Jɔn 18 - Krio Fɔs Oli Baybul

Dɛn Ol Jizɔs

¹ Afta Jizɔs dɔn pre dɔn, in ɛn in lanin bɔy dɛn kɔmɔt na di ples we dɛn bin de, dɛn krɔs wan watasay we dɛn kɔl Kidrɔn. Dɛn go insay wan gadin we bin lib de.

² Judas, we sɛl Jizɔs, bin no di ples gud gud, bikɔs Jizɔs ɛn in lanin bɔy dɛn bin dɔn go de plɛnti tɛm.

³ So Judas go mit Jizɔs ɛn di ɔda lanin bɔy dɛn na di gadin. I go wit sɔm Roman soja man dɛn ɛn sɔm pan dɛn pipul we bin de gyad Gɔd in Os. Na dɛn bigman we de mek sakrifays fɔ pipul sin ɛn di Faresi dɛn sɛn di gyad dɛn go wit Judas. Dɛn bin ol lamp, faya tik layt, ɛn tin fɔ tek fɛt.

⁴ Jizɔs bin dɔn no ɔl wetin gɛt fɔ bi to am, so i go mit di pipul dɛn we go fɔ ol am, ɛn aks dɛn se, “Udat una de luk fɔ?”

⁵ Dɛn se, “Wi de luk fɔ Jizɔs we kɔmɔt Nazarɛt.” Jizɔs se, “Na mi dis.” Judas, we go fɔ sɛl Jizɔs, bin tinap de wit di pipul dɛn.

⁶ Wɛn Jizɔs se, “Na mi dis,” di pipul dɛn kip bak ɛn fɔdɔm na grɔn.

⁷ Jizɔs aks dɛn igen se, “Udat una de luk fɔ?” Dɛn se, “Wi de luk fɔ Jizɔs we kɔmɔt Nazarɛt.”

⁸ Jizɔs se, “A bin dɔn tɛl una se, ‘Na mi dis,’ if na mi una de luk fɔ, una mek mi lanin bɔy dɛn go.”

⁹ Jizɔs tɔk dat, so dat wetin i bin dɔn tɔk we i se: “Papa, a nɔ lɔs wan sɛf pan dɛn wan we yu gi mi,” go bi.

¹⁰ Saymɔn Pita we bin gɛt sɔd, pul di sɔd ɛn kɔt di edman fɔ dɛn man we de mek sakrifays fɔ pipul sin in bɔy rayt yes kɔmɔt. Di bɔy bin nem Malkɔs.

¹¹ Jizɔs tɔn to Saymɔn Pita, i se, “Put yu sɔd bak na di ples we i bin de! Yu tink se a nɔ go sɔfa di sɔfa we mi Papa dɔn mak fɔ mi?”

Dɛn Kɛr Jizɔs Go bifo Anas

¹² Di Roman sojaman dɛn, di soja man dɛn bigman, ɛn di gyad dɛn ol Jizɔs ɛn tay am,

¹³ dɔn, fɔs dɛn kɛr am go bifo Anas we na bin Kaye fas in fadɛnlɔ, ɛn Kaye fas na bin di edman fɔ dɛn man we de mek sakrifays fɔ pipul sin, da ia de.

¹⁴ Na Kaye fas bin dɔn advays di Ju bigman dɛn se i bɛtɛ fɔ mek wan man day, pas fɔ mek ɔl di pipul dɛn day.

Pita Se In Nɔ No Jizɔs

¹⁵ Saymɔn Pita ɛn wan ɔda lanin bɔy bin de go wit Jizɔs. Di edman fɔ dɛn man we de mek sakrifays fɔ pipul sin bin no di ɔda lanin bɔy gud, so di lanin bɔy fala Jizɔs go insay di yad we bin de na di edman in os.

¹⁶ Bɔt Saymɔn Pita bin lɛf na do klos di get. Di ɔda lanin bɔy, we bin go insay wit Jizɔs, kɔmɔt na do bak, i tɔk to wan titi we bin tinap na di get, ɛn mek Pita kam insay di yad.

¹⁷ Di titi we bin de na di get aks Saymɔn Pita se, “Yusɛf nɔto wan pan da man de in lanin bɔy dɛn?” Saymɔn Pita se, “Nɔ-o, mi nɔto in lanin bɔy!”

¹⁸ Di ples bin so kɔl, dat di bɔy dɛn ɛn di gyad dɛn mek faya wit kol, dɔn dɛn go tinap rawnd di faya fɔ wam dɛnsɛf. So Saymɔn Pita go tinap wit dɛn fɔ wam insɛf na di faya.

Di Edman fɔ dɛn Man we De Mek Sakrifays fɔ Pipul Sin Kwɛshɔn Jizɔs

¹⁹ Di edman fɔ dɛn man we bin de mek sakrifays fɔ pipul sin aks Jizɔs bɔt in lanin bɔy dɛn ɛn di tin dɛn we i bin de lan pipul.

