizɔs se, “Na Ebraam, na wi papa.” Jizɔs se, “If una na bin Ebraam in pikin dɛn, una bin go de du di sem tin dɛn we Ebraam bin du.

⁴⁰ Na di tru wɔd dɛn nɔmɔ we Gɔd tɛl mi, a de tɛl una frɔm tɛm, bɔt pan ɔl dat, una de tray fɔ kil mi. Ebraam nɔ du so.

⁴¹ Una de du wetin una tru papa bin du.” Dɛn se, “Na Gɔd wangren na wi papa, wi nain tru pikin dɛn.”

⁴² Jizɔs se, “If Gɔd na bin una Papa fɔ tru, una bin fɔ lɛk mi, bikɔs na Gɔd a kɔmɔt to kam na ya. A nɔ jɛs kam bay misɛf, na mi Papa sɛn mi.

⁴³ Wetin mek una nɔ ɔndastand wetin a de tɔk? Na bikɔs una nɔ want fɔ yɛri wetin a de tɛl una.

⁴⁴ Na Setan na una papa, so una lɛk fɔ du di tin dɛn we una papa lɛk fɔ du. Frɔm tɛm, Setan de kil, ɛn i nɔ lɛk ɛnitin we na tru, bikɔs i nɔ de tɔk tru. Ɛnitɛm we i lay, i jɛs de sho in trik, bikɔs na layman ɛn nain de mek pipul lay.

⁴⁵ Bɔt a de tɔk tru, na dat mek una nɔ biliv mi.

⁴⁶ Uswan pan una kin pruv se a dɔn sin? If a de tɔk tru, wetindu una nɔ biliv mi?

⁴⁷ Pɔsin we kɔmɔt to Gɔd de put in at pan di tin dɛn we Gɔd tɔk. Nɔto Gɔd una kɔmɔt to, na dat mek una nɔ de yɛri Gɔd in wɔd.”

Jizɔs Bin Dɔn De Bifo Ebraam Bɔn

⁴⁸ Dɛn aks Jizɔs se, “Yuwant se wi nɔ bin tɔk tru wɛn wi se yu na pɔsin we kɔmɔt Sameria, ɛn dɛbul de insay yu?”

⁴⁹ Jizɔs ansa se, “A nɔ gɛt dɛbul; a rɛspɛkt mi Papa, bɔt una nɔ rɛspɛkt mi.

⁵⁰ A nɔ de tray fɔ mek pipul rɛspɛkt mi. Bɔt wan pɔsin de we want mek pipul rɛspɛkt mi ɛn i de jɔj tret.

⁵¹ A de tɛl una se, ɛnibɔdi we de du wetin a de lan am, nɔ go day.”

⁵² Dɛn tɛl Jizɔs se, “Wi dɔn no naw se dɛbul de insay yu, fɔ tru! Ebraam day, ɛn ɔl dɛn prɔfɛt sɛf day. Pan ɔl dat yu se, ɛnibɔdi we du wetin yu lan am, nɔ go day.

⁵³ Wi papa Ebraam day, yu min se yu pas am? Dɛn prɔfɛt sɛf day, udat yu want tɛl wi se yu bi?”

⁵⁴ Jizɔs ansa dɛn se, “If misɛf mek pipul ɔna mi, da ɔna de nɔ min natin. Na mi Papa de mek pipul ɔna mi, ɛn nain una de kɔl wi Gɔd.

⁵⁵ Una nɔ no am wande, bɔt mi no am. If a bin se a nɔ no am, a bin fɔ de lay lɛkɛ una. Bɔt a no am, ɛn a de du wetin i se.

⁵⁶ Una papa Ebraam bin gladi, bikɔs Gɔd sho am di tɛm we a go kam. Bifo a bɔn, i bin dɔn no se a go kam so i bin gladi.”

⁵⁷ Di pipul dɛn se, “Yu nɔ ol fifti ia yet, wetindu yu se yu dɔn si Ebraam?”

⁵⁸ Jizɔs se, “A de tɛl una fɔ tru se, bifo Ebraam bɔn, a dɔn de.”

⁵⁹ Di pipul dɛn pik ston fɔ ston Jizɔs, bɔt Jizɔs ayd kɔmɔt insay Gɔd in Os.