Jɔn 1 - Krio Fɔs Oli Baybul

Di Wɔd we Mek Pipul Gɛt Layf

¹ Bifo Gɔd mek di wɔl, di wan we dɛn kɔl di Wɔd bin dɔn de, i bin de wit Gɔd, in ɛn Gɔd na wan.

² Bifo Gɔd mek di wɔl, di Wɔd bin de wit Gɔd.

³ Tru di Wɔd, Gɔd mek ɔltin; natin nɔ de na wɔl we Gɔd mek we in an nɔ de pan.

⁴ Nain de gi ɔlman layf ɛn dis layf ya na di layt we de mek ɔlman si layt.

⁵ Di layt de shayn na dak, bɔt wande di daknɛs nɔ kɔba di layt.

⁶ Gɔd sɛn wan man we dɛn kɔl Jɔn kam na wɔl fɔ

⁷ kam tɛl pipul bɔt di layt, so dat ɔlman go biliv wɛn dɛn yɛri wetin i se.

⁸ Jɔn insɛf nɔto bin di layt, i bin jɛs kam fɔ tɛl pipul bɔt di layt nɔmɔ.

⁹ Di layt we i tɔk bɔt na di tru layt we kam na di wɔl, ɛn shayn pan ɔlman ɛn mek ɔlman si am.

¹⁰ Di Wɔd bin de na di wɔl, ɛn tru am Gɔd mek ɔltin na di wɔl, bɔt pan ɔl dat, di pipul dɛn na di wɔl nɔ bin no udat i bi.

¹¹ I go to in yon pipul dɛn, bɔt ivin dɛnsɛf nɔ bin want gɛt ɛnitin fɔ du wit am.

¹² Bɔt ɛnibɔdi we gladi fɔ mek i kam na dɛn layf ɛn biliv pan am, i gi dɛn di rayt fɔ bi Gɔd in pikin dɛn.

¹³ Dɛn nɔ bi Gɔd in pikin dɛn lɛkɛ aw dɛn pikin de bɔn na wɔl, dɛn nɔ bi Gɔd in pikin dɛn bikɔs na dat dɛn want ɔ bikɔs na dat ɔda pipul want, bɔt na Gɔd insɛf mek dɛn bi in pikin dɛn bikɔs na dat i want.

¹⁴ Di Wɔd kam bi mɔtalman ɛn tap wit wi, i mek wi no ɔltin we tru bɔt Gɔd, ɛn i du wi gud ɔltɛm. Wi si di wɔndaful ɔna ɛn pawa we i gɛt, ɛn na Gɔd gi am da wɔndaful ɔna ɛn pawa de, bikɔs in na di Papa in wangren Pikin.

¹⁵ Jɔn bin de tɛl pipul bɔt am. I bin de ala se, “Na di pɔsin dis we a bin de tɔk bɔt, wɛn a bin de se, ‘I go kam wɛn a dɔn du di wok we Gɔd sɛn mi fɔ kam du, bɔt i pas mi fawe, bikɔs i bin dɔn de bifo a bɔn.’”

¹⁶ Bikɔs i lɛk wi bad, i dɔn blɛs wi ɔl ɛn i de blɛs wi mɔ ɛn mɔ

¹⁷ Gɔd mek Mozis gi wi di Lɔ, bɔt i mek Jizɔs Krays sho wi aw i lɛk wi ɛn tɛl wi ɔl di tru tin dɛn bɔt insɛf.

¹⁸ Nɔbɔdi nɔ si Gɔd wande. Gɔd in wangren Pikin, we in ɛn in Papa gɛt wan at, nain mek pipul no udat na Gɔd.

Jɔn we de Baptayz Tɔk bɔt di Wok we I De Du

¹⁹ Di Ju bigman dɛn na Jerusɛlɛm sɛn sɔm pan dɛn man we de mek sakrifays fɔ pipul sin ɛn sɔm pan di wan dɛn we de ɛp dɛn fɔ go aks Jɔn udat i bi.

²⁰ Jɔn nɔ twis ɛn tɔn fɔ ansa dɛn, i tɛl dɛn plen wan se in nɔto di Mɛsaya.

²¹ Wɛn Jɔn ansa dɛn, dɛn se, “Udat na yu? Yu na Ilayja?” Jɔn ansa se, “Nɔ, mi nɔto Ilayja.” Dɛn aks am igen se, “Yu na da prɔfɛt we wi bin de luk rod fɔ?” Jɔn se, “Nɔ.”

²² Dɛn se, “Wɛl, tɛl wi udat yu bi? Di pipul dɛn we sɛn wi kam to yu go aks wi ɛn wi fɔ gɛt ansa fɔ gi dɛn. Wetin yu kin tɛl wi bɔt yusɛf?”

²³ Wɛn Jɔn de ansa dɛn, i tɔk wetin di prɔfɛt we nem Ayzaya bin dɔn tɔk. I se: “ ‘A de tɔk lawd wan, lɛkɛ we sɔmbɔdi de tɔk lawd wan na di dɛzat se: Una klia di rod we di Masta fɔ pas ɛn mek i tret!’”

²⁴ Di mɛsenja dɛn we di Faresi dɛn sɛn,

²⁵ aks Jɔn se, “If yu nɔto di Mɛsaya, ɛn yu nɔto Ilayja, ɛn yu nɔto di prɔfɛt we wi de luk fɔ, wetindu yu de baptayz pipul?”

²⁶ Jɔn ansa se, “Mi de baptayz pipul wit wata, bɔt sɔmbɔdi de wit una, we una nɔ no.

²⁷ I go kam wɛn a dɔn du di wok we Gɔd sɛn mi fɔ kam du, a nɔ fit sɛf fɔ lus di les nain sus.”

