Jɔn 3 - Krio Fɔs Oli Baybul

Jizɔs ɛn Nikodimɔs

¹ Wan Ju bigman we bin nem Nikodimɔs na bin wan pan dɛn Ju pipul we dɛn kɔl Faresi.

² Wan nɛt, Nikodimɔs go fɛn Jizɔs. I se, “Ticha, wi no se yu na ticha we Gɔd sɛn. Nɔbɔdi nɔ go ebul du dɛn wɔndaful wok we yu de du, pas Gɔd de wit di pɔsin.”

³ Jizɔs tɛl am se, “A de tɛl yu fɔ tru se, nɔbɔdi nɔ go kam ɔnda Gɔd in rul pas i bɔn sɛkɛn tɛm.”

⁴ Nikodimɔs aks Jizɔs se, “Aw pɔsin we dɔn big go kam bɔn bak? Di pɔsin nɔ go go insay in mami bɛlɛ bak, ɛn kam bɔn bak lɛkɛ lili bebi!”

⁵ Jizɔs se, “A de tɛl yu se, nɔbɔdi nɔ go kam ɔnda Gɔd in rul pas di pɔsin bɔn wit wata ɛn wit Gɔd in Spirit.

⁶ Na mami ɛn dadi de bɔn pikin, bɔt na Gɔd in Spirit de mek pɔsin gɛt nyu layf lɛkɛ se i jɛs bɔn.

⁷ Nɔ wɔnda we a tɛl yu se, una ɔl fɔ bɔn sɛkɛn tɛm.

⁸ Briz de blo ɛni say we i lɛk; yu de yɛri di sawnd we i de mek, bɔt yu nɔ no usay i kɔmɔt, yu nɔ no usay i de go. Na di sem tin de bi wɛn Gɔd in Spirit gi pɔsin nyu layf.”

⁹ Nikodimɔs aks Jizɔs se, “Aw dat kin bi?”

¹⁰ Jizɔs aks am se, “Yu we na big ticha na Izrɛl, yu nɔ ɔndastand wetin a tɔk?

¹¹ A de tɛl yu se, na wetin wi no, wi de tɛl una bɔt, na wetin wi dɔn si, wi de tɛl una bɔt, bɔt pan ɔl dat, una nɔn nɔ gri biliv wetin wi de tɛl una.

¹² If una nɔ biliv mi wɛn a tɛl una bɔt dɛn tin we de bi na dis wɔl, aw una go biliv mi wɛn a tɛl una bɔt dɛn tin we de bi na ɛvin?

¹³ Ɛn nɔbɔdi nɔ go na ɛvin wande pas Mɔtalman Pikin we kɔmɔt ɔp na ɛvin, kam dɔŋ na dis wɔl.”

¹⁴ Lɛkɛ aw Mozis bin es da ayɛn snek ɔp pan tik na di dɛzat, na semwe so dɛn go gɛt fɔ es Mɔtalman Pikin ɔp.

¹⁵ So dat ɛnibɔdi we biliv pan am go gɛt layf we go de sote go.

¹⁶ Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.

¹⁷ Gɔd nɔ sɛn in Pikin kam na wɔl fɔ kam jɔj mɔtalman, i sɛn am kam fɔ kam sev ɔlman.

¹⁸ If ɛnibɔdi biliv pan Gɔd in Pikin, Gɔd nɔ go kɔndɛm da pɔsin de. Bɔt Gɔd go kɔndɛm ɛnibɔdi we nɔ gri biliv pan in Pikin; we i nɔ biliv pan Gɔd in Pikin na di rizin dat nɔmɔ we go mek Gɔd kɔndɛm di pɔsin.

¹⁹ Na di we dis we Gɔd de jɔj mɔtalman: Gɔd mek di layt kam na di wɔl, bɔt di pipul dɛn lɛk daknɛs pas di layt, bikɔs dɛn de du bad ɔltɛm.

