Jɔn 6 - Krio Fɔs Oli Baybul

Jizɔs Fid Pas Fayv Tawzin Pipul dɛn

¹ Wɛn dat dɔn, Jizɔs krɔs oba Lek Galili (sɔm pipul kin kɔl am Lek Taybiryɔs).

² Plɛnti plɛnti pipul fala am, bikɔs dɛn si di wɔndaful wok we i du we i mɛn dɛn sik pipul.

³ Jizɔs ɛn in lanin bɔy dɛn go sidɔm ɔp wan il.

⁴ Di tɛm fɔ di Pasova ɔlide bin dɔn de rich.

⁵ Wɛn Jizɔs luk rawnd, i si se plɛnti plɛnti pipul de kam to am, so i aks Filip se, “Usay wi go bay bred we go du fɔ fid ɔl dɛn pipul ya?”

⁶ Jizɔs jɛs tɔk dat nɔmɔ fɔ si wetin Filip go du, bikɔs i bin dɔn no wetin in go du.

⁷ Filip ansa Jizɔs se, “Fɔ mek ɔlman gɛt lili lili bit, wi fɔ pul pas tu ɔndrɛd silva kɔpɔ fɔ bay di bred.”

⁸ Wan pan Jizɔs in ɔda lanin bɔy dɛn, dat na Andru we na Saymɔn Pita in brɔda se,

⁹ “Wan lili bɔbɔ de ya; i gɛt fayv bali bred ɛn tu fish. Bɔt dɛn nɔ go du fɔ ɔl dɛn pipul ya.”

¹⁰ Jizɔs tɛl in lanin bɔy dɛn se, “Una tɛl di pipul dɛn fɔ sidɔm.” Plɛnti gras bin de na di grɔn, so ɔl di pipul dɛn sidɔm. Di man dɛn we bin lib de na bin lɛkɛ fayv tawzin so.

¹¹ Jizɔs tek di bred, i tɛl Gɔd tɛnki, dɔn i sheb am gi di pipul dɛn we bin sidɔm. I du di sem tin wit di fish, ɛn ɔlman gɛt ɔl wetin i want.

¹² Wɛn dɛn ɔl dɔn bɛlful, Jizɔs tɛl in lanin bɔy dɛn se, “Una gɛda ɔl di af af we lɛf, mek natin nɔ wes.”

¹³ So di lanin bɔy dɛn gɛda ɔl di af af bred dɛn we bin lɛf pan di fayv bali bred, afta di pipul dɛn dɔn it. Di af af we dɛn gɛda ful twɛlv blay.

¹⁴ Wɛn di pipul dɛn we bin lib de si di wɔndaful wok we Jizɔs du, dɛn se, “Fɔ tru, dis man na da prɔfɛt we Mozis bin se go kam na wɔl.”

¹⁵ Jizɔs no se di pipul dɛn bin want kam kapu am ɛn fos am fɔ bi kiŋ, so i kɔmɔt to dɛn, in wangren go ɔp di il.

Jizɔs Waka Pantap Wata

¹⁶ Wɛn ivintɛm rich, Jizɔs in lanin bɔy dɛn go na Lek Galili.

¹⁷ Dɛn tek bot krɔs oba, dɛn bin put ed fɔ go Kepanyɔm. Dɛn lib de sote nɛt kam, bɔt Jizɔs nɔ bin dɔn go mit dɛn yet.

¹⁸ Bay da tɛm de traŋa briz bin de blo we mek di wata rɔf.

¹⁹ Di lanin bɔy dɛn bin dɔn padul go lɛkɛ tri to fo mayl midul di wata we dɛn si Jizɔs de waka pantap di wata de kam klos di bot. Di lanin bɔy dɛn dɛn fred.

²⁰ Jizɔs tɛl dɛn se, “Una nɔ fred, na mi dis!”

²¹ Na wit gladi dɛn mek Jizɔs go insay di bot, di bot rich di ples we dɛn bin de go na sho wantɛm.

Di Pipul dɛn De Luk fɔ Jizɔs

²² Di ɔda de, dɛn pipul we bin dɔn lɛf na di ɔda sho klos Lek Galili notis se na wangren bot bin lib de. Dɛn bin no se Jizɔs nɔ bin go insay di bot wit in lanin bɔy dɛn, wɛn dɛn bin de lɛf fɔ go Kepanyɔm.

²³ Bɔt sɔm ɔda bot dɛn we kɔmɔt Taybiryɔs, kam nia di ples we di pipul dɛn it di bred afta di Masta dɔn tɛl Gɔd tɛnki.

²⁴ Wɛn di pipul dɛn nɔ si Jizɔs ɛn in lanin bɔy dɛn, dɛn go insay di bot dɛn ɛn go luk fɔ Jizɔs na Kepanyɔm.

