Jɛrimaya 6 - Krio Fɔs Oli Baybul

Ɛnimi Dɛn Sɔrawnd Jerusɛlɛm

¹ Una rɔn go ayd, una Bɛnjamin in pikin dɛm, una rɔn kɔmɔt insay Jerusɛlɛm! Una blo di trɔmpɛt na Tɛkoa, ɛn put sayn ɔp na Bɛtachɛrɛm; bikɔs bad bad tin de na rod de kam kɔmɔt na di nɔt, ɛn ebi ebi nyakanyaka.

² A go pwɛl di fayn fayn wan we dɛn tek tɛm mɛn, we na Zayɔn in gyal pikin.

³ Sɔm shɛpad ɛn dɛn ship dɛn go kam fɛt am; dɛn go mek dɛn tɛnt dɛn rawnd am, ɔlman go mɛn dɛn animal dɛm usay dɛn want.

⁴ “Una rɛdi fɔ mek wa pan am; una grap, lɛ wi atak am twɛlv oklɔk santɛm!” “Swɛ dɔn kech wi, bikɔs di de de dɔn, bikɔs ivintɛm shado dɛn dɔn bigin lɔŋ!”

⁵ “Una grap, lɛ wi atak am na nɛt, ɛn nyakanyaka di kiŋ in os dɛm we de de!”

⁶ Bikɔs PAPA GƆD Ɔlmayti se, “Una kɔt kɔt in tik dɛm; bil ay dɔti rawnd Jerusɛlɛm fɔ blɔk dɛm. Na di siti dis we dɛn fɔ pɔnish; na so so sɔprɛshɔn de de.

⁷ Lɛkɛ aw i de mek shɔ se in wata frɛsh, na semweso in de mek shɔ se in wikɛdnɛs frɛsh; na fɛtfɛt ɛn nyakanyaka, yu go yɛri de; ɔltɛm na siknɛs ɛn wund a de si.

⁸ A de wɔn una o, Jerusɛlɛm, if nɔ so, a go avɔyd una; if nɔ so a mek yu ɛmti ples, land we nɔbɔdi nɔ tap.”

Izrɛl We Tɔn Bak Gi PAPA GƆD

⁹ Na dis PAPA GƆD Ɔlmayti se; “Dɛn go ɛmti di balans pipul dɛn kɔmɔt Izrɛl lɛkɛ we dɛn kin klin greps fam te natin nɔ lɛf; pas yu an pan in branch dɛn wantɛm mɔ, lɛkɛ aw dɛn wan dɛn we de pik greps kin du.”

¹⁰ Udat a go tɔk to ɛn wɔn, so dat dɛn go yɛri? I bi se, dɛn yes dɛn lɔk, dɛn nɔ ebul lisin; I bi se, to dɛm, PAPA GƆD in wɔd na tin fɔ laf, dɛn nɔ gɛt tɛm fɔ am.

¹¹ Fɔseka dat, PAPA GƆD in sem vɛksteshɔn ful insay mi; A dɔn taya fɔ bia kip am insay mi. “Empti am pan dɛn pikin na trit, ɛn igen, pan dɛn yɔŋbɔy dɛm ɔl usay dɛn gɛda; dɛn go kɛr mared man ɛn in wɛf go, di ol grani ɛn grampa dɛm, ɛn di wan dɛnsɛf we dɔn olpasmak.

¹² Dɛn go gi ɔda pipul dɛn, dɛn os dɛm, wit dɛn fam ɛn dɛn wɛf dɛm sɛf; bikɔs a go pɔnish di pipul dɛn na di land,” na so PAPA GƆD se.”

¹³ Bikɔs, frɔm di smɔl wan to di wan we big pas dɛn ɔl, dɛn ɔl want fɔ mek tif tif prɔfit; ɛn, frɔm prɔfɛt to man we de mek sakrifays fɔ pipul sin, dɛn ɔl de ple yuki yuki gem.

¹⁴ Dɛn dɔn mɛn mi pipul dɛn wund af ɛn af, we dɛn de se, ‘Una gɛt kolat, una gɛt kolat,’ we wan kolat nɔ de.

¹⁵ Dɛn bin de shem we dɛn bin de du dɛn bad bad tin dɛn we a nɔ lɛk? Nɔ, dɛn nɔ bin de shem; dɛn nɔ bin no aw fɔ shem. Fɔseka dat, dɛn go day wit dɛn wan dɛn we go day; na di tɛm we a go pɔnish dɛm dɛn yon go dɔn,” na so PAPA GƆD se.

