Jɔn 20 - Krio Fɔs Oli Baybul

Jizɔs Rayz frɔm di Grev

¹ Ali Sɔnde mɔnin, di ples bin stil dak, nain Meri we kɔmɔt Magdala go na di grev. I si se di ston we dɛn bin tek kɔba di domɔt nɔ bin lib de igen.

² I tɔn bak rɔn go mit Saymɔn Pita ɛn di lanin bɔy we Jizɔs lɛk ɛn tɛl dɛn se, “Dɛn dɔn pul wi Masta kɔmɔt na di grev ɛn wi nɔ no usay dɛn dɔn kɛr am go!”

³ So Pita ɛn di ɔda lanin bɔy go na di grev.

⁴ Dɛn tu bin de rɔn, bɔt di ɔda lanin bɔy rɔn fas pas Pita, so nain fɔs rich na di grev.

⁵ I bɛn luk insay di grev, i si di wayt klos we dɛn bin tek rap Jizɔs in bɔdi, bɔt i nɔ go insay di grev.

⁶ Wɛn Saymɔn Pita rich de, in go insay di grev. I si di wayt klos we dɛn bin tek rap Jizɔs in bɔdi,

⁷ ɛn di klos we bin rap rawnd Jizɔs in ed, i bin fol wansay na ɔda kɔna.

⁸ Na da tɛm de di ɔda lanin bɔy, we fɔs rich na di grev, insɛf go insay. Wɛn i si ɔltin, i biliv fɔ tru se Jizɔs rayz frɔm di grev.

⁹ (Bɔt pan ɔl dat dɛn nɔ bin stil ɔndastand di tin we rayt na Gɔd in Buk we se, i fɔ rayz frɔm di grev.)

¹⁰ Nain di lanin bɔy dɛn tɔn bak go na dɛn os.

Jizɔs Sho Insɛf to Meri we Kɔmɔt Magdala

¹¹ Meri bin tinap de kray klos di grev; wɛn i de kray, i bɛn luk insay di grev.

¹² Na de i si tu enjɛl we wɛr wayt sidɔm na di ples we dɛn bin le Jizɔs, wan to di ed say, di ɔda wan to di fut say.

¹³ Di enjɛl dɛn aks am se, “Wetin du yu de kray?” I ansa dɛn se, “Dɛn dɔn kɛr mi Masta go, ɛn a nɔ no usay dɛn dɔn go put am.”

¹⁴ Wɛn Meri dɔn tɔk dat dɔn, i si sɔmbɔdi tinap de, na bin Jizɔs, bɔt i nɔ bin no se na Jizɔs dat.

¹⁵ Jizɔs aks am se, “Wetin du yu de kray? Udat yu de luk fɔ?” Meri bin min se na di man we de luk di gadin, so i se, “Pa, if na yu kɛr am go, tɛl mi usay yu put am, mek a go go tek am.”

¹⁶ Jizɔs se, “Meri.” Meri tɔn luk Jizɔs ɛn se “Raboni.” (Dat na Ibru wɔd we min “Ticha”.)

¹⁷ Jizɔs se, “Nɔ tɔch mi, bikɔs a nɔ go bak to mi Papa yet. Bɔt go tɛl mi lanin bɔy dɛn se, a de tɔn bak go ɔp to mi Papa we na unasɛf yon Papa. Na mi Gɔd ɛn na unasɛf yon Gɔd.”

¹⁸ So Meri we kɔmɔt Magdala tɔn bak go tɛl di lanin bɔy dɛn se in dɔn si di Masta, ɛn i tɛl dɛn ɔl wetin Jizɔs tɛl am.

Jizɔs Sho Insɛf to In Lanin Bɔy dɛn

¹⁹ Na bin Sɔnde ivin, di lanin bɔy dɛn bin gɛda wan ples ɛn lɔk ɔl di do dɛn, bikɔs dɛn bin de fred di Ju bigman dɛn. Aw dɛn lib de, na de Jizɔs jɛs bɔs pan dɛn ɛn se, “Mek Gɔd gi una kol at.”

²⁰ Wɛn i dɔn tɔk dat dɔn, i sho dɛn di wund dɛn nain an ɛn in sayd. Di lanin bɔy dɛn gladi bad wɛn dɛn si se na dɛn Masta.

²¹ Jizɔs tɔk bak se, “Mek Gɔd gi una kol at. Jɛs lɛkɛ aw mi Papa sɛn mi kam na dis wɔl, na so a de sɛn unasɛf fɔ go du mi wok.”

²² Dɔn i blo pan dɛn ɛn se, “Una mek Gɔd in Spirit kam insay una.

²³ If una padin ɛnibɔdi we sin, Gɔd go padin da pɔsin de; if una nɔ padin pɔsin we sin, Gɔd nɔ go padin da pɔsin de.”

Jizɔs Tɔk to Tɔmɔs

²⁴ Wan pan di twɛlv lanin bɔy dɛn we nem Tɔmɔs, we dɛn kɔl “Twin”, nɔ bin de wɛn Jizɔs kam to di ɔda lanin bɔy dɛn.

²⁵ So di ɔda lanin bɔy dɛn tɛl am se dɛn jɛs si di Masta. Tɔmɔs se, “A nɔ go biliv, pas a si ɛn tɔch di say we di nel dɛn bin wund am nain an, ɛn put mi fiŋa insay di wund nain sayd.”

²⁶ Afta wan wik dɔn pas, di lanin bɔy dɛn bin gɛda bak na wan ples, ɛn lɔk ɔl di do dɛn. Tɔmɔs insɛf bin de wit dɛn. Pan ɔl we di do bin lɔk, Jizɔs jɛs kam midul dɛn bak ɛn se, “Mek Gɔd gi una kol at.”

²⁷ Dɛn Jizɔs tɔn to Tɔmɔs ɛn se, “Tek yu fiŋa tɔch mi tu an dɛn ɛn luk dɛn gud. Dɛn, tret yu an put am insay mi sayd. Lɛf fɔ dawt, biliv!”

²⁸ Tɔmɔs se, “Yu na mi Masta ɛn yu na mi Gɔd!”

²⁹ Jizɔs aks am se, “Yu dɔn biliv pan mi bikɔs yu dɔn si mi? Gɔd go blɛs dɛn wan we biliv pan ɔl we dɛn nɔ si mi.”

Wetin Mek dɛn Rayt dis Buk

³⁰ Jizɔs du plɛnti ɔda wɔndaful wok dɛn we in lanin bɔy dɛn si, bɔt dɛn nɔ rayt bɔt dɛn na dis buk.

³¹ Dɛn rayt dɛn tin we de na dis buk fɔ mek una biliv se Jizɔs na di Mɛsaya, Gɔd in Pikin; ɛn if una biliv pan am, una go gɛt tru layf.