Jizɔs Na di Bred we De Gi Layf

²⁵ Wɛn di pipul dɛn krɔs di Lek dɛn si Jizɔs, nain dɛn aks am se, “Ticha, ustɛm yu rich ya?”

²⁶ Jizɔs se, “A de tɛl una se, na fɔseka di bred we a bin gi una we una it te una bɛlful, mek una de luk fɔ mi, nɔto bikɔs una ɔndastand wetin di wɔndaful wok dɛn we a de du, min.

²⁷ Una nɔ fɔ wok fɔ di it we go pwɛl, bɔt una fɔ wok fɔ di it we de gi layf we go de sote go. Na di it dat we Mɔtalman Pikin go gi una fɔ it, bikɔs na Mɔtalman Pikin, Gɔd we na di Papa dɔn sho se in gri fɔ.”

²⁸ So di pipul dɛn aks Jizɔs se, “Wetin wi fɔ du, so dat wi go du wetin Gɔd want wi fɔ du?”

²⁹ Jizɔs ansa dɛn se, “Di tin we Gɔd want una fɔ du nain dis: una fɔ biliv pan di wan we Gɔd sɛn kam na wɔl.”

³⁰ Dɛn aks am bak se, “Us wɔndaful wok yu go du fɔ mek wi si, so dat wi go biliv Yu? Wetin yu go du?

³¹ Wi grampapa papa dɛn bin it da tin we dɛn kɔl mana wɛn dɛn bin de na di dɛzat, ɛn na bɔt dat dɛn rayt na Gɔd in Buk we dɛn se, ‘I gi dɛn bred we kɔmɔt ɛvin fɔ it.’”

³² Jizɔs se, “A de tɛl una fɔ tru se, di tin we Mozis bin gi una nɔto di bred we kɔmɔt ɛvin; na mi Papa de gi una di tru bred we kɔmɔt ɛvin.

³³ Di bred we Gɔd de gi na di wan we kɔmɔt ɛvin kam dɔŋ we de gi mɔtalman di tru layf.”

³⁴ Dɛn se, “Masta, duya, gi wi da bred de ɔltɛm.”

³⁵ Jizɔs ansa dɛn se, “Mi na di bred we de gi layf, ɛnibɔdi we kam to mi ɛn biliv pan mi nɔ go aŋri, ɛn i nɔ go tɔsti igen.

³⁶ Bɔt a de tɛl una se una dɔn si mi, bɔt una nɔ biliv pan mi.

³⁷ Ɔl dɛn wan we mi Papa dɔn gi mi go kam to mi. A nɔ go drɛb ɛnibɔdi we kam to mi,

³⁸ bikɔs a nɔ kɔmɔt na ɛvin kam fɔ du wetin a want, a kam fɔ du wetin di wan we sɛn mi want mi fɔ du.

³⁹ Ɛn di wan we sɛn mi nɔ want mek a lɔs ɛni wan pan dɛn wan we i dɔn gi mi, i want mek a mek dɛn rayz frɔm dɛn grev ɛn gi dɛn layf we go de sote go, di de we i go jɔj ɔlman.

⁴⁰ Wetin mi Papa want, na fɔ mek ɔlman we no in Pikin ɛn biliv pan am gɛt layf we go de sote go. Ɛn a go mek dɛn ɔl rayz frɔm di grev ɛn gi dɛn di tru layf, di de we Gɔd go jɔj ɔlman.”

⁴¹ Di pipul dɛn bigin grɔmbul bikɔs Jizɔs se, “Mi na di bred we kɔmɔt na ɛvin.”

⁴² So dɛn se, “Dis man ya na Jizɔs, Josɛf in pikin, nɔto so? Wi no in papa ɛn mama. Aw i de tɔk naw se na ɛvin in kɔmɔt kam dɔŋ na wɔl?”

⁴³ Jizɔs tɛl dɛn se, “Una lɛf fɔ grɔmbul!

⁴⁴ Nɔbɔdi nɔ go kam to mi pas mi Papa we sɛn mi briŋ di pɔsin kam to mi; ɛn a go mek di pɔsin rayz frɔm in grev ɛn gi am tru layf, di de we Gɔd go jɔj ɔlman.

⁴⁵ Wan prɔfɛt bin rayt se, ‘Na Gɔd go lan ɔlman wetin dɛn fɔ du.’ Ɛnibɔdi we lisin mi Papa gud ɛn lan wetin i tich am, da pɔsin de go kam to mi.

⁴⁶ Dat nɔ min se pɔsin de we dɔn si mi Papa; di wan we kɔmɔt to Gɔd, nain wangren dɔn si di Papa.

⁴⁷ A de tɛl una se, ɛnibɔdi we biliv wetin a se, da pɔsin de dɔn gɛt layf we go de sote go.

⁴⁸ Mi na di bred we de gi layf.

