Jɛrimaya 5 - Krio Fɔs Oli Baybul

Jerusɛlɛm In Sin

¹ Rɔn ɔp ɛn dɔŋ di trit dɛm na Jerusɛlɛm, luk ɛn tek notis! Sach in opin ples dɛn si if yu go fɛn wan pɔsin, pɔsin we trit ɔlman ikwal ɛn de tɔk tru; so dat a go sɔri fɔ Jerusɛlɛm.

² Ɔlwe dɛn kin swɛ se, “Wans PAPA GƆD de,” dɛn stil kin lay.

³ E PAPA GƆD, nɔto di tru yu de luk fɔ? Yu dɔn bit dɛm, bɔt dɛn nɔ fil pen; yu dɔn kil sɔm pan dɛm bɔt dɛn nɔ gri tek kɔrɛkshɔn. Dɛn dɔn mek dɛn fes dɛn traŋa pas rɔk; dɛn nɔ gri fɔ chenj.

⁴ Nain a se, “Dɛn wan ya na po po pipul dɛm, dɛn nɔ gɛt sɛns; bikɔs dɛn nɔ no PAPA GƆD in we, dɛn Gɔd in lɔ.

⁵ A go go to dɛn wan we big, ɛn a go tɔk to dɛm; bikɔs dɛn no PAPA GƆD in we di lɔ we dɛn Gɔd Ɔlmayti gɛt.” Bɔt dɛn nɔ de obe PAPA GƆD in lɔ igen, dɛn dɔn kɔt rop.

⁶ Fɔseka dat, na layɔn we go kɔmɔt na fɔrɛst go kil dɛm, na wulf we kɔmɔt na di ɛmti ples we pɔsin nɔ go ebul tap, go nyakanyaka dɛm. Wan lɛpɛt de waka nia dɛn siti dɛm fɔ du bad, i go chɛr chɛr ɛnibɔdi we kɔmɔt insay di siti go na do, pis pis; bikɔs dɛn sin dɔn bɔku, ɛn di dinay we dɛn de dinay PAPA GƆD dɔn tumɔs.

⁷ “Aw a go sɔri fɔ yu? Yu pikin dɛm dɔn fɔsek mi, ɛn dɛn dɔn tek dɛn wan dɛn we nɔto gɔd, dɛn nem swɛ. We a bin fid dɛm te dɛn bɛlful, dɛn bin kɔmit adɔltri ɛn gɛda go na dɛn rare gyal dɛn os.

⁸ Dɛn na bin dɛn machɔ man os we dɛn de fid gud gud wan we want uman ɔltɛm, ɔlman de kray fɔ gɛt in neba wɛf.

⁹ PAPA GƆD se, “A nɔ fɔ pɔnish dɛm fɔ dɛn kayn tin dɛn de? Ɛn a nɔ fɔ rivɛnj fɔ mi nem pan kayn neshɔn lɛkɛ dis?

¹⁰ “Waka insay dɛn greps fam, ro bay ro ɛn pwɛl dɛm, bɔt nɔ pwɛl ɔltin; kɔt kɔt dɛn branch dɛm, bikɔs nɔto PAPA GƆD gɛt dɛm.

¹¹ PAPA GƆD se, “Bikɔs Izrɛl ɛn Juda nɔ bin de waka tret wit mi atɔ.”

PAPA GƆD Put Izrɛl Wansay

¹² Dɛn dɔn tɔk lay lay tin dɛm bɔt PAPA GƆD ɛn dɔn se, ‘I nɔ go du yu ɛnitin; natin bad nɔ go apin to wi ɛn i nɔ go kil wi ɔ mek aŋri kam na tɔŋ.

¹³ Di prɔfɛt dɛn go tan lɛk briz; bikɔs di wɔd nɔ de insay dɛm. Na so i go bi to dɛm!”

¹⁴ Bikɔs ɔf dat, na dis Papa Gɔd we na Gɔd Ɔlmayti se, “Bikɔs dɛn dɔn tɔk da wɔd de, a de mek mi wɔd na mɔt tan lɛkɛ faya ɛn dɛn pipul ya, di wud ɛn di faya go bɔn dɛm.

