Jɛrimaya 52 - Krio Fɔs Oli Baybul

Jerusɛlɛm Fɔdɔm

¹ Zɛdikaya bin twɛnti-wan ia we i bi kiŋ; ɛn i bin tap na Jerusɛlɛm de rul fɔ ilɛvin ia. In mama nem Aamutal, we na Jɛrimaya we de Libna, in gyalpikin.

² Ɛn i bin du tin dɛn we ivul na PAPA GƆD in yay, jɛs lɛk wetin Jɛoiakim bin du.

³ Fɔ tru tru, bikɔs PAPA GƆD bin vɛks bad bad wan, di kayn tin dɛm we apin na Jerusɛlɛm ɛn Juda, bin mek PAPA GƆD trowe dɛm kɔmɔt bifo am. Ɛn Zɛdikaya bin ribɛl agens di kiŋ na Babilɔn.

⁴ Ɛn insay di de we mek tɛn na di tɛn mɔnt insay di ia we mek nayn we i ren, Nɛbyukadnɛza we na kiŋ na Babilɔn bin kam wit ɔl in ami kam atak Jerusɛlɛm, ɛn dɛm bin sɔrawnd dɛm ɛn bin dig gɔta dɛm ɔlɔbɔt.

⁵ So, dɛn bin sɔrawnd di siti sote di ia we mek kiŋ Zɛdikaya Ilɛvin ia na pawa.

⁶ Di de we mek nayn insay di mɔnt we mek fo, di aŋri bin dɔn so pasmak na di siti dat natin nɔ bin de fɔ di pipul dɛn fɔ it.

⁷ Nain dɛn du wan bad tin we dɛn nɔ fɔ du, na di siti; ɔl di sojaman dɛm rɔnawe kɔmɔt na di siti na nɛt, ɛn pas na wan get we de bitwin di tu wɔl we de nia di kiŋ in gadin, ɛn di Babilonian dɛm bin de rawnd di siti. Dɛn bin go bay Riva Jɔdan say.

⁸ Bɔt di Babilonian ami bin rɔnata di kiŋ, ɛn kech Zɛdikaya na di flat grɔn na Jɛriko; ɛn ɔl in sojaman dɛm bin skata ɛn nɔ bin de nia am.

⁹ Nain dɛm kapchɔ di kiŋ, ɛn briŋ am kam to di kiŋ na Babilɔn, na Ribla insay Amat, ɛn i pas sɛntɛns pan am.

¹⁰ Di kiŋ na Babilɔn bin kil Zɛdikaya in bɔypikin dɛm bifo in fes, ɛn kil ɔl di bigman dɛm na Juda, insay Ribla.

¹¹ I pul Zɛdikaya in yay dɛm, ɛn tay am wit chen, ɛn di kiŋ na Babilɔn bin kɛr am go na Babilɔn ɛn put am na jel, sote di de we i day.

Dɛn Nyakanyaka Di Tɛmpul

¹² Di de we mek tɛn insay di mɔnt we mek fayv insay di ia we mek Kiŋ Nɛbyukadnɛza nayntin ia na pawa na Babilɔn– Nɛbyuzaradan we na di kapten pan di gyadman dɛm we de wok fɔ di kiŋ na Babilɔn, bin go na Jerusɛlɛm.

¹³ I bɔn PAPA GƆD in os, i bɔn di kiŋ in os ɛn ɔl di os dɛm na Jerusɛlɛm; i bɔn ɔl dɛn big big os dɛm.

¹⁴ Ɛn ɔl di Babilonian sojaman dɛm we bin de wit di kapten pan di gyadman dɛm, brok ɔl di wɔl we de rawnd Jerusɛlɛm.

¹⁵ Ɛn Nɛbyuzaradan, we na di kapten pan di gyadman dɛm, kɛr sɔm pan di popoliopo dɛm ɛn di balans pipul dɛm we bin lɛf na di siti, ɛn di wan dɛm we bin dɔn rɔnawe kɔmɔt to di kiŋ na Babilɔn, togɛda wit di balans pipul dɛn we sabi wok wit dɛn an, go mek slev.

¹⁶ Bɔt Nɛbyuzaradan we na di kapten pan di gyadman dɛm, bin lɛf sɔm pan di popoliopo dɛm na di land fɔ plant greps ɛn dig grɔn fɔ plant.

¹⁷ Di Babilonian dɛn brok di bras pila dɛm, di stand ɛn di big bras tank we de insay PAPA GƆD in os, ɛn kɛr ɔl di bras go Babilɔn.

