Jɛrimaya 49 - Krio Fɔs Oli Baybul

Wetin PAPA GƆD Se Go Apin To Amɔn

¹ Dis na bɔt di Amonayt dɛm, na dis PAPA GƆD se: “Izrɛl nɔ gɛt bɔypikin? I nɔ gɛt pɔsin we go tek in ples? Wɛl wetindu Milkɔm dɔn tek Gad lɛk nainyon, ɛn in pipul dɛn go sɛtul na dɛn siti dɛm?

² PAPA GƆD se, fɔseka dat, di tɛm de kam we A go mek di pipul dɛn yɛri di ala we pipul dɛn kin ala na wa, na Raba we na dɛn Amonayt dɛn siti; i go tɔn gud fɔ natin ip, ɛn dɛn go bɔn dɛn vilej dɛm wit faya; na datɛnde Izrɛl go tek land na di pipul dɛn an, we bin tek dɛn land. Na so PAPA GƆD se.

³ ‘Ala kray, Yu Ɛshbɔn, bikɔs Ay dɔn tɔn gud fɔ natin ples! Una kray, una di gyalpikin dɛm na Raba! Una tay saklɔth rawnd una wes, una kray sɔri wan ɛn rɔn ɔp ɛn dɔŋ kɔnfyus wan! Bikɔs Molɛk go go ɛgzayl, wit in man dɛm we de mek sakrifays fɔ pipul sin, ɛn dɛn bigman dɛm.

⁴ Wetindu yu de bost bɔt yu vali dɛm, Yu gyalpikin we nɔ de waka tret wit PAPA GƆD, yu we bikɔs yu abop pan yu dia tiŋs dɛm we yu kip, de tɔk se, ‘Udat go kam atak mi?’

⁵ PAPA GƆD Ɔlmayti se, biliv mi, a go mek bad bad tin mit yu we yu go fred, tin we go kɔmɔt to di wan dɛn we de rawnd yu, ɛn dɛn go drɛb una, ɔlman go bisin bɔt inyon layf, ɛn nɔbɔdi nɔ go de fɔ gɛda dɛm igen.

⁶ PAPA GƆD se, “Bɔt afta dat, a go gi di Amonayt dɛm, dɛn jɛntri bak.”

Wetin PAPA GƆD Se Go Apin To Idɔm

⁷ Dis na bɔt Idɔm, na dis PAPA GƆD Ɔlmayti se: Sɛnsman dɛn nɔ de na Idɔm igen? Di Advaysa dɛn nɔ ebul advays igen? Sɛnsman dɛn dɔn dɔn?

⁸ Una rɔnawe, una tɔn bak, una go ayd na dɛn kev, Una di pipul dɛn we tap na Dɛdan! Bikɔs a go mek di kalamiti we bin mit Isɔ di tɛm we a bin pɔnish am, mit am.

⁹ If man dɛm we de pik greps, pik greps fɔ yu, dɛn nɔ go lɛf sɔm na grɔn? If tifman dɛm kam na nɛt, nɔto wetin dɛn ebul pwɛl dɛn go pwɛl nɔmɔ?

¹⁰ Bɔt A dɔn trip Isɔ nekɛd, A dɔn mek ɔlman no di ples dɛm we i de ayd, ɛn i nɔ ebul fɔ ayd usay nɔbɔdi nɔ go si am igen. Dɛn dɔn nyakanyaka in pikin dɛm, ɛn in brɔda dɛm, ɛn in neba dɛm; nɔn pan dɛm nɔ de igen.

¹¹ Una lɛf una pikin dɛm we nɔ gɛt papa, a go mek dɛn de; ɛn tɛl una uman dɛn we dɛn man dɛn dɔn day se mek dɛn abop pan mi.”