²⁸ Ɔl dɛn tin ya bi na Bɛtani we de na di istɛn pat na Riva Jɔdan. Jɔn bin de baptayz pipul na Riva Jɔdan.

Di Wan we De Padin di Pipul dɛn Sin

²⁹ Di ɔda de Jɔn si Jizɔs de kam, nain i se, “Luk di Pɔsin we Gɔd sɛn fɔ padin mɔtalman sin!

³⁰ Nain a bin de tɔk bɔt wɛn a se, ‘Wan man de kam afta a dɔn du di wok we Gɔd sɛn mi fɔ kam du, i pas mi fawe bikɔs i bin dɔn de bifo a bɔn.’

³¹ A nɔ bin no udat da pɔsin de go bi, bɔt wɛn a kam a bigin baptayz pipul wit wata, so dat di Izrɛl pipul dɛn go kam gɛt fɔ no udat i bi bambay.”

³² Dɛn Jɔn tɔk bɔt wetin i bin si, i se: “A si Gɔd in Spirit de kɔmɔt ɔp na ɛvin kam dɔŋ lɛkɛ dɔv kin kam dɔŋ. I kam pan am ɛn de wit am.

³³ A nɔ bin no yet se nain na di Pɔsin we a de wet, bɔt Gɔd we sɛn mi fɔ baptayz pipul wit wata bin dɔn tɛl mi bɔt am. I bin se, ‘Yu go si di Spirit kam dɔŋ pan wan pɔsin ɛn de wit am; na di pɔsin dat we go baptayz pipul wit Gɔd in Spirit.’”

³⁴ Jɔn se, “A dɔn si wetin bi, ɛn a de tɛl una se dis man na Gɔd in Pikin.”

Di Fɔs Lanin Bɔy dɛn we Jizɔs Gɛt

³⁵ Di ɔda de Jɔn bin tinap na di sem ples we i de baptayz pipul wit tu pan in lanin bɔy dɛn.

³⁶ Wɛn Jɔn si Jizɔs de pas, i se, “Una luk di pɔsin we go padin pipul dɛn sin!”

³⁷ Wɛn Jɔn in tu lanin bɔy dɛn yɛri wetin Jɔn tɔk, dɛn bigin fala Jizɔs.

³⁸ Wɛn Jizɔs tɔn, i si dɛn de fala am, nain i aks dɛn se, “Wetin una de luk fɔ?” Dɛn aks am se, “Rabay, usay yu tap?” (Rabay min Ticha.)

³⁹ Jizɔs se, “Una kam luk!” So dɛn fala am go luk usay i tap; na bin santɛm, bay dɛn fo oklɔk, so dɛn de wit am sote ivintɛm.

⁴⁰ Wan pan di pipul dɛn we bin fala Jizɔs go na bin Andru we na bin Saymɔn Pita in brɔda.

⁴¹ Andru go fɛn in brɔda Pita wantɛm ɛn tɛl am se, “Wi dɔn si di pɔsin we Gɔd sɛn fɔ sev ɔlman, di wan we dɛn kɔl Mɛsaya.” (Mɛsaya min “Krays” na Grik.)

⁴² Andru kɛr Saymɔn go to Jizɔs. Jizɔs luk Saymɔn ɛn se, “Yu nem na Saymɔn ɛn yu na Jɔn in pikin, bɔt yu nem go bi Sifas.” (Sifas ɛn Pita gɛt di sem minin, dat na “Rɔk”.)

Jizɔs Aks Filip ɛn Natanyɛl fɔ Bi In Lanin Bɔy dɛn

⁴³ Di ɔda de Jizɔs mekɔp fɔ go na Galili. Wɛn i de go, nain i mit Filip, i tɛl am se, “Kam bi wan pan mi lanin bɔy dɛn!”

⁴⁴ Na Bɛtsayda, di tɔŋ we Andru ɛn Pita bin de, Filip kɔmɔt.

⁴⁵ Filip go luk fɔ Natanyɛl ɛn tɛl am se, “Wi dɔn si di man we Mozis bin rayt bɔt na di Lɔ buk, ɛn we di prɔfɛt dɛnsɛf bin rayt bɔt. Na Jizɔs we kɔmɔt Nazarɛt we na Josɛf in pikin.”

⁴⁶ Natanyɛl aks Filip se, “Ɛni tin gud kin kɔmɔt Nazarɛt?” Filip ansa am se, “Kam luk!”

⁴⁷ Wɛn Jizɔs si Natanyɛl de kam, i se, “Luk man we kɔmɔt Izrɛl fɔ tru, i nɔ gɛt nɔ bɛnbɛn, i nɔ de mek pɔsin ful.”

⁴⁸ Natanyɛl aks Jizɔs se, “Aw yu du no mi?” Jizɔs ansa am se, “A bin si yu wɛn yu bin de ɔnda da fig tik bifo Filip kɔl yu.”

⁴⁹ Natanyɛl se, “Ticha, yu na Gɔd in Pikin! Yu na di Kiŋ na Izrɛl!”

⁵⁰ Jizɔs aks am se, “Na bikɔs a tɛl yu nɔmɔ se a bin dɔn si yu wɛn yu bin de ɔnda di fig tik, mek yu biliv pan mi? Yu go si tin dɛn we pas dis fawe.”

⁵¹ Jizɔs tɛl dɛn igen se, “A de tɛl una fɔ tru se: una go si ɛvin opin, una go si Gɔd in enjɛl dɛn de kɔmɔt ɛvin kam dɔŋ to Mɔtalman Pikin ɛn go ɔp bak, dɛn go de go ɔp ɛn dɔŋ.”