¹⁸ Dɛn tek di pɔt dɛn, shɔbul, sizɔs fɔ trim wik, di dish dɛn fɔ bɔn insɛns, ɛn ɔl di bras tin dɛn we dɛn de yuz na di tɛmpul;

¹⁹ igen dɛn tek di smɔl bol dɛm, ɛn di faya pan dɛm, ɛn di besin ɛn pɔt dɛm, ɛn di lampstand dɛm, ɛn di dish dɛm fɔ insɛns, ɛn di bol dɛm fɔ tamisilɛ. Nɔto kɔmɔn gold di kapten bin kɛr go. Nɔto kɔmɔn silva di kapten bin kɛr go.

²⁰ As fɔ di bras we bin de pan di tu pila dɛm, di wan tank wit di twɛlv bras man kaw dɛm we bin de ɔnda di tank, ɛn di stand dɛm we Sɔlɔmɔn bin mek fɔ PAPA GƆD in os, i bin so bɔku dat nɔbɔdi nɔ ebul we am.

²¹ As fɔ di pila dɛm, wan pila in ayt na twɛnti-sɛvin fut, ɛn na bin etin fut go rawnd ɛn dɛn bin tri inchis tik ɛn ol bin de insay.

²² Di bras dizayn we bin de pantap wan pila, in ayt na fo ɛn af fut, dɔn dɛn dɛkɔret am wit bras pomigranet frut dizayn ɔl rawnd. Na di sem tin dɛn du to di ɔda wan.

²³ Na naynti-siks pomigranet bin de na di sayd dɛm; ɔl di pomigranet dɛm na bin wan ɔndrɛd we dɛn jɔyn jɔyn ɔlɔbɔt.

Dɛn Kɛr Di Pipul Dɛn Na Juda Go Babilɔn

²⁴ Di kapten pan di gyadman dɛm tek Sɛraya we na di edman fɔ di man dɛn we de mek sakrifays fɔ pipul sin wit in asistant we na Zɛfanaya ɛn di tri getman dɛn;

²⁵ ɛn na di siti, i tek di ɔfisa we bin de inchaj ɔf di sojaman dɛm ɛn sɛvin pan di man dɛn we de advays di kiŋ we bin de na di siti; ɛn di sɛktri to di kɔmanda na di ami we rɛspɔnsibul gɛda di pipul dɛn na di land; ɛn siksti man dɛn we tap na di siti.

²⁶ Kɔmanda Nɛbyukanadan kɛr ɔl dɛn pipul ya go dɛn go to kiŋ Nɛbyukadnɛza, na Ribla.

²⁷ Di kiŋ kil dɛn ɔl. I kil dɛn ɔl na Ribla we de na Amat. Na so di pipul dɛn na Juda tek kɔmɔt na dɛn kɔntri go ɛgzayl na Babilɔn.

²⁸ Dis na di amawnt ɔf di pipul we Nɛbyukadnɛza bin kɛr go mek slev: insay di ia we mek sɛvin, na bin tri tawzin ɛn twɛnti-tri Ju dɛm.

²⁹ Insay di ia we mek etin we Nɛbyukadnɛza bin de na pawa, i kɛr et ɔndrɛd ɛn tati-tu pipul kɔmɔt Jerusɛlɛm go slev;

³⁰ insay di ia we mek twɛnti-tri we Nɛbyukadnɛza de na pawa, Nɛbyuzaradan we na di kapten pan di gyadman dɛm bin kɛr sɛvin ɔndrɛd ɛn fɔti-fayv Juz go mek slev; ɔl ɛn ɔl, na bin fo tawzin siks ɔndrɛd pipul.

³¹ Insay di de we mek twɛnti-fayv na di mɔnt we mek twɛlv insay di ia we mek tati-sɛvin we dɛn bin kapchɔ Jɛoayachin we na bin kiŋ na Juda, go ɛgzayl, Ivilmɛrodak we bi kiŋ na Babilɔn da ia de, gi Jɛoayachin we na bin kiŋ na Juda in rɛspɛkt bak, ɛn fri am kɔmɔt Jel;

³² ɛn i bin tɔk fayn wan to am, ɛn i gi am pozishɔn pas di kiŋ dɛn we bin de wit am, na Babilɔn.

³³ So Jɛoayachin bin pul in Jelman klos. Ɛn ɛvride, i bin de it na di kiŋ in tebul;

³⁴ as fɔ mɔni yon say, i bin de gɛt alawans we di kiŋ bin de gi am, bay di kayn tin dɛn we i want ɛvride, ɔl in layf, sote di de we i day.