Jɔn 15 - Krio Fɔs Oli Baybul

Jizɔs Na di Tik we Ɔlman Kin Abop Pan

¹ “Mi na di tik we ɔlman kin abop pan ɛn na mi Papa de wok pan di gadin.

² Ɛni an we de pan mi we nɔ de bia, i de kɔt am kɔmɔt, ɛn ɛni an we de bia, i de trim am, so dat i kin bia mɔ.

³ Wetin a dɔn lan una dɔn mek una klin.

⁴ Una fɔ de wit mi ɔltɛm, ɛn misɛf go de wit una. Jɛs lɛkɛ aw ɛni an we de bay insɛf nɔ go bia pas i de pan di tik, semwe so, una nɔ go du natin pas una de wit mi ɔltɛm.

⁵ “Mi na di tik, una na di an dɛn. Ɛnibɔdi we de wit mi ɔltɛm ɛn misɛf de wit am ɔltɛm, da pɔsin de go ebul du plɛnti wok fɔ Gɔd; una nɔ go ebul du natin if a nɔ ɛp una.

⁶ Ɛnibɔdi we nɔ de wit mi ɔltɛm, Gɔd go ib am na do; i go tan lɛkɛ an pan tik, we dray we dɛn kin kɔt trowe; dɛn go gɛda dɛn an ya ib dɛn na faya, we dɛn go bɔn insay.

⁷ If una de wit mi ɔltɛm ɛn mi wɔd dɛn de na una at ɔltɛm, una kin aks mi Papa fɔ ɛnitin we una want, ɛn i go gi una.

⁸ If una du plɛnti gud tin, una go sho pipul aw mi Papa wɔndaful; ɛn una go sho se una na mi lanin bɔy dɛn.

⁹ A lɛk una lɛkɛ aw mi Papa lɛk mi. Una fɔ de wit mi ɔltɛm, so dat una go stil de ɛnjɔy ɔl di gud tin dɛn we a de du fɔ una bikɔs a lɛk una.

¹⁰ If una du wetin a tɛl una fɔ du, una go stil de ɛnjɔy di gud tin dɛn we a de du fɔ una bikɔs a lɛk una, jɛs lɛkɛ aw misɛf du wetin mi Papa tɛl mi fɔ du so a stil de ɛnjɔy di gud we i de du fɔ mi bikɔs i lɛk mi.

¹¹ “A dɔn tɛl una dɛn tin ya so dat una go gladi lɛkɛ aw a gladi, ɛn ɔl di gladi we fɔ de na una at go lib de.

¹² Di tin we a de tɛl una fɔ du nain dis: Una fɔ lɛk una kɔmpin lɛkɛ aw a lɛk una.

¹³ If pɔsin day fɔ in padi, nɔ lɛk nɔ pas da wande.

¹⁴ Una na mi padi dɛn if una du wetin a tɛl una fɔ du.

¹⁵ A nɔ de kɔl una bɔy igen, bikɔs bɔy nɔ no wetin in masta de du, bɔt a de kɔl una mi padi dɛn, bikɔs a dɔn tɛl una ɔl wetin mi Papa dɔn tɛl mi.

¹⁶ Nɔto una pik mi, na mi pik una; ɛn a pik una fɔ du plɛnti big wok we go mek ɔda pipul gɛt blɛsin sote go. Da tɛm de, mi Papa go gi una ɛnitin we una tek mi nem pre fɔ.

¹⁷ Na dat mek a de tɛl una se: Una fɔ lɛk una kɔmpin.

Di Pipul dɛn na Wɔl Nɔ Go Lɛk Una

¹⁸ “If di pipul dɛn na wɔl nɔ lɛk una, una fɔ jɛs mɛmba se na mi fɔs dɛn nɔ bin lɛk.

¹⁹ If una bin gɛt wanwɔd wit di pipul dɛn na wɔl, da tɛm de dɛn bin fɔ lɛk una lɛkɛ aw dɛn lɛk dɛn yon pikin dɛn. Bɔt a dɔn pik una kɔmɔt pan dɛn, una ɛn dɛn nɔ de si wan we, na dat mek dɛn nɔ lɛk una.

²⁰ Una fɔ mɛmba wetin a bin tɛl una we a se: ‘Slev nɔ pas in masta’. If pipul dɔn mek a sɔfa, dɛn go mek unasɛf sɔfa; if dɛn du wetin a lan dɛn, dɛn go du wetin unasɛf lan dɛn.

²¹ Bɔt dɛn go du una ɔl dɛn tin ya bikɔs una na mi yon pipul, ɛn dɛn nɔ no di wan we sɛn mi.

²² Dɛn nɔ bin fɔ no se Gɔd go mak dɛn fɔ dɛn sin, if a nɔ bin kam tɔk to dɛn, bɔt naw we a dɔn kam, dɛn nɔ go se dɛn nɔ bin no se dɛn sin.

²³ Ɛnibɔdi we nɔ lɛk mi, nɔ lɛk mi Papa.

²⁴ Dɛn nɔ bin fɔ no se Gɔd go mak dɛn fɔ dɛn sin if, di tɛm we a bin de wit dɛn, a nɔ bin du ɔl dɛn tin we nɔbɔdi nɔ du wande; bɔt dɛnsɛf dɔn si wetin a du, ɛn pan ɔl dat, dɛn nɔ lɛk mi ɛn mi Papa.

²⁵ Bɔt na so i fɔ bi, so dat di tin we rayt na dɛn yon Lɔ we se: ‘Dɛn nɔ lɛk mi, bɔt a nɔ du dɛn natin we fɔ mek dɛn nɔ lɛk mi,’ kin bi jɛs lɛkɛ aw i rayt.

²⁶ “Wɛn di wan we de ɛp pipul fɔ du wetin Gɔd want, kam, dat na di Spirit we kɔmɔt to mi Papa, i go mek pipul no di tru tin bɔt Gɔd. A go mek mi Papa sɛn am kam to una ɛn i go tɛl una bɔt mi.

²⁷ Ɛn unasɛf go tɔk bɔt mi, bikɔs una dɔn de wit mi frɔm di tɛm we a bin bigin lan pipul.