²⁰ Ɛnibɔdi we de du bad, nɔ lɛk di layt ɛn i nɔ go kam na di layt, bikɔs i nɔ go want mek di layt mek pipul no di bad tin dɛn we i de du.

²¹ Bɔt ɛnibɔdi we de du wetin Gɔd se na di rayt tin go kam na di layt, so dat di layt go mek pipul no se na wetin Gɔd tɛl am fɔ du, nain i de du.

Jizɔs ɛn Jɔn

²² Wɛn dat pas, Jizɔs ɛn in lanin bɔy dɛn go Judia. I te lɔŋ lili bit wit dɛn na Judia. Wɛn i lib de, i bin de baptayz pipul.

²³ Jɔn insɛf bin de baptayz pipul na Inɔn we bin de klos Selin, bikɔs plɛnti wata bin lib de. Plɛnti pipul bin de go mit Jɔn de ɛn i bin de baptayz dɛn.

²⁴ Di tɛm we ɔl dis bin de bi, Jɔn nɔ bin go jel yet.

²⁵ Sɔm pan Jɔn in lanin bɔy dɛn ɛn wan Ju man bigin mek plaba bikɔs di Ju Lɔ se pɔsin fɔ was spɛshal was if i want klin na Gɔd yay.

²⁶ So di lanin bɔy dɛn go tɛl Jɔn se, “Ticha, yu mɛmba da man we bin de wit yu wɛn yu bin de na di istɛn pat na Riva Jɔdan, da man we yu bin de tɔk bɔt? Wɛl, insɛf de baptayz pipul naw na Riva Jɔdan, ɛn plɛnti plɛnti pipul de go to am fɔ mek i baptayz dɛn!”

²⁷ Jɔn tɛl dɛn se, “Natin lɛkɛ dis nɔ de bi to pɔsin pas Gɔd mek i bi.

²⁸ Unasɛf bin yɛri wɛn a se, ‘Mi nɔto di Mɛsaya, bɔt Gɔd sɛn mi fɔ kam bifo di Mɛsaya kam fɔ mek we fɔ am.’

²⁹ Na di ɔkɔ gɛt di yawo, bɔt di ɔkɔ in padi we tinap klos dɛn go gladi wɛn i yɛri di ɔkɔ de tɔk. Na dat mek a gladi bad.

³⁰ Mɔ ɛn mɔ pipul go de fala di Mɛsaya, bɔt di pipul dɛn we de fala mi go de lɛf fɔ fala mi smɔl smɔl. Na so i fɔ bi.”

Di Wan we Kɔmɔt Ɛvin, Pas Ɔlman

³¹ Di pɔsin we kɔmɔt ɛvin, pas ɔlman. Di pɔsin we de na dis wɔl blant dis wɔl, ɛn i de tɔk bɔt dis wɔl yon biznɛs, bɔt di wan we kɔmɔt na ɛvin pas ɔlman.

³² Di wan we kɔmɔt ɛvin de tɔk bɔt wetin i dɔn si ɛn yɛri; pan ɔl dat nɔbɔdi nɔ de put at pan wetin i de tɔk.

³³ Ɛnibɔdi we put at pan wetin i se, dɔn sho se na tru Gɔd tɔk.

³⁴ Di wan we Gɔd dɔn sɛn de tɛl pipul di mɛsej we Gɔd gi am, bikɔs Gɔd mek ɔl di pawa we in Spirit gɛt de wit am.

³⁵ Gɔd we na wi Papa lɛk in Pikin ɛn i mek in Pikin rul oba ɔltin.

³⁶ Ɛnibɔdi we biliv pan Gɔd in Pikin go gɛt layf we go de sote go; bɔt ɛnibɔdi we nɔ du wetin Gɔd in Pikin se, nɔ go gɛt di tru layf we de sote go, ɛn Gɔd go stil de pɔnish am.