Jɛrimaya 39 - Krio Fɔs Oli Baybul

Jerusɛlɛm Fɔdɔm

¹ Insay di mɔnt we mek tɛn, na di ia we mek kiŋ Zɛdikaya we na kiŋ na Juda, nayn ia na pawa, Nɛbyukadnɛza, we na kiŋ na Babilɔn ɛn in wanol ami bin atak Jerusɛlɛm ɛn sɔrawnd am;

² insay di ia we mek kiŋ Zɛdikaya ilɛvin ia as kiŋ, na di nayn de insay di mɔnt we mek fo, ɛn insay di mɔnt we mek fo, dɛn bin brok di wɔl dɛn na di siti.

³ Wɛn dɛn kapchɔ Jerusɛlɛm, ɔl di bigman dɛn na Babilɔn bin kam sidɔm na di midul get: sɔm pan dɛn na Nagal Sarɛza, Samga Nɛbɔ, Sasɛchim we na Rabsaris, wan ɔda Nagal Sarɛza we kɔmɔt Rabmag, wit ɔl di kiŋ na Babilɔn in ɔda ofishal dɛm.

⁴ Wɛn Zɛdikaya we na kiŋ na Juda, ɛn ɔl di sojaman dɛm si dɛm, dɛn bigin rɔnawe kɔmɔt di siti na nɛt, de pas na di kiŋ in gadin insay di get we de bitwin di tu wɔl dɛm, ɛn dɛn go to di Araba say.

⁵ Bɔt di Babilonian ami rɔnata dɛm ɛn kech Zɛdikaya na di flat grɔn na Jɛriko; wɛn dɛn kech am, dɛn briŋ am kam to Nɛbyukadnɛza we na kiŋ na Babilɔn, na Ribla, dat na di land ɔf Amat: ɛn i pas sɛntɛns pan am

⁶ Di kiŋ na Babilɔn kil Zɛdikaya in bɔypikin dɛm bifo in yay na Ribla; ɛn di kiŋ na Babilɔn kil ɔl di bigman dɛm we bin de nia di kiŋ na Juda.

⁷ I bɔs Zɛdikaya in yay dɛm ɛn tay am wit chen fɔ kɛr am go Babilɔn.

⁸ Di Babilonian dɛm bin bɔn di kiŋ in os ɛn di pipul dɛn os dɛm, ɛn brok di wɔl na Jɛrusɛlɛm.

⁹ Nain Nɛbyuzaradan we na di kapten fɔ di gyadman dɛm, kɛr di balans pipul dɛn we bin lɛf na di siti, di wan dɛn we bin dɔn rɔnawe kɔmɔt de, ɛn di wan dɛm we bin lɛf, go ɛgzayl.

¹⁰ Nɛbyuzaradan, we na di kapten fɔ di gyadman dɛn, bin lɛf sɔm pan di po pipul dɛn we nɔ gɛt natin. Dɛn bin gi dɛm greps fam ɛn grɔn dɛm togɛda.

Dɛn Fri Jɛrimaya

¹¹ Nɛbyukadnɛza we na kiŋ na Babilɔn pas kɔmand bɔt Jɛrimaya to Nɛbyuzaradan, we na di kapten fɔ di gyadman dɛn se,

¹² “Tek am go, tek gud kia ɔf am ɛn nɔ du am bad, ɛn du wetin i tɛl yu.”

¹³ So Nɛbyuzaradan we na di kapten, Nɛbyushazban we na Rabsaris, Nagal Sharɛza we na Rabmag ɛn ɔl di kiŋ na Babilɔn in bigman dɛm,

¹⁴ sɛn tek Jɛrimaya kɔmɔt na di pales yad. Dɛn an am oba to Gɛdalaya we na bin Aikam in bɔypikin ɛn Shafan in grampikin, so dat i go kɛr am go nain os. So i bin tap wit di pipul dɛm.

Ɛbɛdmɛlɛk Bin Abop

¹⁵ PAPA GƆD in wɔd bin kam to Jɛrimaya, di tɛm we dɛn bin lɔk am ɔp, na di pales yad se:

¹⁶ “Go tɛl Ɛbɛdmɛlɛk, da Itiopian we na okobo se, ‘Na dis PAPA GƆD Ɔlmayti we na Izrɛl dɛn Gɔd se: Biliv mi, a go du wetin a se na dis siti fɔ bad, ɛn nɔto fɔ gud, ɛn dɛn go opin bifo yu yay da de de.

¹⁷ PAPA GƆD se, Bɔt a go sev yu da de de, ɛn di man dɛn we yu de fred nɔ go kapchɔ yu.

¹⁸ Bikɔs a go mɔs sev yu ɛn yu nɔ go day na wa; bɔt yu go gɛt yu layf as di prayz na di wa, bikɔs yu dɔn put yu at to mi. Na so PAPA GƆD se.’”