Jɛrimaya 44 - Krio Fɔs Oli Baybul

Di Mɛsej we PAPA GƆD sɛn to di Izrɛlayt dɛm na Ijipt

¹ Tap na Migdɔl, Tapanis ɛn Mɛmfis we de na Ijipt, ɛn na Patrɔs.

² PAPA GƆD in wɔd we bin kam to Jɛrimaya bɔt ɔl di Ju dɛm we bin “Na dis PAPA GƆD Ɔlmayti we na Izrɛl dɛn Gɔd se: Una dɔn si ɔl di bad bad tin dɛn we a du to Jerusɛlɛm ɛn to ɔl di siti dɛm na Juda. Luk dɛm de lɛk tide, dɛn nɔ gud fɔ natin, ɛn nɔbɔdi nɔ tap de,

³ fɔseka di wikɛd tin dɛm we dɛn du, tin dɛn we mek a vɛks, dat na we dɛn bin de bɔn insɛns ɛn sav ɔda gɔd dɛm we dɛn, una ɛn ivin una fɔstɛmpapa dɛm nɔ no.

⁴ Pan ɔl dat, a bin de sɛn mi wokman dɛm we na di prɔfɛt dɛn to una ɔltɛm fɔ tɛl una se, ‘Ey, una nɔ du dis bad bad tin we a et bad bad wan!’

⁵ Bɔt dɛn nɔ lisin ɔ ivin pe atɛnshɔn fɔ mek dɛn go lɛf dɛn bad bad tin dɛn de ɛn nɔ de bɔn insɛns to ɔda gɔd dɛm igen.

⁶ Fɔseka dat, a bin put mi wamat ɛn mi vɛksteshɔn pan dɛm, ɛn dɛn bin si am na di siti dɛm na Juda ɛn na di trit dɛm na Jerusɛlɛm; ɛn dɛn tɔn west ɛn gud fɔ natin de lɛkɛ tide.

⁷ Ɛn naw, na dis PAPA GƆD Ɔlmayti we na Izrɛl dɛn Gɔd se: Wetin du una de du dis kayn bad bad tin to unasɛf, fɔ mek una nɔ gɛt mɔ man ɛn uman, yɔŋ bebi ɛn pikin dɛm na Juda we dat go mek nɔbɔdi nɔ lɛf pan una?

⁸ Wetindu una de provok mi mek a vɛks bay wetin una de du, we una de bɔn insɛns to ɔda gɔd dɛm na Ijipt usay una dɔn kam tap, we go mek nɔbɔdi nɔ want fɔ gɛt ɛnitin fɔ du wit una, ɛn una gɛt swɛ ɛn tɔn provokeshɔn na ɔl di neshɔn dɛm na di wɔl?

⁹ Una dɔn fɔgɛt una fɔstɛmpapa dɛn wikɛdnɛs, di kiŋ dɛn na Juda dɛn wikɛdnɛs, dɛn wɛf dɛn wikɛdnɛs, una sɛf yon wikɛdnɛs ɛn una wɛf dɛn wikɛdnɛs we dɛn du na Juda ɛn na di trit dɛm na Jerusɛlɛm?

¹⁰ Dɛn nɔ put dɛnsɛf dɔŋ te tide, ɛn dɛn nɔ rɛspɛkt mi, ɛn nɔ du wetin mi lɔ we a gi una ɛn una fɔstɛmpapa dɛn, se.

¹¹ “Fɔseka dat, na dis PAPA GƆD Ɔlmayti we na Izrɛl dɛn Gɔd se: A de tɛl una, a go tay mi at pan una ɛn du una bad ɛn nyakanyaka di wanol Juda.

¹² A go kech di balans wan dɛm we lɛf na Juda we dɛnsɛf de mekɔp fɔ go Ijipt, ɛn dɛn ɔl go day; na Ijipt dɛn go day; dɛn go day na wa ɔ wit bad bad aŋri; frɔm di las wan to di wan we gɛt pawa pas dɛn ɔl, go day na wa ɛn wit bad bad aŋri; dɛn go tɔn tin we at fɔ luk, pipul dɛn go trit dɛn lɛk dɔg ɛn go tek dɛn nem fɔ swɛ ɛn go provok dɛm.

¹³ A go pɔnish dɛn wan we tap na Ijipt lɛkɛ aw a dɔn pɔnish di wan dɛm na Jerusɛlɛm, wit wa, bad bad aŋri ɛn wit siknɛs,

¹⁴ so dat nɔn pan di balans we bin de na Juda we dɔn kam tap na Ijipt nɔ go ɛskep, ɔ liv ɔ tɔn bak go Juda, usay dɛn want fɔ tɔmbak fo go tap; bikɔs dɛn nɔ go go bak, pas sɔm rɛfyuji dɛm.”

¹⁵ Nain ɔl di man dɛm we no se dɛn wɛf dɛn dɔn bɔn insɛns to ɔda gɔd dɛm, ɛn ɔl di uman dɛm we tinap de, we na bin bɔku bɔku pipul dɛm, ɛn ɔl di pipul we tap na Patrɔs na Ijipt ansa Jɛrimaya se:

¹⁶ “As fɔ wetin yu dɔn tɛl wi se PAPA GƆD se fɔ tɛl wi, wi nɔ go lisin to yu.

