Jɛrimaya 43 - Krio Fɔs Oli Baybul

Dɛn Kɛr Jɛrimaya Go Ijipt

¹ Wɛn Jɛrimaya dɔn tɔk ɔltin we PAPA GƆD we na dɛn Gɔd se, to ɔl di pipul n dɔn we na PAPA GƆD we na dɛn Gɔd sɛn am fɔ tɛl dɛm,

² Azaraya, we na Hoshaya in bɔypikin ɛn Joanan we na Karera in bɔypikin ɛn ɔl di fityay man dɛm tɛl Jɛrimaya se, “Yu de lay. PAPA GƆD we na wi Gɔd nɔ sɛn yu fɔ kam tɛl wi se, ‘Una nɔ go Ijipt fɔ go tap de’;

³ bɔt na Baruch we na Nɛraya in bɔypikin dɔn put yu agens wi, fɔ gi wi to di Babilonian dɛm so dat dɛn go kil wi, ɔ kɛr wi go ɛgzayl na Babilɔn.”

⁴ So Joanan we na Karɛa in bɔypikin ɛn ɔl di kɔmanda dɛm fɔ di difrɛn fɛt man dɛm, ɛn ɔl di pipul dɛm nɔ bin du wetin PAPA GƆD se, dat na fɔ mek dɛn kɔntinyu fɔ tap na Juda.

⁵ Bɔt Joanan we na Karɛa in bɔypikin ɛn ɔl di kɔmanda dɛm fɔ di difrɛn fɛtman dɛm, tek ɔl di balans pipul dɛm we bin lɛf na Juda, dat na di pipul dɛm we bin dɔn kɔmɔt na ɔl di difrɛn neshɔn dɛm we PAPA GƆD bin drɛb dɛm go, tɔn bak kan tap na Juda–

⁶ di man dɛm, di uman dɛm, di pikin dɛm, di kiŋ in gyal pikin dɛm ɛn ɔlman we Nɛbyuzaradan we na di kapten fɔ di gyadman dɛm, bin lɛf to Gɛdalaya we na Aikam in bɔypikin ɛn semweso, Shafan in grampikin; wit Jɛrimaya we na prɔfɛt ɛn Baruch we na Nɛraya in bɔypikin.

⁷ Dɛn kam na Ijipt, bikɔs dɛn nɔ obe PAPA GƆD. Dɛn rich as fa as Tapanis.

⁸ Nain PAPA GƆD in wɔd kam to Jɛrimaya na Tapanis se:

⁹ “Tot big big ston dɛm go ayd dɛm insay di pɔtɔpɔtɔ kle we de na di pevmɛnt we de fɔ go insay Fero in pales na Tapanis, ɛn mek di man dɛm na Juda si yu,

¹⁰ ɛn tɛl dɛm se, ‘Na dis PAPA GƆD Ɔlmayti we na Izrɛl dɛn Gɔd se: A de tɛl una, a go sɛn tek Nɛbyukadnɛza, mi wokman we na kiŋ na Babilɔn, ɛn i go put in tron pantap dɛn ston ya we a dɔn ayd, ɛn i go prɛd in kiŋ tɛnt oba dɛm.

¹¹ I go kam kapchɔ Ijipt, ɛn i go gi siknɛs to di wan dɛn we fɔ day wit siknɛs, i go mek slev wit di wan dɛn we fɔ bi slev, ɛn go mek wa pan di wan dɛm we fɔ day na wa.

¹² I go layt faya insay di gɔd dɛm na Ijipt dɛn tɛmpul dɛm; ɛn i go bɔn dɛm ɛn kɛr dɛm go as slev; ɛn i go klin Ijipt lɛkɛ aw shɛpad de klin in kot we gɛt lɔs; ɛn i go kɔmɔt de wit kolat.

¹³ I go brok di imej dɛn we dɛn de wɔship na Ɛliopolis we de na Ijipt; ɛn i go bɔn di gɔd dɛm na Ijipt, dɛn tɛmpul dɛm wit faya.’”