¹⁵ PAPA GƆD se, “Yu Izrɛl, biliv mi, a de mek wan neshɔn kam atak una, neshɔn we de kɔmɔt fa fawe. Na neshɔn we ebul bia, na dɛn lɔntɛm neshɔn, na neshɔn we una nɔ no dɛn laŋwej ɛn una nɔ go ɔndastand wetin dɛn de se.

¹⁶ Di say we dɛn de put dɛn aro tan lɛkɛ grev; ɛn dɛn na pawaful fɛtman dɛm.

¹⁷ Dɛn go it ɔl wetin una avɛst ɛn ɔl di it we una gɛt fɔ it; dɛn go it una bɔypikin ɛn gyal pikin dɛm; dɛn go it una ship, got ɛn kaw dɛm; dɛn go it una greps ɛn una fig tik dɛm; una siti dɛn we una protɛkt ɛn abop pan, na sɔd dɛn go tek pwɛl dɛm.”

¹⁸ PAPA GƆD se, “Ivin dɛn tɛm dɛn de, a nɔ go kil dɛn ɔl.

¹⁹ Ɛn we una pipul dɛm go se, ‘wetin mek PAPA GƆD we na wi Gɔd dɔn du ɔl dɛn kayn tin ya to wi?’ Una go tɛl dɛm se, ‘Lɛk we una fɔsek mi go sav fɔrin gɔd dɛm na una land, na semweso una go sav trenja dɛm na land we nɔto una yon.’”

PAPA GƆD Wɔn In Pipul Dɛm

²⁰ PAPA GƆD se, anawns dis na Izrɛl, tɔk am na Juda;

²¹ “Una yɛri o, una dɛn fulish pipul dɛn we nɔ gɛt sɛns, una we gɛt yay bɔt nɔ de si, una we gɛt yes bɔt nɔ de yɛri.

²² PAPA GƆD se, una nɔ de fred mi? Una nɔ de trimbul bifo mi? A put sansan as bawndri fɔ di si, baria we de de ɔltɛm we i nɔ de pas; i lɛk aw di swɛlin dɛn tɔnɔbɔ, dɛn nɔ de pas da bawndri de, i lɛk aw dɛn ala, dɛn nɔ go ebul jomp am.

²³ Bɔt dɛn pipul ya gɛt traŋayes ɛn rebɛl at; dɛn dɔn kɔmɔt biɛn mi go dɛn yon we.

²⁴ Dɛn nɔ de tɔk na dɛn at se, ‘Lɛ wi fred PAPA GƆD we na wi Gɔd, we de gi wi ren, ren sizin, di amatan ren, ɛn di draysizin ren, ɛn de kip, di wik dɛm fɔ di avɛst, fɔ wi.’

²⁵ Una bad layf dɔn mek una nɔ de gɛt ɔl dɛn tin dɛn ya igen, ɛn una sin dɛm dɔn diprayv una.

²⁶ Bikɔs, wikɛd pipul dɛn de amɔŋ mi pipul; dɛn de ayd dɛnsɛf lɛkɛ flawa de wet fɔ du bad, Dɛn kin sɛt trap; dɛn kin kech mɔtalman.

²⁷ Dɛn os dɛn ful wit bad at ɛn tif, lɛkɛ aw blay kin ful wit bɔd; na dat mek dɛn dɔn jɛntri ɛn gɛt pawa,

²⁸ dɛn dɔn fat ɛn de shayn. Dɛn nɔ de fred fɔ du ɛnikayn wikɛd tin to nɔbɔdi; dɛn de gi bɛn bɛn jɔjmɛnt to dɛn wan dɛn we dɛn papa dɔn day, fɔ du mɔ wikɛdnɛs, ɛn dɛn nɔ de fɛt fɔ dɛn wan dɛm we nɔ gɛt.

²⁹ PAPA GƆD se, “A nɔ fɔ pɔnish dɛm fɔ dɛn tin dɛn de? Ɛn a nɔ fɔ rivɛnj fɔ mi nem pan neshɔn lɛkɛ dis kayn?

³⁰ Na tin we at fɔ biliv ɛn de shɔk pipul dɔn apin na di land so:

³¹ di Prɔfɛt dɛm de gi laylay prɔfisi, ɛn dɛn man dɛm we de mek sakrifays fɔ pipul sin, de du wetin dɛn fil; na dat mi pipul dɛn lɛk lɛ de bi, bɔt wetin una go du we di ɛnd go kam?