¹² Bikɔs na dis PAPA GƆD se: “If dɛn wan dɛm we nɔ sɔpoz fɔ drink pan di kɔp, fɔ drink pan am paopa, yu tink se yusɛf nɔ fɔ gɛt pɔnishmɛnt? Yu nɔ go go fri, yusɛf fɔ drink de.

¹³ PAPA GƆD se, Bikɔs a dɔn swɛ to misɛf se Bozra go tɔn ples fɔ fred, fɔ provok, gud fɔ natin ɛn ples fɔ tek swɛ; ɛn ɔl in siti dɛn go tɔn gud fɔ natin ples sote got.”

¹⁴ A dɔn gɛt wɔd to PAPA GƆD, ɛn dɛn dɔn sɛn mɛsenja dɛm to ɔl di neshɔn dɛm: “Una gɛda unasɛf wan say ɛn atak am, ɛn grap fɔ fɛt wa!”

¹⁵ Bikɔs, a go mek una luk fɔni to di ɔda neshɔn dɛm, ɛn dɛn nɔ go tek una mek natin.

¹⁶ Di fred we una tink se pipul dɛn de fred una, ɛn di prawd we una prawd dɔn lay gi una, una we tap insay dɛn ol na dɛn rɔk ɔntɔp dɛn mawnten. Ilɛk una mek una os dɛn ɔp ɔp lɛk dɛn igul dɛn yon, a go briŋ una kɔmɔt de kam dɔŋ. Na so PAPA GƆD se.

¹⁷ “Idɔm go tɔn ples fɔ fred; ɔlman we go pas go fred, ɛn dɛn go sɔktit fɔseka di kayn dizasta we mit dɛm.

¹⁸ PAPA GƆD se, jɛs lɛkɛ aw Sɔdɔm ɛn Gɔmɔra, ɛn di siti dɛm we bin de nia dɛm bin pwɛl, na so nɔn mɔtalman nɔ go tap de, ɛn nɔbɔdi nɔ go slip de.

¹⁹ A de tɛl una, lɛkɛ we bɔku ship dɛn kin rɔn we layɔn de kɔmɔt na bush nia Riva Jɔdan, fɔ kam atak dɛm, na so a go mek dɛn rɔnawe pan am; ɛn a go apɔynt ɛnibɔdi we a pik fɔ rul am. Bikɔs, udat gɛt pawa lɛkɛ mi? Udat go sɛn kɔl mi? Us shɛpad go tinap bifo mi?

²⁰ Fɔseka dat, una yɛri di plan we PAPA GƆD dɔn mek fɔ Idɔm ɛn wetin i dɔn mekɔp fɔ dɛn wan dɛm we tap na Tɛman: Dɛn go drɛg di lili wan dɛnsɛf go; dɛn ɔl go wɔnda fɔ seka di kayn tin we apin to dɛm.

²¹ Di ath go trimbul fɔ di kayn sawnd we dɛn go mek we dɛn go fɔdɔm; dɛn go yɛri we dɛn go ala, na di Rɛd si.

²² A de tɛl una, wan pɔsin go grap ɛn flay lɛk igul, ɛn prɛd in wiŋ dɛm oba Bozra, ɛn di sojaman dɛn na Idɔm, dɛn at dɛn go tan da de de lɛkɛ uman we de lebɔ, in at.”

Wetin PAPA GƆD Se Go Apin To Damaskɔs

²³ Dis na bɔt Damaskɔs “Amat ɛn Apad dɔn kɔnfyus, bikɔs dɛn dɔn yɛri bad bad nyuz; dɛn fred bad bad wan, dɛn at de wɔri lɛk di si, we nɔ ebul de wanples ɛn nɔ mek nɔys.

²⁴ Damaskɔs dɔn wik, i dɔn tɔn fɔ rɔnawe, i nɔ no wetin fɔ du, pen ɛn brok at dɔn ol am lɛkɛ uman we de pan lebɔ.

²⁵ Luk we ɔlman dɔn pul at pan da femɔs siti, siti we ɔltɛm gɛt jɔy!

