Jɛrimaya 40 - Krio Fɔs Oli Baybul

Jɛrimaya Tap To Gɛdalaya

¹ Dis na PAPA GƆD in wɔd we kam to Jɛrimaya afta Nɛbyuzaradan we na di kapten fɔ di gyadman dɛm, bin fri am lɛ i kɔmɔt na Rama, afta i bin chen am go ɛgzayl wit di wan dɛn we dɛn bin kapchɔ na Jerusɛlɛm ɛn Juda, fɔ go Babilɔn.

² Di kapten tek Jɛrimaya go na kɔna ɛn tɛl am se, “Na PAPA GƆD we na una Gɔd tɔk wit in pawa se dis bad tin fɔ apin na ya;

³ na PAPA GƆD mek i bi, ɛn na wetin I bin se I go du, I du. Na bikɔs una kɔmit sin to PAPA GƆD, ɛn nɔ du wetin I se, mek dɛn tin ya apin to una.

⁴ Naw, a de pul di chen dɛn kɔmɔt na yu an ɛn fri yu. If yu tink se i gud fɔ go Babilɔn wit mi, yu kin kam, ɛn a go luk afta yu wɛl; bɔt if i tink se i nɔ rayt fɔ go Babilɔn wit mi, nɔ kam. Luk di wanol land de bifo yu; go usay yu tink se gud ɛn rayt fɔ go.

⁵ Bɔt if yu nɔ de go, tɔn bak to Gɛdalaya we na Aikam in bɔypikin ɛn Shafan in grampikin, we di kiŋ na Babilɔn dɔn pik fɔ bi gɔvna fɔ di siti dɛn na Juda; go tap wit am wit di pipul dɛn ɔ go ɛnisay yu tink se rayt.” So di kapten fɔ di gyadman dɛn gi am it ɛn prɛzɛnt, ɛn lɛf am lɛ i go.

⁶ Nain Jɛrimaya go to Gɛdalaya we na Aikam in bɔypikin na Mizpa, ɛn tap wit am wit di pipul dɛn we bin lɛf na di land.

Gɛdalaya We Na Gɔvna Na Juda

⁷ We ɔl di kapten dɛm na di difrɛn fɔs dɛm na di opin kɔntri ɛn dɛn man dɛm yɛri se di kiŋ na Babilɔn dɔn pik Gɛdalaya we na Aikam in bɔypikin, fɔ bi gɔvna na di land, ɛn dɔn put di man, uman ɛn pikin dɛm nain kia, we na dɛm popoliopo dɛn na di land we dɛn nɔ bin kɛr go ɛgzayl na Babilɔn,

⁸ dɛn go to Gɛdalaya na Mizpa – dat na Ishmɛl we na Netanaya in bɔypikin, Joanan we na Karɛa in bɔypikin, Sɛraya we na Tanumɛt in bɔypikin, Efai we na Nɛtofatayt in bɔypikin dɛm, Jɛzanaya we na da Maakatayt in bɔypikin, ɛn dɛn man dɛm.

⁹ Gɛdalaya, we na Aikam in bɔypikin ɛn Shafan in grampikin, prɔmis dɛm ɛn dɛn man dɛm we i tɛl dɛn se, “Una nɔ fred fɔ wok fɔ di Babilonian dɛm. Una tap na di land ɛn sav di kiŋ na Babilɔn, ɛn ɔltin gi ɔrayt wit yu.

¹⁰ As fo mi, a go tap na Mizpa fɔ tinap fɔ una bifo di Babilonian dɛn we go kam to wi; bɔt as fɔ una, una gɛda wayn ɛn dray sizin frut ɛn ɔyl, ɛn kip dɛm na una kɔntena dɛn, ɛn tap na di siti dɛm we una dɔn kapchɔ.”

¹¹ Semweso, wɛn ɔl di Ju dɛm we bin de na Moab, ɛn di wan dɛn we bin de wit dɛn Amɔnite dɛm, ɛn di wan dɛn na Idɔm ɛn ɔda say, yɛri se di kiŋ na Babilɔn dɔn lɛf sɔm pipul na Juda, ɛn dɔn pik Gɛdalaya we na Aikam in bɔypikin Shafan in grampikin fɔ bi Gɔvna oba dɛm,

¹² dɛn ɔl kɔmɔt na di ples we dɛn bin drɛb dɛm go ɛn kam bak to Gɛdalaya na Mizpa insay Juda; ɛn dɛn bin gɛda wayn ɛn dray sizin frut plɛnti plɛnti wan.

Dɛn Mɔda Gɛlalaya

¹³ I apin se Joanan we na Karɛa in bɔypikin ɛn ɔl di lida dɛm fɔ di sojamam dɛm we de na di opin kɔntri, bin kam to Gɛdalaya na Mizpa

¹⁴ ɛn tɛl am se, “Yu no se Bealis we na di Amonayt dɛn kiŋ, dɔn sɛn Ishmɛl we na Netanaya in bɔypikin fɔ kam kil yu?” Bɔt Gɛdalaya we na Aikam in bɔypikin nɔ biliv dɛm.

¹⁵ So Joanan we na Karɛa in bɔypikin tɔk sikritli to Gɛdalaya na Mizpa se, “Lɛ a go kil Ishmɛl we na Netanaya in bɔypikin, ɛn nɔbɔdi nɔ go no. Wetin du i wan kil yu? Na fɔ mek ɔl dɛn Ju dɛm we de ya wit yu go skata, ɛn di balans we de na Juda day?”

¹⁶ Bɔt Gɛdalaya we na Aikam in bɔypikin tɛl Joanan we na Karɛa in bɔypikin se, “Yu nɔ go du da kayn tin de, bikɔs na lay yu de lay pan Ishmɛl.”