Jɛrimaya 42 - Krio Fɔs Oli Baybul

Di Pipul Dɛn Aks Jɛrimaya Fɔ Pre Fɔ Dɛm

¹ Ɔl di kɔmanda dɛm fɔ di difrɛn fɛtman dɛm ɛn Joanan we na Karɛn in bɔypikin, ɛn Azaraya we na Oshaya in bɔypikin, ɛn ɔl di pipul dɛm, frɔm di list wan to di wan we pas dɛn ɔl, kam nia

² ɛn tɛl Jɛrimaya we na prɔfɛt se, “Lisin wi prɔblɛm dɛm ɛn pre to PAPA GƆD we na yu Gɔd fɔ wi, fɔseka ɔl di wan dɛm we lɛf (bikɔs wi we lɛf na jɛs tu tri pan di wanol nɔmba as yusɛf kin si)

³ so dat PAPA GƆD we na yu Gɔd go sho wi di rɔd we wi fɔ waka, ɛn di tin dɛm we wi fɔ du.”

⁴ Nain Jɛrimaya we na prɔfɛt tɛl dɛm se, “A dɔn yɛri wetin una se; biliv mi, a go pre to PAPA GƆD we na una Gɔd ɛn tɛl am ɔl wetin una se, ɛn ɛnitin we PAPA GƆD ansa se, a go tɛl una; a nɔ go ayd natin pan una.”

⁵ Nain dɛn tɛl Jɛrimaya se, “Mek PAPA GƆD bi di witnɛs we nɔ de lay ɛn de waka tret fɔ tɔk agens wi if wi nɔ du ɔl wetin PAPA GƆD we na yu Gɔd, sɛn se wi fɔ du.

⁶ I gud o, i bad o, wi go du wetin PAPA GƆD we na wi Gɔd we wi de sɛn yu to naw, so dat ɔltin go gud fɔ wi we wi du wetin PAPA GƆD we na wi Gɔd se.”

Di Ansa We PAPA GƆD Gi Jɛrimaya We I Pre

⁷ Afta tɛn dez PAPA GƆD in wɔd kam to Jɛrimaya.

⁸ Nain i sɛn kɔl Joanan we na Karɛa in bɔypikin, ɔl di kɔmanda dɛm fɔ di difrɛn fɛtman dɛm, ɛn ɔl di pipul dɛm; frɔm di las wan to di wan we pas dɛn ɔl,

⁹ ɛn tɛl dɛm se, “Na dis PAPA GƆD we na Izrɛl dɛn Gɔd we una bin sɛn mi to, fɔ go put una kes to:

¹⁰ I se: If una go kɔntinyu fɔ de na dis land, dat go mek a es una ɔp ɛn nɔ put una dɔŋ; a go plant una ɛn nɔ rut una; bikɔs a dɔn sɔri ɛn nɔ go du di bad bad tin we a bin wan du una, igen.

¹¹ Una nɔ frɛd di kiŋ na Babilɔn we una bin de fred igen; una no frɛd am, na so PAPA GƆD se, bikɔs a de wit una fɔ pul una kɔmɔt nain an.

¹² A go sho una masi, so dat insɛf go sho una masi ɛn mek una de na una yon land.

¹³ Bɔt if una se, ‘Wi nɔ go kɔntinyu fɔ tap na dis land,’ we min se na PAPA GƆD we na una Gɔd una de disobe,

¹⁴ ɛn una de se, ‘Nɔ, wi go go na Ijipt, usay wa nɔ go mit wi, ɔ de yɛri trɔmpɛt de blo, ɔ tin fɔ it nɔ de, ɛn wi go tap de,’

¹⁵ wɛl, una lisin wetin PAPA GƆD se, una di balans pipul dɛn we lɛf na Juda. Na dis PAPA GƆD Ɔlmayti we na Izrɛl dɛn Gɔd se: If una tɔn una fes fɔ go Ijipt fɔ go tap de,

¹⁶ na di wa we una de fred go mit una bɛtɛ bɛtɛ wan na Ijipt de; ɛn di bad bad aŋri we una de fred, go de biɛn una bɛtɛ bɛtɛ wan na Ijipt; ɛn na de una una go day.

¹⁷ Ɔl di man dɛm we tɔn dɛn fes dɛm fo go Ijipt fo go tap de, go day na wa, ɔ wit bad bad aŋri ɔ wit siknɛs; di kayn bad bad tin we a go du dɛm go mek nɔn pan dɛm nɔ lɛf ɛn nɔbɔdi nɔ go de we nɔ go day.

¹⁸ “Bikɔs na dis PAPA GƆD Ɔlmayti we na Izrɛl dɛn Gɔd, se: lɛkɛ aw A kin mi put mi vɛksteshɔn ɛn mi wam at pan di wan dɛm we tap na Jerusɛlɛm, na semweso a go pul mi wan at pan una we una go na Ijipt. Dɛn go et una bad bad wan. Dɛn go fred, swɛ, kɔs ɛn provok una. Una nɔ go si dis ples igen.

¹⁹ PAPA GƆD dɔn tɛl una se, ‘E, una we lɛf na Juda, ‘Una nɔ go na Ijipt.’ Una no wantɛm se na di las wɔnin a dɔn gi una so,

²⁰ so dat a una nɔ go go astre we una go gɛt fɔ tek una layf pe fɔ. Bikɔs una sɛn mi to PAPA GƆD we na una Gɔd se, ‘Pre fɔ wi to PAPA GƆD we na wi Gɔd ɛn wi go du ɛnitin we PAPA GƆD we na wi Gɔd tɛl wi se, wi fɔ du.’

²¹ Ɛn tide, a dɔn tɛl una wetin I se, bɔt una nɔ obe natin pan ɔl wetin PAPA GƆD we na una Gɔd sɛn mi fɔ kam tɛl una.

²² So una no naw se tabi tabi nɔ de, una go day na wa, una go day wit bad bad aŋri, ɛn wit siknɛs na di ples we una at de gi una fɔ go tap.”