Jɛrimaya 7 - Krio Fɔs Oli Baybul

Jɛrimaya Prich Insay Di Tɛmpul

¹ Dis na PAPA GƆD in wɔd we bin kam to Jɛrimaya:

² “Tinap na di get na PAPA GƆD in os ɛn anawns to di pipul dɛn se, Una yɛri wetin PAPA GƆD se, una ɔl di man dɛm na Juda we de pas na dɛn get ya kam insay fɔ kam wɔship PAPA GƆD.

³ Na dis PAPA GƆD Ɔlmayti we na Izrɛl dɛn Gɔd se, “Una chenj di we we una de biev ɛn di tin dɛn we una de du, ɛn a go mek una tap na dis ples.

⁴ Una nɔ abop pan dɛn wɔd dɛn ya we dɛn de tek mek una fil se na tru tin dɛn de du: ‘Dis na PAPA GƆD in Tɛmpul, PAPA GƆD in tɛmpul, PAPA GƆD in tɛmpul.’

⁵ “Bikɔs if una chenj una we ɛn fɔ tru tru lɛf dɛn tin dɛn we una de du, if una trit ɔlman di sem fɔ tru tru, ɛn gi udat gɛt rayt in rayt,

⁶ if una nɔ sɔprɛs dɛn trenja, dɛn pikin dɛn we dɛn mami ɛn dadi dɔn day, ɔ uman we in man dɔn day, ɔ kil inosɛnt pɔsin na ya, ɛn if una nɔ de biɛn ɔda gɔd dɛm we dat go ambɔg una,

⁷ a go mek una tap na ya, dis land we a bin dɔn gi una fɔstɛm-papa dɛm sote go.

⁸ “Una lisin, una abop pan wetin dɛn de tɔk fɔ ful una, we na wɔd dɛm we nɔ go bɛnifit una.

⁹ Una go tif, kil pɔsin, kɔmit adɔltri, swɛ fɔ natin, bɔn insɛns to Beal, ɛn wɔship ɔda gɔd dɛm we una nɔ bin no,

¹⁰ ɛn kam bak kam tinap bifo mi insay dis os, we na mi os, ɛn se ‘wi dɔn fri!’– Pas nɔmɔ fɔ mek una stil de du dɛn bad bad tin dɛn ya we a nɔ lɛk?

¹¹ PAPA GƆD se, Mi os dɔn tɔn to tifman os na una yay? Biliv mi, misɛf dɔn si dat.

¹² Una go naw naw na mi ples we bin de na shilo, usay na di fɔs ples we a bin mek mi nem tap, ɛn go si wetin a du am fɔseka di wikɛdnɛs we mi pipul dɛn we na Izrɛl, bin de du.

¹³ PAPA GƆD se, ɛn rayt naw, bikɔs una dɔn du ɔl dɛn tin ya, ɛn wɛn a bin de tɔk to una ɛn nɔ de blo, una nɔ bin lisin, ɛn wɛn a kɔl una, una nɔ ansa,

¹⁴ a go du di os, we dɛn de kɔl wit mi nem, ɛn we we na pan am una abop, ɛn di ples we a gi una ɛn una fɔstɛm-papa dɛm, di sem tin we a bin du Shilɔ.

¹⁵ Ɛn a go drɛb una kɔmɔt bifo mi, lɛkɛ we a drɛb ɔl una kɔntriman dɛm, we na Ifrem in pikin dɛm.

Di Traŋayes We Di Pipul Dɛn Traŋayes

¹⁶ “As fɔ yu, nɔ pre fɔ dɛn pipul dɛn ya, ɔ kray ɔ ala de pre fɔ dɛm, ɛn nɔ tray fɔ chenj mi maynd, bikɔs a nɔ go lisin yu.

¹⁷ Yu nɔ si wetin dɛn de du na di siti dɛn na Juda ɛn na di trit dɛn na Jerusɛlɛm?

¹⁸ Di pikin dɛm de gɛda wud, di papa dɛn de layt faya, ɛn di uman dɛn de miks flawa mek do, fɔ mek kek fɔ di kwin ɔf ɛvin, ɛn de tɔn drink na grɔn de mek sakrifays to ɔda gɔd dɛm, fɔ provok mi mek a a go vɛks.

¹⁹ PAPA GƆD se, “Na mi dɛn de provok? Nɔto dɛnsɛf, fɔ kɔnfyus dɛnsɛf?