Izrɛl Nɔ Gri Tek PAPA GƆD In We

¹⁶ Na dis PAPA GƆD se, “Una go tinap na forod ɛn wach, una aks fɔ dɛn ol rod, usay di gud rod de; ɛn una waka de, ɛn fɛn kolat fɔ una sol. Bɔt dɛn se, ‘we nɔ go waka de.’

¹⁷ A put pɔsin fɔ de wach una, ɛn tɛl una se, ‘Una lisin fɔ di trɔmpɛt!’ Bɔt dɛn se, ‘wi nɔ go lisin.’

¹⁸ Fɔseka dat, una yɛri o, una di neshɔn dɛm, mek una no, una di pipul dɛm we gɛda bifo PAPA GƆD, wetin go apin to dɛm.

¹⁹ Yɛri o, yu ath, a de briŋ dizasta kam pan dɛn pipul ya, we na di pe we dɛn fɔ gɛt fɔ di wok we dɛn du, bikɔs dɛn nɔ yɛri mi wɔd; as fɔ mi lɔ dɛm, dɛn nɔ de obe dɛm sɛf.

²⁰ Wetin mek insɛns de kɔmɔt Shiba kam fɔ mi, ɔ wetindu shuga ken de kɔmɔt fawe kam fɔ mi? Una sakrifays dɛn we una de bɔn na faya, nɔ gud fɔ mi fɔ gri fɔ, jɛs lɛk we una sakrifays dɛn nɔ kin pliz mi.

²¹ Fɔseka dat na dis PAPA GƆD se: “A de tɛl una, A go put blɔk we de mek pɔsin fɔdɔm bifo dɛn pipul ya, blɔk we de mek pɔsin fɔdɔm we dɛn go bɔk dɛn fut pan; di papa dɛm ɛn di bɔypikin dɛm togɛda, neba ɛn padi go day.”

Atak We Kɔmɔt Na De Nɔt

²² Na dis PAPA GƆD se, “A de tɛl una, saten pipul dɛn de kɔmɔt di kɔntri we de na di nɔt, wan big big neshɔn we de usay di wɔl ɛnd, de rɛdi fɔ fɛt wa.

²³ Dɛn dɔn ol bo ɛn spia dɛn wikɛd ɛn dɛn nɔ de sɔri fɔ nɔbɔdi, di sawnd we dɛn de mek tan lɛkɛ we di si de tɔnɔbɔ; dɛn de rayd ɔs, dɛn drɛs lɛkɛ man we rɛdi fɔ fɛt wa, agens yu, yu Zayɔn in gyal pikin.”

²⁴ Wi dɔn yɛri bɔt dat, wi an dɛm dɔn wik; pen dɔn ol wi da pen we uman de fil we i de bɔn.

²⁵ Una nɔ go na fam, ɛn una nɔ waka na forod; bikɔs di ɛnimi gɛt sɔd, fred fred de ɔlɔbɔt.

²⁶ Yu mi pipul dɛn gyal pikin, go wɛr saklɔth, ɛn rol rolpan ashis; mek sɔri lɛk na fɔ yu wangren bɔypikin yu de munin fɔ, kray bita bita wan pas ɔl; bikɔs i nɔ go te igen, di wan we de kil pipul dɔn kam fɔ kil wi.

²⁷ “A dɔn mek yu di pɔsin we de tɛst mi pipul dɛm ɛn mek dɛn biev bɛtɛ pas fɔs, so dat yu go no ɛn tɛst dɛn aw dɛn liv ɛn wetin dɛn de du.

²⁸ Dɛn na traŋayes rebɛl dɛm, we de ɔlɔbɔt de koŋosa; dɛn na bras ɛn ayɛn, dɛn ɔl kɔrɔpt.

²⁹ Di kaw kanda de blo di fawa ebi ebi wan, di faya de mɛlt di lɛd; na fɔ natin dɛn de tray fɔ chenj di we, we dɛn de biev, bikɔs wikɛd pɔsin nɔ de chenj.

³⁰ Dɛn kɔl dɛm, “Silva we nɔbɔdi nɔ want,” bikɔs PAPA GƆD dɔn se I nɔ wan dɛm atɔl.”