Jɛrimaya 47 - Krio Fɔs Oli Baybul

PAPA GƆD In Mɛsej Bɔt Filistia

¹ PAPA GƆD in wɔd we kam to Jɛrimaya we na prɔfɛt, bɔt di Filistin dɛm, bifo Fero bin atak Gaza.

² “Na dis PAPA GƆD se, A de tɛl una, wata de grap kɔmɔt na di nɔt, ɛn i go bi flɔd; di wata go kɔba di land ɛn ɔl wetin de de, i go kɔba di siti ɛn di wan dɛm we tap de. Di man dɛn go ala de kray, ɛn ɔl di pipul dɛm we tap de, go kray.

³ We in ɔs dɛn go de stamp dɛn fut, ɛn di chariɔt dɛm go de kam wit spid, ɛn dɛn wil dɛn go de mek ebi nɔys, papa nɔ go luk fɔ dɛn pikin dɛm we dɛn de rɔn, bikɔs dɛn an dɛm go wik,

⁴ fɔseka di de we de kam fɔ nyakanyaka ɔl di Filistin dɛm, fɔ kil ɔl di ɛlpa dɛn we lɛf na Taya ɛn Sidɔm. Bikɔs PAPA GƆD de nyakanyaka ɔl di filistin dɛm, dat na di balans pipul dɛn we de na Krit Ayland.

⁵ Shayned dɔn mit Gaza, Ashkɛlɔn in dɔn kwayɛt. Una di balans pipul dɛn na Filistia, aw lɔŋ una go de kɔt kɔt unasɛf?

⁶ Ey, PAPA GƆD in sɔd! Awlɔŋ yu go de kil pipul? Put yusɛf insay yu kes, ɛn blo kwayɛt wan!

⁷ Aw i go blo, we PAPA GƆD dɔn gi am wok fɔ du? I dɔn gi am wok fɔ atak Askɛlɔn, ɛn atak di pipul dɛn we tap na di kos.”