Jɛrimaya 8 - Krio Fɔs Oli Baybul

¹ PAPA GƆD se, “Da tɛm de, dɛn go pul di kiŋ dɛn na Juda dɛm bon, dɛn bigman dɛm bɔn dɛm, di man dɛn we de mek sakrifays fɔ pipul sin dɛn bon, dɛn prɔfɛt dɛn bon, ɛn di wan dɛn we tap na Jerusɛlɛm dɛn bon, kɔmɔt na dɛn grev;

² ɛn dɛn go prɛd dɛm bifo di san ɛn di mun, ɛn ɔl wetin de ɔp di klawd, we dɛn bin lɛk ɛn bin de sav, di tin dɛn we dɛn bin de rɔn afta, tin dɛn we dɛn bin de fɛn ɛn wɔship; dɛn nɔ go gɛda dɛm bɛr dɛm; dɛn go tan lɛk kaw tɔylɛt na grɔn.

³ PAPA GƆD Ɔlmayti se, ‘di wan dɛn we go lɛf pan dis ivul famili, go prifa fɔ day dan fɔ liv, na di ples dɛn we a dɔn drɛb dɛm go.’

Sin Ɛn Pɔnishmɛnt

⁴ Yu go tɛl dɛm se, “Na dis PAPA GƆD se; wɛn mɔtalman fɔdɔm, dɛn nɔ de grap bak? If pɔsin kɔmɔt biɛn pɔsin, i nɔ kin tɔn bak kam?

⁵ Wetindu dɛn pipul ya dɔn tɔn dɛn bak pan mi ɛn nɔ gri tɔn bak? Dɛn biliv pan lay lay tin dɛn gud gud wan, ɛn nɔ gri tɔn bak kam to mi.

⁶ A dɔn pe atɛnshɔn to dɛm ɛn dɔn lisin dɛm, bɔt dɛn nɔ tɔk tru; nɔn pan dɛm nɔ ripɛnt fɔseka in wikɛdnɛs, bifo dat dɛn de aks se, ‘wetin a du?’ Ɔlman de go in yon we, lɛkɛ we ɔs de rɔn go insay batul fil.

⁷ Ivin kaw enjɛl we de flay ɔp di klawd no tɛm fɔ tɔmbak; dɛn dɔv, di bɔd we dɛn kɔl swalo, ɛn di big bɔd we dɛn kɔl kren, sɛf no tɛm fɔ tɔn bak go om; bɔt mi pipul dɛn nɔ no PAPA GƆD in lɔ.

⁸ ‘Aw una go se, ‘wi gɛt sɛns, ɛn PAPA GƆD in lɔ de to wi?’ A de tɛl una, dɛn sɛktri dɛn lay lay pɛn dɛn dɔn mek i dɔn tɔn to lay lay.

⁹ Dɛn go mek di sɛnsman dɛn shem, dɛn go kɔnfyus ɛn dɛn go kech dɛm; wetindu? Dɛn dɔn put PAPA GƆD in wɔd wansay, uskayn sɛns dɛn gɛt naw?

¹⁰ Fɔseka dat, a go gi dɛn wɛf dɛm to ɔda man dɛn ɛn dɛn fam dɛm to di wan dɛn we go win dɛm, bikɔs, frɔm di lili wan to di big wan, ɔlman awn awn fɔ tif tif prɔpati; frɔm di prɔfɛt to di man we de mek sakrifays fɔ pipul sin, ɔlman de pan rikishi.

¹¹ Dɛn dɔn mɛn mi pipul dɛn wund layt wan, we dɛn de se, ‘kol at, kol at,’ we kol at nɔ de.

¹² Dɛn bin shem wɛn bin de du di tin dɛn we a nɔ lɛk? Nɔ, dɛn nɔ bin shem at ɔl; dɛn nɔ bin no aw fɔ mɛlt. Fɔseka dat, dɛn go day wit dɛn wan dɛm we go day; wɛn a pɔnish dɛm, a go ib dɛm oba. Na so PAPA GƆD se.

¹³ PAPA GƆD se, “Wɛn a go gɛda dɛm, nɔn greps nɔ de na di greps tik, ɛn nɔn fignɔt na de na di fig tik; ivin di lif dɛm dɔn wida, ɛn wetin a bin gi dɛm nɔ de pan dɛn igen”

¹⁴ Wetin mek wi de sidɔm ɛn nɔ de du natin? Una gɛda wan ples, lɛ wi go na di siti dɛm we gɛt wɔl rawnd go day de; bikɔs PAPA GƆD we na wi Gɔd dɔn swɛ wi fɔ day, ɛn i dɔn gi wi pɔyzin wata fɔ drink, bikɔs wi dɔn kɔmit sin to PAPA GƆD.

¹⁵ Wi luk fɔ kol at, bɔt nɔn gud nɔ kɔmɔt bien, wi luk fɔ tɛm fɔ mɛn wisɛf, bɔt na tin dɛn we mek wi fred apin.

¹⁶ Dɛn yɛri dɛn ɔs dɛn we dɛn de sniz ɔl di we na Dan; we dɛn man ɔs dɛn de ala, di wanol land de shek. Dɛn kam kam it ɔltin na di land ɛn wetin fulɔp de, dat na di siti ɛn dɛn wan dɛn we tap de.

¹⁷ Bikɔs, a de sɛn snek dɛm go tap wit una da smɔl ɛn pɔyzinɔs snek we dɛn nɔ go ebul tem, ɛn dɛn go bɛt una, Na so PAPA GƆD se.

Jɛrimaya Sɔri Fɔ In Pipul Dɛm

¹⁸ Mi sɔro nɔ de dɔn, mi at sik.

¹⁹ Yɛri, mi pipul dɛn gyal pikin dɛn kray, ɔlɔbɔt na di land; “PAPA GƆD nɔ de na Zayɔn? In kiŋ nɔ de de? “Wetindu dɛn provok mi te a vɛks wit dɛn lay lay gɔd dɛn, ɛn wit fɔrin lay lay gɔd dɛm?”

²⁰ “Di avɛst dɔn pas, ɛn di dray sizin dɔn dɔn, ɛn wi nɔ sev.”

²¹ Bikɔs mi pipul dɛn gyal pikin dɛn wund de na mi at, Mi at pwɛl, ɛn pwɛlat dɔn kech mi.

²² Mɛrɛsin nɔ de na Giliad? Dɔkta nɔ de de? So wetindu mi pipul dɛn gyal pikin nɔ wɛl te tide?