²⁰ PAPA GƆD Ɔlmayti se, “A go put mi animal, a go put am pan tik dɛm na bush ɛn di frut dɛn we de gro kɔmɔt na grɔn; i go bɔn ɛn i nɔ go ɔt.”

²¹ Na dis PAPA GƆD Ɔlmayti, we na Izrɛl dɛn Gɔd se, “Una ad una sakrifays we dɛn de bɔn na faya to una sakrifays dɛm ɛn it di flɛsh.

²² Bikɔs di tɛm we a pul dɛm kɔmɔt na di land ɔf Ijipt, a nɔ bin tɔk to una Papa dɛm ɔ kɔmand dɛm bɔt ɔfrin we de bɔn na faya ɔ sakrifays dɛm.

²³ Bɔt, na dis kɔmand a bin gi dɛm se, ‘Obe mi vɔys, ɛn a go bi una Gɔd ɛn una go bi mi pipul dɛm; una liv aw a se una fɔ liv, so dat una go ɛnjɔy una layf.’

²⁴ Bɔt dɛn nɔ obe mi ɛn nɔ ivin pe atɛnshɔn to mi, bɔt dɛn bin de du wetin dɛn maynd tɛl dɛm ɛn wetin dɛn stɔbɔn at dɛn se, ɛn bin jɛs de go biɛn; dɛn nɔ go bifo wan stich.

²⁵ Frɔm di de we una papa dɛm kɔmɔt Ijipt, te tide, a nɔ de taya fɔ sɛn ɔl mi wokman dɛn we na di prɔfɛt dɛm, to dɛm, de afta de;

²⁶ pan ɔl dat, dɛn nɔ yɛri mi wɔd ɔ pe atɛnshɔn to mi, bɔt dɛn kɔk dɛn yes. Dɛn du wɔs tin pas dɛn fɔstɛmpapa dɛm.

²⁷ “Na so yu go tɔk ɔl dɛn tin ya to dɛm, bɔt dɛn nɔ go lisin yu. Yu go kɔl dɛm bɔt dɛn nɔ go ansa yu.

²⁸ Ɛn yu go tɛl dɛm se, ‘Na di neshɔn dis we nɔ yɛri PAPA GƆD we na dɛn Gɔ in wɔd, ɛn nɔ gri mek i kɔntrol dɛm; di tru dɔn day; i nɔ de na dɛn mɔt igen

Di Sinful Tin Dɛn We Apin Na Di Vali Ɔf Inɔm

²⁹ Una kɔt una ia trowe; una kray na dɛn ɛmti mawnten dɛn bikɔs PAPA GƆD dɔn se i nɔ want ɛn pul an pan di jɛnareshɔn we kin mek i vɛks bad bad wan.’

³⁰ PAPA GƆD se, “na bikɔs di bɔypikin dɛn na Juda dɔn du ivul tin dɛn bifo mi fes; dɛn dɔn du di bad bad tin dɛn we a nɔ lɛk na mi os we mi nem de, fɔ dɔti am na mi yay.

³¹ Ɛn dɛn dɔn bil wan ɔlta we nem Tɔfɛt, we de na Inɔm in bɔypikin in vali, fɔ bɔn dɛn bɔy ɛn gyal pikin dɛm na faya; tin we a nɔ tɛl dɛn fɔ du, ɛn dat nɔ bin kam na mi maynd sɛf.

³² PAPA GƆD se, “a de tɛl una, fɔseka dat, di tɛm de kam we dɛn nɔ go kɔl am Tɔfɛt ɔ Inɔm in bɔypikin in vali, bɔt dɛn go kɔl am, di Vali ɔf slɔta: bikɔs dɛn go de bɛr na Tɔfɛt, bikɔs, ples nɔ de ɔda say.

³³ Ɛn dɛn pipul ya dɛn dedebɔdi dɛm, go bi it fɔ dɛn bɔd dɛn we de flay ɔp di klawd, ɛn fɔ dɛn wayl animal dɛn na wɔl; ɛn nɔbɔdi nɔ go skyad dɛm.

³⁴ Ɛn a go mek gladi gladi ɛn ɛnjɔymɛnt, ɛn ɔkɔ ɛn yawo vɔys, lɔs na di siti dɛn na Juda ɛn di trit dɛm na Jerusɛlɛm, bikɔs di land nɔ go gud fɔ natin.