⁴⁹ Pan ɔl we una grampapa papa dɛn bin it mana wɛn dɛn bin de na di dɛzat, dɛn day.

⁵⁰ Bɔt di bred we kɔmɔt na ɛvin, na bred we if ɛnibɔdi it am, i nɔ go day.

⁵¹ Mi na di bred we kɔmɔt na ɛvin we de gi layf, if ɛnibɔdi it am, di pɔsin go gɛt layf we go de sote go. Di bred we a go gi na mi bɔdi we a go sakrifays, so dat ɔlman na wɔl kin gɛt layf.”

⁵² Di tin we Jizɔs tɔk, mek di pipul dɛn vɛks ɛn bigin agyu wit dɛn kɔmpin. Dɛn se, “Aw dis man ya go gi wi in bɔdi fɔ it?”

⁵³ Jizɔs se, “A de tɛl una fɔ tru se, if una nɔ it Mɔtalman Pikin in bɔdi ɛn drink in blɔd, una nɔ go gɛt tru layf.

⁵⁴ Ɛnibɔdi we it mi bɔdi ɛn drink mi blɔd, da pɔsin de go gɛt layf we go de sote go, ɛn a go mek i rayz frɔm in grev ɛn gi am tru layf, di de we Gɔd go jɔj ɔlman.

⁵⁵ Bikɔs mi bɔdi nain na di tru tin we fɔ it ɛn mi blɔd na di tru tin we fɔ drink.

⁵⁶ Ɛnibɔdi we it mi bɔdi ɛn drink mi blɔd, di pɔsin go de na mi at ɛn misɛf go liv insay di pɔsin in at.

⁵⁷ Na mi Papa we de gi layf sɛn mi kam na wɔl, ɛn nain mek misɛf gɛt layf. Semwe so, a go mek ɛnibɔdi we it mi bɔdi, gɛt layf.

⁵⁸ Dis na di bred we kɔmɔt na ɛvin kam dɔŋ, i nɔ tan lɛkɛ da bred we una grampapa papa dɛn bin de it wɛn dɛn bin de na di dɛzat, bɔt afta dat pas dɛn day. Bɔt di pɔsin we go it dis bred ya go gɛt layf we go de sote go.”

⁵⁹ Jizɔs tɔk ɔl dɛn tin ya wɛn i bin de lan pipul na di Ju mitin os na Kepanyɔm.

Di Wɔd dɛn we De Mek Pɔsin Gɛt Layf we Go De Sote Go

⁶⁰ Plɛnti pan di pipul dɛn we bin de fala Jizɔs we yɛri dɛn wɔd ya, se, “Dɛn tin ya we i lan wi tu traŋa. Udat go gri fɔ fala dɛn?”

⁶¹ Jizɔs bin no se di pipul dɛn bin de grɔmbul bɔt wetin i tɔk, pan ɔl we nɔbɔdi nɔ tɛl am, so i aks dɛn se, “Di tin we a tɔk mek una nɔ want biliv igen?

⁶² Wɛl, wetin go bi if una si Mɔtalman Pikin tɔn bak go na di ples we i bin de fɔs?

⁶³ Na Gɔd in Spirit de gi pipul layf. Mɔtalman nɔ gɛt di pawa fɔ gi layf. Di wɔd dɛn we a dɔn tɛl una de mek Gɔd in Spirit we de gi layf kam to una.

⁶⁴ Pan ɔl dat, sɔm pan una nɔ biliv dɛn.” (Frɔm di tɛm we Jizɔs bigin fɔ lan di pipul dɛn, i dɔn no di wan dɛn we nɔ go biliv pan am, ɛn di pɔsin we go sɛl am.)

⁶⁵ Jizɔs tɔk igen se, “Na di tin dis we mek a tɛl una se, nɔbɔdi nɔ go kam to mi pas di Papa mek di pɔsin ebul kam to mi.”

⁶⁶ Fɔseka dat, plɛnti pan di pipul dɛn we bin de fala Jizɔs, tap fɔ fala am.

⁶⁷ So Jizɔs aks di twɛlv lanin bɔy dɛn se, “Unasɛf want go lɛf mi?”

⁶⁸ Saymɔn Pita ansa se, “Masta, udat wi go go to? Na yu de tɔk dɛn wɔd we de gi pɔsin layf we go de sote go.

⁶⁹ Ɛn naw wi dɔn biliv ɛn wi no se, yu na Gɔd yon pɔsin ɛn na yu Gɔd sɛn kam to wi.”

⁷⁰ Jizɔs se, “Na mi pik una ɔl twɛlv, nɔto so? Bɔt wan pan una na dɛbul!”

⁷¹ Jizɔs bin de tɔk bɔt Judas we na Saymɔn Iskariɔt in pikin, pan ɔl we Judas na bin wan pan di twɛlv lanin bɔy dɛn, i bin mekɔp fɔ sɛl Jizɔs.