Jɛrimaya 41 - Krio Fɔs Oli Baybul

¹ Insay di mɔnt we mek sɛvin, Ishmɛl we na Netanaya in bɔypikin ɛn Ilayshama in grampikin, we kɔmɔt na di rɔyal famili, ɛn wan pan di kiŋ in chif ɔfisa dɛm, kam wit tɛn man to Gɛdalaya we na Aikam in bɔypikin, na Mizpa. As dɛn ɔl bin de it togɛda na Mizpa,

² Ishmɛl we na Netanaya in bɔypikin ɛn di tɛn man dɛm grap ɛn chap Gɛdalaya we na Aikam in bɔypikin ɛn Shafan in grampikin wit sɔd ɛn kil am, in we di kiŋ na Babilɔn bin dɔn pik fɔ bi gɔvna na di land.

³ Ishmɛl kil ɔl di Ju dɛm we bin de wit Gɛdalaya na Mizpa ɛn di Babilonian sojaman dɛm we bin apin fɔ de de.

⁴ Da sem de de afta dɛn mɔda Gɛdalaya, bifo ɛnibɔdi no bɔt wetin dɔn apin,

⁵ eti man we kɔmɔt Shɛkɛm, Shilo ɛn Sameria, we dɛn bia bia shev, dɛn klos chɛr chɛr ɛn dɛn bɔdi kɔt kɔt, kam de briŋ sid ɔfrin ɛn insɛns fɔ kam gi na PAPA GƆD in os.

⁶ So Ishmɛl we na Netanaya in bɔypikin kɔmɔt insay Mizpa go mit dɛm; i bin de kray we i bin de go mit dɛm. As i de rich to dɛm, nain i se, “Una kam insay to Gɛdalaya we na Aikam in bɔypikin.”

⁷ Wɛn dɛn kam insay di siti, nain Ishmɛl we na Netanaya in bɔypikin ɛn di man dɛm we de wit am, kil kil dɛm ɛn ib dɛm insay wɛl.

⁸ Bɔt tɛn pan dɛm bin de we tɛl Ishmɛl se, “Nɔ kil wi, bikɔs wi gɛt sto ful wit wit, bali, ɔyl ɛn ɔni we wi ayd insay di fil.” So i nɔ bin kil in ɛn in kɔmpin dɛm.

⁹ I apin se di wɛl we Ishmɛl bin trowe ɔl di man dɛn we i kil, dɛn dedebɔdi, na bin di big wɛl we kiŋ Asa bin mek fɔ gyad dɛnsɛf lɛ Baasha we na kiŋ na Izrɛl, nɔ atak dɛm; Ishmɛl we na Netanaya in bɔypikin, ful am wit dedebɔdi.

¹⁰ Afta dat, Ishmɛl bin kapchɔ di balans pipul dɛm we bin de na Mizpa, i kapchɔ di kiŋ in gyalpikin dɛm ɛn ɔl di pipul dɛm we bin lɛf na Mizpa, we Nɛbyuzaradan we na di Gyadman dɛn kapten, bin dɔn put na Gɛdalay we na Aikam in bɔypikin, in kia. Ishmɛl we na Netanaya in bɔypikin kapchɔ dɛn ɛn bin rɛdi fɔ krɔs go oba to di Amonite dɛm.

¹¹ Bɔt we Joanan we na Karɛa in bɔypikin, ɛn ɔl di lida dɛm fɔ di difrɛn fɛtman dɛm, yɛri bɔt ɔl di bad bad tin we Ishmɛl we na Netanaya in bɔypikin, dɔn du,

¹² dɛn tek ɔl dɛn man dɛm go fɔ go fɛt Ishmɛl we na Netanaya in bɔypikin. Dɛn mit am na da big watasay we gɛt stɛp fɔ go dɔŋ we de insay Gibiɔn.

¹³ Wɛn ɔl di pipul we bin de wit Ishmɛl si Joanan we na Karɛa in bɔypikin, ɛn ɔl di lida dɛm fɔ di difrɛn fɛtman dɛm we bin de wit am, dɛn gladi.

¹⁴ So ɔl di pipul dɛn we Ishmɛl bin dɔn kapchɔ na Mizpa, bin tɔn rawnd kam bak ɛn go to Joanan we na Karɛa in bɔypikin.

¹⁵ Bɔt Ishmɛl we na Netanaya in bɔypikin ɛskep wit et man kpɔmɔt to Joanan go to di Amɔnite dɛm.

¹⁶ So Joanan we na Karɛa in bɔypikin ɛn ɔl di lida fɔ di difrɛn fɛtman dɛm, tek ɔl di balans pipul dɛm we Ishmɛl we na Netanaya in bɔypikin bin dɔn kapchɔ na Mizpa kɛr go afta i bin dɔn kil Gɛdalaya we na Aikam in bɔypikin – dɛn na bin sojaman dɛm, uman dɛm, pikin dɛm, ɛn okobo dɛm we Joanan briŋ kam bak kɔmɔt Gibiɔn.

¹⁷ Nain dɛn go ɛn tap na Gɛrut Chimam nia Bɛtliɛm, as dɛm bin plan fɔ go Ijipt,

¹⁸ fɔseka di Babilonian dɛm; dɛn bin de fred dɛm bikɔs, Ishmɛl we na Netanaya in bɔypikin, bin dɔn kil Gɛdalaya we na Aikam in bɔypikin, we di kiŋ na Babilɔn bin dɔn mek gɔvna oba di land.