²⁰ Jizɔs ansa am se, “Na bifo ɔlman a kin tɔk, ɛn na dɛn Ju mitin os ɛn Gɔd in Os, we ɔlman kin gɛda, a kin lan pipul. A nɔ ayd fɔ tɛl ɛnibɔdi ɛnitin wande.

²¹ So, wetindu yu de aks mi kwɛshɔn? Aks dɛn pipul we yɛri wetin a tɔk, bikɔs dɛn no wetin a bin tɔk.”

²² Wɛn Jizɔs tɔk dat, wan pan di gyad dɛn we bin lib de slap am ɛn se, “Na so yu fɔ tɔk to di edman fɔ dɛn man we de mek sakrifays fɔ pipul sin?”

²³ Jizɔs ansa se, “If a tɔk ɛnitin we nɔ rayt, tɛl ɔlman we de na ya di tin we a tɔk we nɔ rayt. Bɔt if a rayt fɔ tɔk di tin we a tɔk, wetindu yu slap mi?”

²⁴ Anas mek dɛn kɛr Jizɔs go bifo Kaye fas we na bin di edman fɔ dɛn man we de mek sakrifays fɔ pipul sin. Dɛn nɔ bin lus Jizɔs yet.

Saymɔn Pita Dinay Jizɔs Bak

²⁵ Saymɔn Pita bin stil de klos di faya de wam in bɔdi. Di ɔda pipul dɛn we bin de wam dɛn bɔdi aks am se, “Yusɛf nɔto wan pan da man de in lanin bɔy dɛn?” Saymɔn Pita se, “Nɔ-o, mi nɔto in lanin bɔy!”

²⁶ Wan bɔy we bin de wok to di edman fɔ dɛn man we de mek sakrifays fɔ pipul sin we bin fambul to di man we Pita bin kɔt in yes kɔmɔt, se, “Nɔto yu a si wit am insay di gadin?”

²⁷ Pita dinay bak. I ansa se, “Nɔ!” Da sem tɛm de nain fɔl kro.

Dɛn Kɛr Jizɔs Go bifo Paylet

²⁸ Ali mɔnin di gyad dɛn go pul Jizɔs na Kaye fas in os kɛr am go na di gɔvnain os. Di Ju bigman dɛn nɔ go insay di gɔvnain os, bikɔs dɛn Ju Lɔ se if dɛn go insay os we pipul we nɔto Ju tap, dɛn nɔ go klin na Gɔd yay, ɛn dat go mek dɛn nɔ fit fɔ it pan di it we dɛn mek fɔ di Pasova.

²⁹ So Paylet go mit di pipul dɛn na do ɛn aks dɛn se, “Wetin dis man du?”

³⁰ Dɛn ansa Paylet se, “Wi nɔ bin fɔ briŋ dis man ya kam bifo yu if i nɔ bin du bad.”

³¹ Paylet se, “Una kɛr am go jɔj am bay una yon lɔ.” Di pipul dɛn se, “Una lɔ se wi nɔ fɔ ɛŋ pɔsin.”

³² (Ɔl dis bi fɔ mek wetin Jizɔs bin dɔn tɔk bɔt di kayn day we i go day, kam bi tru.)

³³ Paylet go insay di ples we dɛn de jɔj ɛn mek dɛn kɛr Jizɔs go mit am insay de. I aks Jizɔs se, “Na yu na di Ju pipul dɛn Kiŋ?”

³⁴ Jizɔs se, “Na yusɛf mekɔp fɔ aks mi dis kwɛshɔn ɔ na ɔda pipul tɛl yu bɔt mi?”

³⁵ Paylet se, “Mi na Ju? Na yu yon Ju pipul dɛn ɛn dɛn man we de mek sakrifays fɔ pipul sin briŋ yu kam bifo mi. Wetin yu du?”

³⁶ Jizɔs se, “Mi nɔto Kiŋ na dis wɔl, if mi na bin Kiŋ na dis wɔl, dɛn pipul we de fala mi bin fɔ fɛt fɔ mi mek pipul nɔ briŋ mi kam bifo di Ju bigman dɛn fɔ mek dɛn jɔj mi. Mi nɔto Kiŋ na dis wɔl.”

³⁷ Paylet aks am se, “Wɛl, yu na Kiŋ?” Jizɔs se, “Na yu se mi na Kiŋ. A bɔn kam na wɔl fɔ tɔk wetin tru. Ɛnibɔdi we lɛk wetin tru de yɛri mi wɔd.”

³⁸ Paylet aks am se, “Wetin na di tru wɔd?” Paylet go mit di pipul dɛn bak na do ɛn tɛl dɛn se, “Dis man ya nɔ du natin we fɔ mek a kɔndɛm am.

Paylet Lɛf Jizɔs Gi di Pipul dɛn

³⁹ Bɔt as a kin mek dɛn pul wan pɔsin kɔmɔt na jel ɛvri ia wɛn di Pasova ɔlide kam, una want mek a lɛf una Kiŋ?”

⁴⁰ Dɛn ansa lawd wan se, “Nɔ, nɔ lɛf da man de! Pul Bara bas kɔmɔt na jel.” (Bara bas na bin bad bad tifman.)