²⁶ Fɔseka dat, in yɔŋman dɛm go day na dɛn opin ples dɛm, ɛn dɛn go kil ɔl dɛn sojaman dɛm da de de. Na so PAPA GƆD Ɔlmayti se.

²⁷ Ɛn a go layt faya na di wɔl na Damaskɔs, ɛn i go bɔn Bɛnadad in pales.”

Wetin PAPA GƆD Se Go Apin To Di Kɛda Pipul Ɛn Azɔ Siti

²⁸ Dis na bɔt Kɛda ɛn Azɔ Kindɔm dɛm, we Nɛbyukadnɛza we na kiŋ na Babilɔn bin nyakanyaka. Na dis PAPA GƆD se, “Una grap, una go atak Kɛda! Una nyakanyaka di pipul dɛn na di ist!

²⁹ Dɛn go tek dɛm os ɛn dɛn ship dɛm, dɛn kɔtin dɛm we dɛn ɛŋ ɛn ɔl dɛn tiŋs dɛm; dɛn go kɛr dɛn kamɛl dɛm go, ɛn pipul dɛn go ala tɛl dɛm se: ‘Waala de ɔlɔbɔt pan una!’

³⁰ PAPA GƆD se, Una rɔnawe, una go fawe, una go tap insay dɛn kev, Una we tap na Azɔ! Bikɔs Nɛbyukadnɛza we na kiŋ na Babilɔn, dɔn mek plan fɔ una, ɛn dɔn mek arenjmɛnt fɔ du una sɔntin.

³¹ PAPA GƆD se, “Una grap, una go atak wan neshɔn we de wit kol at, we gɛt sikiɔriti, na so PAPA GƆD se, we nɔ gɛt get ɔ ayɛn ba, neshɔn we nain wangren de to insɛf.

³² Dɛn kamɛl dɛm go tɔn tin fɔ tek kɛr go afta wa, ɛn dɛn kaw dɛn go tɔn tin fɔ tek fri. A go skata lɛft ɛn rayt, dɛn wan we de krep rawnd dɛn ed, ɛn a go mek dɛn kalamiti mit dɛm ɔlɔbɔt. Na so PAPA GƆD se.

³³ Azɔ go tɔn ples fɔ dɛn Jakal fɔ tap, ɛn i go tɔn gud fɔ natin ples sote go; nɔbɔdi nɔ go tap de, nɔbɔdi nɔ go slip de sɛf.”

Wetin PAPA GƆD Se Go Apin to Ilam

³⁴ PAPA GƆD in wɔd we kam to Jɛrimaya we na prɔfɛt, bɔt Ilam, di tɛm we Zɛdikaya na bin kiŋ na Juda

³⁵ Na dis PAPA GƆD Ɔlmayti se, “a de tɛl una, a go brok di bo na Ilam, we na dɛn bakbon we mek dɛn gɛt pawa;

³⁶ a go mek di fo kayn briz we de blo kɔmɔt na di fo kɔna dɛn na di klawd, blo na Ilam, ɛn a go skata dɛm insay ɔl dɛn briz de, ɛn nɔn neshɔn nɔ go de we di wan dɛn we a drɛb kɔmɔt Ilam, nɔ go de.

³⁷ PAPA GƆD se, A go mek Ilam fred in ɛnimi dɛm, ɛn dɛn wan dɛm we wan fɔ kil dɛm; a go mek bad bad tin mit dɛm wit vɛksteshɔn. A go mek fɛt fɛt mit dɛn sote a kil dɛn ɔl dɔn;

³⁸ PAPA GƆD se, A go put mi tron na Ilam, ɛn kil ɔl dɛn kiŋ ɛn bigman dɛm.

³⁹ PAPA GƆD se, “bɔt leta, a go gi Ilam dɛn jɛntri bak. Na so PAPA GƆD se.