¹⁷ Bɔt wi go du ɔl wetin wi dɔn swɛ se wi go du, dat na fɔ bɔn insɛns to di Kwin na ɛvin ɛn fɔ tamisilɛ to am, lɛkɛ aw wi bin dɔn de du, wi ɛn wi fɔstɛmpapa dɛm, wi kiŋ dɛm ɛn wi bigman dɛm, na di siti dɛn na Juda ɛn na di trit dɛm na Jerusɛlɛm; bikɔs dɛn tɛm dɛn de, wi bin gɛt plɛnti it, ɛn bɛtɛ bin de fala wi ɛn nɔn bad tin nɔ bin de apin to wi.

¹⁸ Bɔt frɔm we wi lɛf fɔ bɔn insɛns to di Kwin na ɛvin ɛn lɛf fɔ tamisilɛ to am, naim wi nɔ de gɛt natin igen, ɛn wi bigin day na wa ɛn wit bad bad aŋri.”

¹⁹ Dɔn di uman dɛn se, “Wɛn wi bin de bɔn insɛns to di Kwin na ɛvin ɛn tamisilɛ to am, nɔto wi man dɛm bin gri fɔ mek wi mek kek fɔ am ɛn tot in imej ɛn tamisilɛ to am?”

²⁰ Nain Jɛrimaya tɛl ɔl di pipul, di man dɛm ɛn di uman dɛm, ɛn ɔl di pipul we bin gi am da ansa de se:

²¹ “As fɔ di insɛns dɛn we una dɔn bɔn na di siti dɛn na Juda, ɛn na di trit dɛm na Jerusɛlɛm, una ɛn una fɔstɛmpapa dɛm, una kiŋ dɛm ɛn una bigman dɛm ɛn di pipul dɛn na di land, PAPA GƆD nɔ mɛmba dat? I nɔ bin kam to in maynd?

²² PAPA GƆD nɔ bin ebul bia di bad bad tin dɛm ɛn di tin dɛm we i et bad bad wan we una dɔn du; na dat mek una land dɔn tɔn gud fɔ natin, i dɔn gɛt swɛ ɛn nɔbɔdi nɔ tap de, lɛk aw i de lɛkɛ tide.

²³ Na bikɔs una bɔn insɛns, ɛn bikɔs una kɔmit sin to PAPA GƆD, ɛn nɔ du wetin PAPA GƆD se, ɔ obe in lɔ dɛm, in ɔda ɛn in kɔmandmɛnt dɛm, mek dis bad bad tin dɔn apin to una de lɛkɛ tide.”

²⁴ Jɛrimaya tɛl ɔl di pipul ɛn ɔl di uman dɛm se, “Una yɛri wetin PAPA GƆD se, una ɔl we kɔmɔt Juda go tap na Ijipt;

²⁵ Na dis PAPA GƆD Ɔlmayti we na Izrɛl dɛn Gɔd se: Una ɛn una wɛf dɛm dɔn tɔk wit una yon mɔt dɛn, ɛn una dɔn du am wit una yon an dɛm we una se, ‘Wi go du ɔl wetin wi dɔn swɛ se wi go du, dat na fɔ bɔn insɛns to di Kwin na ɛvin ɛn fɔ tamisilɛ to am.’ So una kip to una prɔmis ɛn du wetin una prɔmis!

²⁶ Fɔseka dat, una yɛri wetin PAPA GƆD se, una we kɔmɔt Juda go tap na Ijipt: PAPA GƆD se, a de tɛl una, a dɔn swɛ wit mi gret nem se, nɔn man we kɔmɔt Juda go tap na Ijipt nɔ go yuz mi nem fɔ swɛ igen, dat na we dɛn kin se, ‘Wans PAPA GƆD we na Gɔd de.’

²⁷ Biliv mi, a de wach dɛm fɔ du dɛm bad ɛn nɔto fɔ du dɛm gud; ɔl di man dɛm we kɔmɔt Juda go tap na Ijipt go day na wa ɛn wit bad bad aŋri, te nɔn pan dɛn nɔ lɛf.

²⁸ Di wan dɛn we go ɛskep we nɔ go day na wa, we go kɔmɔt Ijipt go bak na Juda, nɔ go plɛnti; ɛn ɔl di balans we bin lɛf na Juda, we bin kam Ijipt kam tap, go no udat in wɔd go pas, mi yon ɔ dɛn yon.

²⁹ PAPA GƆD se, na dis go bi di sayn se a go pɔnish una na dis ples, so dat una go no se na mi wɔd go pas fɔ du una bad, nɔto una yon:

³⁰ Na dis PAPA GƆD se, A de tɛl una, a go gi Fero Ofra we na kiŋ na Ijipt to in ɛnimi dɛm, di wan dɛm we want fɔ kil am, jɛs lɛkɛ aw a bin gi Zɛdikaya we na bin kiŋ na Juda to Nɛbyukadnɛza we na kiŋ na Babilɔn, we na bin in ɛnimi ɛn bin want fɔ kil am.”